ရင်ပေါင်တိုင်ကျေးရွာတွင် စစ်ကောင်စီတပ်နှင့် ဒေသကာကွယ်ရေးတပ်များ တိုက်ပွဲ ဖြစ်

စစ်ကိုင်းတိုင်း ၊ ယင်းမာပင်မြို့နယ်၊ ရင်ပေါင်တိုင်ကျေးရွာအတွင်းသို့ စစ်ကြောင်းထိုးပြီး မီးရှို့ဖျက်ဆီး၍ လူသတ်ခဲ့သည့် အာဏာသိမ်းစစ်ကောင်စီတပ်နှင့် ဒေသကာကွယ်ရေး တပ်ဖွဲ့များ တိုက်ပွဲ အပြင်းအထန် ဖြစ်ပွားခဲ့ကြောင်း သိရသည်။

ဒေသကာကွယ်ရေးတပ်ဖွဲ့များ ဖြစ်သည့် ရွှေတြိဂံပြည်သူ့ကာကွယ်ရေးတပ်ရင်း(GTF) ၊ ဆရာစံ PDF နှင့် Young Rangers Force အဖွဲ့များက ဩဂုတ်လ ၁၁ ရက်တွင် ပူးပေါင်း တိုက်ခိုက်ကြခြင်း ဖြစ်ပြီး ကျေးရွာအတွင်း ပိတ်မိနေသော အရပ်သား ပြည်သူများကိုလည်း ကယ်ထုတ်ခဲ့သည်ဟု ရွှေတြိဂံပြည်သူ့ကာကွယ်ရေးတပ်ရင်း က ထုတ်ပြန်သည်။

စစ်ကောင်စီတပ်က ရင်ပေါင်တိုင်ကျေးရွာကို လေကြောင်းမှ ပစ်ခတ်တိုက်ခိုက်ပြီး စစ်ကြောင်းထိုးကာ ၁၀ နှစ်အောက် ကလေးငယ်များ အပါအဝင် အရပ်သားပြည်သူများကို မီးရှို့ သတ်ဖြတ်ခဲ့ပြီးနောက် ဒေသကာကွယ်ရေးတပ်များနှင့် တိုက်ပွဲ ဖြစ်ပွားခဲ့ခြင်း ဖြစ်သည်ဟု ဆိုသည်။