.
တောင်ကြီးမြို့၊ မြို့မဈေးအနောက်ဘက်ခြမ်းရှိ
လမ်းမဘေးတွင် ရောင်းချနေသည့် ပျံကျဈေးသည်များအား လွန်ခဲ့သည့် ရက်ပိုင်းအတွင်းမှ စတင်၍
စစ်ကောင်စီလက်အောက်ခံ စည်ပင်သာယာရေးဌာနက ဖယ်ရှားရှင်းလင်းခိုင်းနေကြောင်း သိရသည်။
.
မြို့မဈေးအနောက်ဘက်ရှိ
စဝ်စံထွန်းလမ်းပေါ်နှင့် မီးသွေးတန်းလမ်းဆုံအနီး၊ ကုန်သည်လမ်းပေါ်တွင် ရောင်းချ နေသော
ဈေးသည်များကို ဈေးရောင်းချခြင်းမပြုရန် တားမြစ်ပြီး ရောင်းချနေသည့် ဈေးသည်များအား တွေ့ရှိပါက
ရှမ်းပြည်နယ်စည်ပင်သာယာရေးဥပဒေဖြင့် အရေးယူသွားမည်ဟု စစ်ကောင်စီ၏ မြို့နယ်စည်ပင်သာယာရေးဌာနက
ဈေးသည်များအား လိုက်လံပြောဆိုကာ ဖယ်ရှားခိုင်းနေခြင်းဖြစ်သည်။
.
“အခုလို အားလုံးခက်ခဲနေတဲ့အချိန်
ဒီနေရာမှာ ဈေးမရောင်းရဘူးဆိုတော့ ကျွန်မတို့က ဘယ်မှာသွားပြီး ရောင်းရ မှာလဲ။ နေရာပြန်လုပ်ပေးတာမျိုးလည်း
မရှိဘူး။ ဒီနေ့ (ဩဂုတ်လ ၂၉ ရက်) မနက်ပိုင်းမှာ ရောင်းချနေတဲ့ ဈေးသည် တွေကို လိုက်ပြီး
မောင်းထုတ်နေပါတယ်” ဟု မြို့မဈေးအနောက်ဘက်တွင် ပျံကျ ဈေးရောင်းချသူတစ်ဦးက ပြောသည်။
.
ပျံကျဈေးသည်များအနေဖြင့်
ယခုကဲ့သို့ ဈေးရောင်းချခွင့်မရသည့်အတွက် မိသားစုစားဝတ်နေရေး အခက်အခဲများ ဖြစ်ပေါ်လာနေသည့်အပြင်
နေ့စဉ် နေ့ပြန်တိုး ချေးငွေ ရယူထားသူများအနေဖြင့် ချေးငွေ ပြန်ဆပ်ရန် အခက်အခဲများ ဖြစ်ပေါ်လာနေကြောင်း
သိရသည်။
.
မြို့မဈေးအနောက်ဘက်
စဝ်စံထွန်းလမ်းနှင့် အနီးတစ်ဝိုက် နေရာရှိ ပျံကျဈေးသည် နေ့စဉ် မြို့နေလူထု အဓိက ဈေးသုံးရာ
လက်လီဈေးတစ်ခုဖြစ်ပြီး မီးသွေးတန်းလမ်းဆုံအနီး၊ ကုန်သည်လမ်းပေါ်ရှိ နံနက်အစောပိုင်းဈေး
မှာ ဒေသထွက် ဟင်းသီးဟင်းရွက်များ လက်လီလက်ကား ရောင်းချနေသည့် ဈေးတစ်ခုဖြစ်ကြောင်း သိရသည်။
.
ထို့အတူ တောင်ကြီးမြို့၊
ဗိုလ်ချုပ်အောင်ဆန်းလမ်း (မိန်းလမ်း) တစ်လျှောက်တွင် အချိန်ပိုင်းဖြင့် ရောင်းချသော
ပျံကျဈေးသည်များကိုလည်း ဈေးရောင်းချခြင်းမပြုရန် စည်ပင်သာယာရေးဌာနက ပြီးခဲ့သည့် ဇူလိုင်လကုန်ပိုင်းတွင်
အကြောင်းကြားခဲ့သေးသည်။
.
