ကယန်းစာပေနှင့် ယဉ်ကျေးမှုအသင်း ဥက္ကဋ္ဌ ပစ်သတ်ခံရ

.

ဖယ်ခုံမြို့နယ်၊ အရှေ့ဘက်ကမ်းတွင် နေထိုင်သည့် ကယန်းစာပေနှင့် ယဉ်ကျေးမှုအသင်း ဥက္ကဋ္ဌကို ယနေ့ ဩဂုတ်လ ၁၁ ရက်၊ နံနက်ပိုင်းက အမည်မသိလက်နက်ကိုင်များမှ သေနတ်ဖြင့် လာရောက်ပစ်ခတ်သဖြင့် သေဆုံးခဲ့ကြောင်း သိရသည်။

.

.

သေဆုံးသူ ကယန်းစာပေနှင့် ယဉ်ကျေးမှုအသင်း ဥက္ကဋ္ဌ ဆရာဖရန်စစ္စကိုသည် ပြောင်းခြံသွားချိန်တွင် ဆိုင်ကယ် တစ်စီးဖြင့် လူ ၂ ဦး ရောက်လာပြီး သေနတ်ဖြင့် ပစ်ခတ်ခဲ့ခြင်းဖြစ်ကြောင်း သိရသည်။

.

လက်ရှိတွင် မည်သည့်အဖွဲ့က လာရောက်ပစ်ခတ်သည်ကို မသိရှိသေးကြောင်းနှင့် ၎င်းတို့အဖွဲ့က သတ်ဖြတ်ခြင်း မဟုတ်ကြောင်း ဖယ်ခုံမြို့၊ ပြည်သူ့ကာကွယ်ရေးတပ်ဖွဲ့၊ တပ်ရင်း (၂) တာဝန်ရှိသူက ပြောသည်။

.

သေဆုံးသူ ဖရန်စစ္စကိုသည် ၂၀၁၀ ရွေးကောက်ပွဲက ပြည်ခိုင်ဖြိုးပါတီမှ ရွေးကောက်ပွဲဝင်ရောက်ယှဉ်ပြိုင်ကာ အနိုင် ရရှိခဲ့ဖူးပြီး ၂၀၁၅ ရွေးကောက်ပွဲတွင် ဝင်ရောက်ယှဉ်ပြိုင်သော်လည်း ရှုံးနိမ့်ခဲ့သူဖြစ်ကြောင်း သိရသည်။

.

ဆရာဖရန်စစ္စကို သည် ကယန်းလူမျိုးအရေး၊ စာပေ နှင့် ယဉ်ကျေးမှုအရေးတို့တွင် တက်တက်ကြွကြွပါဝင် ဦးဆောင်သူဖြစ်ကြောင်း၊ ပညာရေး ၊ လူမှုရေး၊ ဘာသာရေး လုပ်ငန်းများတွင် အမြဲပံ့ပိုးကူညီလုပ်ဆောင်ပေးသည့်  ပုဂ္ဂိုလ်ဖြစ်ကြောင်းနှင့် နိုင်ငံရေး ရှုပ်ထွေးနေချိန်တွင် ကယန်းစာပေနှင့် ယဉ်ကျေးမှုဗဟိုကော်မတီ ဥက္ကဋ္ဌကို လုပ်ကြံ သတ်ဖြတ်ခြင်းသည် ပြဿနာဖြေရှင်းနည်း မဟုတ်ကြောင်း ကယန်းစာပေနှင့် ယဉ်ကျေးမှုဗဟိုကော်မတီက ထုတ်ပြန် ထားသည်။

.