အရွယ်ရောက်ပြီးသူများအားလုံးကို စစ်ပညာသင်ကြားပေးပြီး လုံခြုံရေးတပ်ဖွဲ့ ဖွဲ့စည်းမည်ဟု PNO ထုတ်ပြန်

.

ပအိုဝ်းဒေသအတွင်းရှိ အရွယ်ရောက်ပြီးသူများအားလုံးကို စစ်ပညာသင်ကြားပေးပြီး လုံခြုံရေးတပ်ဖွဲ့ ဖွဲ့စည်းမည် ဖြစ်ကြောင်း ပအိုဝ်းအမျိုးသားအဖွဲ့ချုပ် (PNO) က ယနေ့ ဇူလိုင်လ ၆ ရက်တွင် ထုတ်ပြန်ကြေညာခဲ့သည်ဟု သိရသည်။

.

.

အထူးဒေသ (၆) ၏ နယ်မြေတည်ငြိမ်အေးချမ်းရေး၊ လုံခြုံရေး၊ ပအိုဝ်းအမျိုးသားများနှင့် အတူနေတိုင်းရင်းသားများ၏ အသက်အိုးအိမ်စည်းစိမ်များအပေါ် အန္တရာယ်ကျရောက်လာနိုင်သဖြင့် ထိုအန္တရာယ်မျာားကို ကာကွယ်နိုင်ရန် ယခုကဲ့သို့ ဖွဲ့စည်းခြင်းဖြစ်ကြောင်း PNO ၏ ထုတ်ပြန်ချက်တွင် ဖော်ပြထားသည်။

.

သို့သော်လက်ရှိတွင် စစ်ကောင်စီလက်အောက်ခံ PNO ပြည်သူ့စစ်သည် ကရင်နီပြည်ဖက်သို့ စစ်ကောင်စီတပ်နှင့်အတူ ကျူးကျော်ဝင်ရောက်ကာ ပြည်သူများ၏ ဥစ္စာပစ္စည်းများအား လုယက်ယူငင်နေသည်ဟု တော်လှန်ရေးတပ်ဖွဲ့များက ထုတ်ပြန်ထားသည်။

.

ထို့ကြောင့် ပအိုဝ်းဒေသအတွင်းရှိ အသက် ၁၈ နှစ်နှင့်အထက် အရွယ်ရောက်ပြီးသူများအားလုံးအား စုဆောင်းကာ အခြေခံစစ်ပညာသင်တန်းကို တက်ရောက်စေပြီးနောက် တပ်ဖွဲ့သစ်များအဖြစ် ဖွဲ့စည်းမည်ဖြစ်ကြောင်း သိရသည်။

.

စစ်သင်တန်းပေးပြီး တပ်ဖွဲ့ဖွဲ့စည်းမည် ဆိုသည်မှာ စစ်ကောင်စီလက်အောက်ခံ PNO ပြည်သူ့စစ်သာဖြစ်ကြောင်း၊ လူငယ်များကို စစ်ကောင်စီလက်အောက်ခံအဖြစ် အသေခံခိုင်းခြင်းသာဖြစ်ကြောင်း ပအိုဝ်းလူငယ်တစ်ဦးက ပြောဆို ခဲ့သည်။

.

ထို့အပြင် စစ်ကောင်စီလက်အောက်ခံ PNO ပြည်သူ့စစ်သည် စစ်တပ်က အစဉ်အဆက် ထုတ်ပြန်ထားသည့် တို့တာဝန်အရေးသုံးကို လက်ခံကျင့်သုံးသည်ဟုလည်း ထုတ်ပြန်ချက်တွင်ဖော်ပြသည်။

.

PNO သည် ၁၉၉၁ ခုနှစ်တွင် စစ်တပ်နှင့် ငြိမ်းချမ်းရေး ယူပြီးနောက် ၂၀၀၉ ခုနှစ်တွင် စစ်တပ်လက်အောက်ခံ ပြည်သူ့စစ်အဖြစ် ပြောင်းလဲဖွဲ့စည်းခဲ့ခြင်းဖြစ်သည်။

.