NUG က ဇူလိုင်လအတွင်း လူသားချင်းစာနာထောက်ထားရေးအတွက် ထောက်ပံ့ကူညီမှုအဖြစ် ငွေကျပ် သန်း ၂၂၀ ကျော် အသုံးပြုခဲ့

.

အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီး ဌာနက လူသားချင်းစာနာထောက်ထားရေးအတွက် ထောက်ပံ့ကူညီမှုအဖြစ်နဲ့ ကျပ်ငွေ ၂၂၃ ဒသမ ၆၄ သန်း ကို ဇူလိုင်လအတွင်း အသုံးပြုခဲ့ကြောင်း သိရသည်။

.

.

အဆိုပါရန်ပုံငွေဖြင့် ကူညီထောက်ပံမှုများ ပြုလုပ်ရာတွင် စစ်ကောင်စီတပ်၏ ထိုးစစ်ဆင်တိုက်ခိုက်မှုများကြောင့် ထွက်ပြေးခိုလှုံနေကြသည့် ပြည်သူများ၊ တော်လှန်ရေးတွင် ပါဝင်ရင်း ထိခိုက်ဒဏ်ရာရရှိသူများနှင့် အသက်ဆုံးရှုံးခဲ့ရ သူများ၏ မိသားစုဝင်များ၊ အကူအညီလိုအပ်နေသော မသန်စွမ်းများအပါအဝင် ထိခိုက်လွယ်အုပ်စုများ၊ အကြောင်း အမျိုးမျိုးကြောင့် လူသားချင်းစာနာမှုအကူအညီ လိုအပ်နေသူများကို ထောက်ပံ့ခဲ့ခြင်းဖြစ်ကြောင်း သိရသည်။

.

ထောက်ပံ့ရာတွင်လည်း မိတ်ဖက်အသီးသီးနှင့် လက်တွဲချိတ်ဆက်၍ အတတ်နိုင်ဆုံး မြေပြင်အထိရောက်အောင် ပံ့ပိုး ကူညီပေးခဲ့ပြီး စစ်ကောင်စီတပ်၏ အတားအဆီးအမျိုးမျိုးကြားမှ ဘေးဒုက္ခ ခံစားနေရသော ပြည်သူများလက်ဝယ် ရောက်ရှိအောင် စီစဉ်ဆောင်ရွက်ပေးခဲ့ကြသော မိတ်ဖက်အဖွဲ့များ၊ ကိုယ်စားလှယ်များ၊ စေတနာ့ဝန်ထမ်းများကို ကျေးဇူးတင်ရှိကြောင်း အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ထုတ်ပြန်ထားသည်။

.