တောင်ကြီးခရိုင်အတွင်းရှိ မြို့များတွင်အချိန်ပြည့် ဓါတ်အားပေးမည်ဟု ESE Taunggyi ကြွားလုံးထုတ်

.

တောင်ကြီးခရိုင်အတွင်းရှိ မြို့များတွင် အရေးပေါ်အခြေအနေမှ လွဲ၍ အချိန်ပြည့် ဓါတ်အားပေးသွားမည်ဖြစ်ကြောင်း တောင်ကြီးမြို့ရှိ မြန်မာ့လျှပ်စစ်ဓါတ်အားဖြန့်ဖြူးရေးလုပ်ငန်း (ESE Taunggyi) က ယနေ့ ဇူလိုင်လ ၇ ရက်တွင် လူမှုကွန်ရက်စာမျက်နှာ (Facebook Account) မှတစ်ဆင့် ကြွားလုံးထုတ် ကြေညာထားသည်ဟု သိရသည်။

.

.

“မီး အချိန်ပြည့်ပေးမယ်ဆိုရင်တော့ အဆင်ပြေတာပေါ့။ မနက် ကလေးတွေ ကျောင်းထမင်းထုပ်ဖို့ ချက်ပြုတ်ရတာ လည်း အဆင်ပြေသွားမယ်။ အပြောနဲ့အလုပ် ညီဖို့တော့ လိုတာပေါ့နော်” ဟု တောင်ကြီးဒေသခံတစ်ဦးက ၎င်း၏ အမြင်ကို ပြောသည်။

.

လျှပ်စစ်ဓါတ်အားလုပ်ငန်းက တောင်ကြီးမြို့ အပါအဝင် မြန်မာတစ်နိုင်ငံလုံးရှိ မြို့များတွင် ပြီးခဲ့သည့် ၂၀၂၁ ခုနှစ်၊ နှစ်ကုန်ပိုင်းမှ စတင်၍ လျှပ်စစ်မီးကို အချိန်ပိုင်း ဖြင့်သာ ဖြန့်ဖြူးပေးနေခြင်းဖြစ်သည်။

.

“အခုက မီးမဖြတ်တော့ဘူး ဆိုတော့ ကောင်းတာပေါ့။ ဒါပေမဲ့ မိုးလေးနည်းနည်းရွာ၊ လေလေး နည်းနည်းတိုက်မယ် ဆိုရင် မီးက အရင်ပြတ်နေတာကတော့ ရှိနေဦးမှာပါပဲ” ဟု အခြား ဒေသခံတစ်ဦးကလည်း ပြောသည်။

.

စစ်ကောင်စီ၏ ပြန်ကြားရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းကမူ အချိန်ပိုင်းဖြင့် လျှပ်စစ်ပေးသည့်စနစ်မှာ မေလအထိ ရှိနိုင်ကြောင်း ပြောဆိုထားခဲ့ဖူးပြီး ယခု ဇူလိုင်လ မှသာ အချိန်ပြည့် ဓါတ်အားပြန်ပေးမည်ဟု လျှပ်စစ်ဓါတ်အားဖြန့်ဖြူးရေးလုပ်ငန်းက ကြေညာခဲ့ခြင်းဖြစ်သည်။

.

တောင်ကြီးမြို့နယ် လျှပ်စစ် ဓာတ်အား ဖြန့်ဖြူးရေးလုပ်ငန်း အတွက် တောင်ကြီးတွင် ဓါတ်အားခွဲရုံ ၃ ရုံနှင့် အောင်သပြေတွင် ဓာတ်အား ခွဲရုံ ၂ ရုံ၊ နောင်ကားတွင် ဓာတ်အား ခွဲရုံ ၁ ရုံတို့ဖြင့် ဆောင်ရွက်ပေး လျက်ရှိကြောင်း သိရသည်။

.

#KBZTai  #7July2022

.

Link –

.