ရေဦးမြို့နယ်၊ တင်းတိမ်ရံကျေးရွာရှိ ဈေးဆိုင်ခန်း ၂၀၀ ကျော်နှင့် လူနေအိမ် ၅၀ ကျော် မီးရှို့ခံရ

.

စစ်ကိုင်းတိုင်း၊ ရေဦးမြို့နယ်၊ တင်းတိမ်ရံကျေးရွာရှိ ဈေးဆိုင်ခန်း ၂၀၀ ကျော်နှင့် လူနေအိမ် ၅၀ ကျော်ကို ယမန်နေ့ ဇူလိုင်လ ၂၉ ရက်က စစ်ကောင်စီတပ်သားများ ဝင်ရောက်မီးရှို့ခဲ့ကြောင်း ဒေသခံများထံက သိရသည်။

.

.

အင်အား ၁၀၀ နီးပါးရှိ စစ်ကောင်စီ စစ်ကြောင်းသည် ယမန်နေ့ ညနေ ၄ နာရီကျော်က တင်းတိမ်ရံကျေးရွာအတွင်း ဝင်ရောက်လာပြီး ညနေ ၆ နာရီခန့်တွင် ဈေးနှင့် နေအိမ်များကို မီးရှို့ခဲ့ခြင်းဖြစ်ကြောင်း သိရသည်။

.

ဈေးသည် ကျေးရွာအလယ်တွင် တည်ရှိပြီး ဆိုင်ခန်း ၂၀၀ နီးပါး မီးလောင်ခဲ့ကြောင်း၊ ရွာအတွင်းရှိ နေအိမ် ၅၀ ကျော်ကိုလည်း မီးရှို့ခဲ့ကြောင်းနှင့် စစ်ကြောင်းမှာ ရွာအတွင်း ရှိနေဆဲဖြစ်သည့်အတွက် အသေးစိတ် မသိရှိနိုင်သေးကြောင်း ဒေသခံတစ်ဦးက ပြောသည်။

.

ယင်းစစ်ကြောင်းသည် တင်းတိမ်ရံကျေးရွာ၏ တောင်ဘက်မှ ဝင်ရောက်ခဲ့ခြင်းဖြစ်ပြီး နေအိမ်များအတွင်းရှိ ရွှေ၊ ငွေနှင့် တန်ဖိုးကြီးပစ္စည်းများကိုပါ ဝင်ရောက်ယူဆောင်သွားကြောင်း ဒေသခံများက ပြောသည်။

.

တင်းတိမ်ရံကျေးရွာတွင် နေအိမ်ပေါင်း ၃၀၀ ကျော်ရှိပြီး လက်ရှိအချိန်ထိ စစ်ကောင်စီတပ်သားများ ရွာအတွင်း တပ်စွဲထားသည့်အတွက် ဒေသခံများအားလုံး နီးစပ်ရာကျေးရွာများနှင့် တောတောင်များအတွင်း ထွက်ပြေးပုန်းရှောင် နေရကြောင်း သိရသည်။

.