ပြည်သူတွေရဲ့ ညသန်းခေါင်ယံ အိပ်မက်ဆိုး (သို့မဟုတ်) ဧည့်စာရင်း - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။ contact; kanbawzatai.editor@gmail.com

ပြည်သူတွေရဲ့ ညသန်းခေါင်ယံ အိပ်မက်ဆိုး (သို့မဟုတ်) ဧည့်စာရင်း

.

ဝုန်း ဝုန်း ဝုန်း ....

.

သူပုန်များ အိမ်ထဲဝင်စီးခြင်း မဟုတ်ပါ။ စစ်ကောင်စီတပ်သားများနှင့် ၎င်းတို့၏ အလိုတော်ရိများ ဧည့်စာရင်းစစ်ရန် အိမ်တံခါးခေါက်ခြင်းသာဖြစ်သည်။ တံခါးခေါက်ခြင်း ဆိုသည်ထက် အကြမ်းဖက်ကာ တံခါးကို ဖျက်ဆီးနေခြင်း ဖြစ်သည်။

.

.

သူပုန်များထက်ဆိုသည့် စစ်ကောင်စီတပ်သားများ၊ အလိုတော်ရိများသည် ပြည်သူလူထု၏ နေအိမ်များကို ယင်းကဲ့သို့ အကြမ်းဖက် ဝင်ရောက်နှောင့်ယှက်နေခြင်းမှာ ယခုတစ်ကြိမ်မှမဟုတ်။ စစ်ကောင်စီအာဏာသိမ်းသည့် ၂၀၂၁ ခုနှစ်၊ ဖေဖော်ဝါရီလ နောက်ပိုင်းကတည်းက ဖြစ်သည်။

.

ဧည့်စာရင်းဥပဒေ ဟူသည်မှာ အာဏာရှင်တို့က ၎င်းတို့ အာဏာတည်မြဲရေးအတွက် သက်သက် ပြဌာန်းထားခြင်းသာ ဖြစ်သည်။

.

ခေတ်အဆက်ဆက် စစ်အာဏာပိုင်များက ၎င်းတို့ကို တော်လှန်မည်ဟု သံသယရှိသူများကို ထိန်းသိမ်း ဖမ်းဆီးနိုင်ရန် အတွက် ဧည့်စာရင်းဥပဒေကို ပြဌာန်းခဲ့ကြသည်။ နိုင်ငံတော်တည်ငြိမ်ရေး၊ ရပ်ရွာအေးချမ်း သာယာရေး ဟု ဆိုသော်ငြားလည်း အမှန်တကယ်တမ်းတော့ ၎င်းတို့ အမြင်မကြည်သူများကို နှိပ်ကွပ်ရန်အတွက်သာ ဖြစ်သည်။

.

နေ့တစ်ဓူဝ အသက်မွေးဝမ်းကျောင်း လုပ်ငန်းများကို လုပ်ကိုင်ပြီး အများပြည်သူ အိပ်စက်အနားယူချိန် ညဉ့်နက် သန်းခေါင်ယံအချိန် အိပ်တံခါး အတင်းတွန်း၍ ဒုက္ခပေးနေသည်မှာ ဧည့်စာရင်းပင် ဖြစ်သည်။

.

“ဧည့်စာရင်းက ရှောင်တခင်ပုံစံမျိုးစစ်နေတာပေါ့။ အဓိကကတော့ နိုင်ငံရေးနဲ့ပတ်သက်တာတွေကို စစ်နေတာပေါ့။ အိမ်မှာ အမျိုးတွေလာရင်လည်း ဧည့်စာရင်းတိုင်ထားတာ ကောင်းပါတယ်။ အခုက သူတို့ လုပ်ချင်သလိုလုပ်နေကြ တာလေ” ဟု တောင်ကြီးဒေသခံတစ်ဦးက ပြောသည်။

.

NLD အစိုးရလက်ထက်တွင် ပြည်သူများ ဝန်ထုပ်ဝန်ပိုး မဖြစ်စေရန် ဧည့်စာရင်းဥပဒေကို ဖျက်သိမ်းပေးခဲ့သည်။ သို့သော် စစ်အာဏာရှင် ခေါင်းဆာင် အာဏာလုပြီး ရက်ပိုင်းအတွင်းမှာပင် ယင်း ဧည့်စာရင်းဥပဒေကို တစ်ဖန် အသက်သွင်းခဲ့ ပြန်သည်။

.

မြန်မာနိုင်ငံသားမိဘနှစ်ပါးမှ ပေါက်ဖွားလာပြီး နိုင်ငံသားကတ်ပြား ကိုင်ဆောင်ထားသော နိုင်ငံသားတစ်ဦး အနေဖြင့် မြန်မာနိုင်ငံအတွင်း မည်သည့်နေရာ ဒေသတွင် နေထိုင်သည်မဆို နေထိုင်ခွင့် မရှိပါသလား။ ဘာကြောင့်များ နိုင်ငံသား စိစစ်ရေးကတ်ပြားများ ထုတ်ပေးထားပါသနည်း။ ထိုသို့ဆိုလျှင် ဧည့်စာရင်းဖြင့် လုံလောက်ပါပြီလော။

.

ကမ္ဘာ့ မည်သည့်ဒီမိုကရေစီနိုင်ငံတွင်မဆို နိုင်ငံသားများကို နှိပ်ကွပ်သော ဧည့်စာရင်းဥပဒေ မရှိပါ။ နိုင်ငံသားတစ်ဦး အနေဖြင့် မိမိနိုင်ငံအတွင်း မည်သည့်အရပ်ဒေသတွင်မဆို လွတ်လပ်စွာ နေထိုင်ခွင့် ရှိပါသည်။

.

စစ်ကောင်စီသည် ၎င်းတို့ အာဏာလုပြီးနောက် ရက်ပိုင်းအတွင်းမှာပင် ဧည့်စာရင်းဥပဒေကို တစ်ဖန်ပြန်လည် အသက် သွင်းခဲ့သလို ပြည်သူ့ဘဝ လုံခြုံမှု၊ လွတ်လပ်မှုတို့အတွက် အရပ်သားအစိုးရလက်ထက်က ပယ်ဖျက်ပေးခဲ့သော ဥပဒေ များကိုလည်း ပြန်လည်အသုံးပြုခဲ့ပြီး ဥပဒေများကို လိုအပ်သလို ပြင်ဆင်ခဲ့သည်။

.

ရာဇဝတ်မှု လျော့နည်းကျဆင်းရေး ဟူသော ခေါင်းစဉ်ဖြင့် ဧည့်စာရင်း စစ်ဆေးခြင်းမှာလည်း လုံလောက်သည့် အကြောင်းပြချက် မဟုတ်ပါ။ မည်သည့် ရာဇဝတ်သားမျှ တရားဝင် ဧည့်စာရင်းတိုင်၍ မြို့ပေါ်တွင် နေထိုင်မည် မဟုတ်ပါ။ နေထိုင်နေပါကလည်း စုံစမ်းဖော်ထုတ်ရန်မှာ ရဲတပ်ဖွဲ့၏ တာဝန်သာဖြစ်သည်။

.

ဧည့်စာရင်းဥပဒေ ဟူသည်မှာ အာဏာရှင်တို့က ၎င်းတို့ အာဏာတည်မြဲရေးအတွက် သက်သက် ပြဌာန်းထားခြင်းသာ ဖြစ်သည်။

.

အရပ်သားအစိုးရလက်ထက်က ဧည့်စာရင်းဥပဒေကို ပယ်ဖျက်လိုက်ခြင်းကြောင့် စစ်ကောင်စီအလိုတော်ရိများ၊ မျိုးချစ် ဟု ဆိုသူများက က အမျိုးမျိုး ဝေဖန်ပြောဆိုကြသည်။ အမှန်တကယ် ဧည့်စာရင်းဥပဒေကို ပြန်လည်ပြဌာန်းလိုက်ခြင်း ဖြင့် မည်သူမည်ဝါ အကျိုးရှိပါသနည်း။ ပြည်သူတို့၏ လွတ်လပ်မှုနှင့် လုံခြုံမှုကို ပြောင်ပြောင်တင်းတင်း ချိုးဖောက်နိုင် ရန်အတွက် ယင်းဥပဒေကို ပြန်လည်ပြဌာန်းခြင်းဖြစ်သည်ဟုသာ ဆိုရပါမည်။

.

အဆိုးရွားဆုံးမှာ မူးယစ်ရီဝေနေသော စစ်ကောင်စီတပ်သားများ၊ ရဲများက ညအချိန်မတော် အခါမတော် မိန်းမပျိုများ နေထိုင်ရာ နေရာပါမချန် ဧည့်စာရင်းစစ်သည်ဟူသော အကြောင်းပြချက်ဖြင့် ဝင်ရောက်မွှေနှောက်ရှာဖွေကြခြင်း ဖြစ်သည်။

.

သွားရောက်စစ်ဆေးသော ရပ်ကွက်အုပ်ချုပ်ရေးမှူးရုံးမှ အဖွဲ့သားများ၊ စစ်ကောင်စီတပ်သားများ၊ ရဲများ ဟောက်စား လုပ်ရာ ခွင် (ဂွင်) တစ်ခုသာ ဖြစ်သည်။

.

“ရပ်ကွက်တွေထဲမှာတော့ ဧည့်စာရင်းတိုင်ဖို့ စာကပ်ထားတာတွေရှိတယ်။ နယ်မြေမှူးကို အကြောင်းကြားထားရမယ် ပေါ့။ အထက်ညွှန်ကြားချက်အရ ရှောင်တခင်စစ်မယ်ဆိုတာမျိုးပေါ့” ဟု ဒေသခံတစ်ဦးက ပြောဆိုခဲ့သည်။

.

လက်ရှိတွင် စစ်ကောင်စီတပ်သားများက ဧည့်စာရင်း ဟူသောအကြောင်းပြချက်ဖြင့် လူထုကို ဖမ်းဆီးနှိပ်ကွပ်နေသည် မှာ အားလုံးအသိပင်ဖြစ်သည်။

.

လူထုဘဝ အမှန်တကယ် လုံခြုံရေးမှာ ယင်းညသန်းခေါင်ယံအိပ်မက်ဆိုးမှ လွတ်မြောက်နိုင်ရေး၊ စစ်အာဏာရှင်စနစ် ကျဆုံးရေးသာဖြစ်ပါသည်။ ဧည့်စာရင်းဥပဒေ ပြဌာန်းရုံဖြင့် ပြည်သူ့ဘဝ လုံခြုံမှု မရနိုင်ပါ။ အရပ်သားအစိုးရ လက်ထက်က မည်သည့်ဧည့်စာရင်းမျှ မစစ်ဆေးပါဘဲ ပြည်သူ့ဘဝ လုံခြုံအေးချမ်းခဲ့သည်ကို အမှတ်ရစေချင်ပါသည်။

.

စစ်ကောင်စီတပ်သားများ၊ အလိုတော်ရိများ ထင်ရာစိုင်း ရိုင်းခွင့်ပေးထားသော ဧည့်စာရင်း သို့မဟုတ် ပြည်သူတို့၏ ည သန်းခေါင်ယံအိပ်မက်ဆိုးမှ အမြန်ဆုံး လွတ်မြောက်နိုင်ပါစေကြောင်း ဆုမွန်ကောင်းတောင်းရင်း။  

.

Journal Download

Photo of three cats