ထိုင်းသွားမလား၊ ဘိန်းစိုက်မလား (သို့မဟုတ်) ဘိန်းစိုက်တောင်သူတို့သံသရာ

.

စိုင်းခွန်

.

.

စိုက်ခင်းတွေကို ဖျက်ဆီးနိုင်တဲ့ အာဏာရှိတဲ့သူတွေ မရောက်ဘူး၊ လက်လှမ်းမမှီဘူးလို့ထင်ရတဲ့ တောစောင်း...

.

အဲဒီတောင်စောင်းမှာ စိုက်ပျိုးရင် ဖျက်ဆီးခံရမှု နည်းမယ်လို့ ယုံကြည်တာကြောင့် တောင်သူတွေကအဲလိုနေရာကိုသာ ဘိန်းတွေ အများဆုံး စိုက်ကြပါတယ်။ ဒါပေမယ့် တစ်ခါတစ်ရံမှာ စစ်တပ်၊ ရဲတွေက တွေ့အောင်ရှာ ဖျက်ဆီးတာလည်းရှိပါတယ်။

.

အဲ့ဒီလို ဘိန်းခင်းတွေကို ရှာဖွေဖျက်ဆီးတဲ့ ဘိန်းစိုက်ပျိုးမှု ပပျောက်ရေး စီမံချက်တွေကပဲ လာဒ်ပေးလာဒ်ယူမှုတွေကို ဖြစ်ပေါ်စေခဲ့တာပါ။ ဘိန်းခင်းတွေ ဖျက်ဆီးမခံရဖို့ ဆိုင်ရာ ပိုင်ရာ အဖွဲ့အစည်းတွေကို ဘိန်းစိုက်ခွန်အဖြစ် နားလည်မှုနဲ့ ငွေကြေးမြောက်များစွာ ပေးဆောင်ရတယ်လို့ ဘိန်းစိုက်သူတစ်ဦးဖြစ်တဲ့ ခွန်အောင်တင်ကပြောပြပါတယ်။

.

ဘိန်းစျေးရှိရှိ၊ မရှိရှိ ဘိန်းစိုက်တောင်သူတွေ စစ်တပ်၊ ရဲ နဲ့ ပြည်သူ့စစ်တွေကို ပေးရတဲ့ ဘိန်းစိုက်ခွန် က တစ်နှစ်ထက်တစ်နှစ်ပိုများလာပါတယ်။ တစ်ဖွဲ့တစ်ဖွဲ့ကို ရွာကြီးတာ ငယ်တာ အလိုက် သိန်းဆယ်ဂဏန်းကနေ ရာဂဏန်းအထိ ပေးကြရပါတယ်လို့ ဘိန်းစိုက်တောင်သူတွေက ပြောပါတယ်။

.

ဒါကြောင့် အခွန်နဲ့ပိပြီး ကိုယ့်အတွက် မကျန်တာမျိုး မဖြစ်ရအောင် အခွန်အဆမတန်ပေးရတာမျိုးကို ရှောင်လွဲနိုင်ဖို ဘိန်းစိုက်သူတွေက ရွာနဲ့ အလွန် ဝေးကွာတဲ့ လူသူအရောက်နည်းတဲ့နေရာမှာ စိုက်ပျိုးလာကြပါတယ်။ နေအိမ်ကနေ အဲဒီဘိန်းစိုက်ပျိုးတဲ့ နေရာကိုရောက်ဖို့ နာရီနဲ့ချီပြီး တောင်တက်တောင်ဆင်းလမ်းခရီးကို ခြေလျင်သွားရပါတယ်။

.

ဘိန်းစိုက်ပျိုးတာဟာ တရားမဝင်ဖြစ်တာမို့လို့ ဘိန်းစိုက်သူတွေဟာ အလွန်ချမ်းသာတယ်လို့ ထင်ရင်မှားသွားမှာပါ။ သူတို့မှာ တခြားစိုက်ပျိုးရေးအတွက် အခက်ခဲတွေရှိသလို စျေးကွက်နဲ့ ကောင်းမွန်တဲ့ လမ်းပန်းဆက်သွယ်ရေးတွေ မရှိတာရယ်ကြောင့်သာ အများစုက ဘိန်းစိုက်နေရတာပါ။

.

မေလအတွင်းမှာပဲ ဟိုပုံးမြိုနဲ့ မိုင် ၃၀ အကွာမှာရှိတဲ့ ရွာတစ်ရွာကို ကျွန်တော်ရောက်သွားခဲ့ပါတယ်။ စိုက်ထားတဲ့ဘိန်းခင်းကို ရှာတွေ့ဖို ကျွန်တော်တို့ ပင်လယ်ရေမျက်နှာပြင်အမြင့်ပေ (၅၀၀၀)ကျော်ရှိတဲ့ တောင်ကိုတက်ပြီးရှာဖွေခဲ့ရပါတယ်။

.

တောင်တက်လမ်း လမ်းတစ်လျှောက် မတ်စောက်တဲ့ နေရာရှိသလို တစ်ချို့နေရာတွေကျတော့ ခပ်ပြေပြေနဲ့တက်ရတာလည်းရှိတယ်။ အချို့နေရာများမှာတော့ ဘိန်းခင်းကို ရှာတွေ့ဖို့ တောင်စောင်းတွေကို တက်လိုက်ရတာ တစ်ဖက်မှာ ချောက်ကမ်းပါးလိုမျိုးလည်း ရှိပါတယ်။

.

အဲဒီဒေသဟာ အရင်အချိန်တွေတုန်းကတည်းက ဘိန်းအကြီးအကျယ်စိုက်ပျိုးခဲ့ဖူးတဲ့ ဒေသဖြစ်ပြီး ယခုအချိန်ထိ ဘိန်းစိုက်ပျိုးမှု အမြစ်မပြတ်သေးပါဘူး။

.

ဘိန်းပေါက်စအပင်ရဲ့ အရွက်ဟာ ဆလပ်ရွက်နဲ့ ခပ်ဆင်ဆင်ဖြစ်ပြီး ဆလပ်ရွက်ထက်တော့ ရှည်မျော မာကြောတဲ့အရွက်ဖြစ်ပါတယ်။ ကြီးထွားခါစ ဘိန်းရွက်တွေကို မုန်ညင်းရွက်လိုမျိုး ရေနွေးဖျောပြီး သုပ်စားလို့ရပါတယ်။ အရသာတော့ ခါးသက်သက် ရှိတယ်လို့ ဒေသခံတွေကပြောပါတယ်။

.

“ခါးတယ်၊ သွေးအားနည်းတဲ့သူစားရင်တော့ ခေါင်းမူးတတ်တယ်” လို့ ခွန်အောင်တင်က ပြောပါတယ်။

.

ဟိုပုံးမြို့နယ်ထဲက တောင်တန်းပေါ်မှာတည်ရှိတဲ့ အဲဒီဒေသဟာ အရင်အရပ်သားအစိုးရလက်ထက်တုန်းက ဘိန်းစိုက်ပျိုးမှု အင်မတန်နည်းလာခဲ့ပါတယ်။ ပြီးခဲ့တဲ့ ၁၀နှစ်ကျော်ကျော် အချိန်နဲ့နှိုင်းယှဉ်ရင် ၁၀ပုံ ၈ ပုံလောက်ကို နည်းလာခဲ့တယ်လို့ ဒေသခံတွေကပြောပါတယ်။

.

ဒါပေမယ့် စစ်ကောင်စီက အာဏာသိမ်းပြီးနောက်ပိုင်း ခြံထွက်ကုန်ပစ္စည်းတွေက စျေးမရတာတွေ၊ ကုန်စျေးနှုန်း နဲ့ စိုက်ပျိုးရေးသွင်းအားစု ပစ္စည်းတွေ အဆမတန် စျေးကြီးလာတာတွေနဲ့ ဘိန်းစျေးနှုန်း ပြန်ကောင်းလာတာရယ်ကြောင့် ယခုနှစ်မှာတော့ ဒေသခံတွေဟာ ဘိန်းစိုက်ပျိုးမှု ပြန်များလာပါတယ်။

.

တောင်စောင်းကြားတစ်နေရာမှာတော့ ဘိန်းပင်တွေကြားက ပေါင်းပင်နှုတ်နေတဲ့ တောင်သူတစ်ဦးကိုလည်း တွေ့ရပါတယ်။ အဲ့ဒီတောင်သူနဲ့ စကားပြောကြည့်တော့ ဘိန်းစိုက်ပျိုးရတာဟာ တစ်ခြားရွေးချယ်စရာမရှိတော့လို့ စိုက်ပျိုးရတာလို့ သူကပြောပါတယ်။ စိုက်ပျိုးရေး ထွက်ကုန်တွေကို သယ်ယူဖို့ ကုန်ထုတ်လမ်းတွေမရှိတာ၊ စိုက်ပျိုးရေးသွင်းအားစုပစ္စည်းတွေ စျေးကြီးတာ၊ ထွက်ရှိလာတဲ့ စိုက်ပျိုးရေးထုတ်ကုန်တွေအတွက် စျေးကွက်အာမခံချက်မရှိတာတွေက အခု စျေးပြန်တက်လာတဲ့ ဘိန်းကို ပြန်စိုက်ဖို့ တွန်းအားပေးခဲ့တာလို့ တောင်သူတွေရဲ့ ပြောဆိုချက်အရ သိရပါတယ်။

.

“စစ်တပ်ကာအာဏာသိမ်းပြီးနောက် ဘိန်းစျေးတွေကလည်း အရင် နှစ်သိန်းလောက်ကနေ အခု ၇ သိန်းထိရလာကြတော့ ဘိန်းစိုက်တဲ့လူတွေ ပြန်များလာတယ်။ ရွာမှာကလည်း အစစအရာရာ ခက်ခဲလာတော့ ထိုင်းသွားမလား ဘိန်းစိုက်မလားလို့ဖြစ်လာနေပြီ” လို့ တွေ့ဆုံမေးမြန်းခဲ့တဲ့ ဒေသခံတစ်ဦးက ပြောပါတယ်။

.

ဘိန်းအစားထိုးသီးနှံတွေ မစိုက်ကြဘူးလားလို မေးကြည့်တော့ "ဒီတော ဒီတောင်ကြားထဲမှာ လမ်းပန်းဆက်သွယ်ရေးမကောင်းပဲနဲ့ ဘာစိုက်လို့ရမှာလည်း။ ပြောင်းဖူးစိုက်ရအောင်လည်း တောင်ပေါ်ကနေ ရွာကိုသယ်လို့ အဆင်မပြေဘူးလေ"လို့ ခွန်အောင်တင်က ပြောပြပါတယ်။

.

အဲဒီတောင်သူပြောပြချက်အရ ဘိန်းအစားထိုးသီးနှံအဖြစ် ကော်ဖီမျိုးစေ့ကို အဖွဲအစည်းတစ်ခုက လာရောက်ပံ့ပိုးကူညီပေမယ့် အောင်မြင်မှုမရခဲ့ပါဘူး။ ကော်ဖီဟာ နှစ်ရှည်အပင်ဖြစ်တဲ့အတွက် ကော်ဖီမသီးခင် တောင်သူတွေစာ၀တ်နေရေး အဆင်ပြေစေဖို့ ပံ့ပိုးကူညီဖို့ လိုပါတယ်။ အဲဒီလို အကူအညီ မရှိတဲ့အတွက် ဘိန်းစိုက်ပျိုးမှုကိုသာ အားထားရတာဖြစ်ပါတယ်။ အဲ့ဒီဒေသရဲ့ မြေအနေအထားနဲ့ အေးလွန်းတဲ့ ရာသီဥတုကြောင့်လည်း အခြား အစားထိုးသီးနှံတွေ စိုက်ပျိုးမှုက မဖြစ်ထွန်းကြဘူးလို့လည်း ဒေသခံတွေကပြောဆိုကြပါတယ်။

.

အဲဒီရွာမှာ ကော်ဖီစိုက်ပျိုးမှုကို ဘိန်းအစားထိုးသီးနှံအဖြစ် လုပ်ကိုင်တာ လေးနှစ်ရှိပါပြီ။ ဒီနှစ်မှာ ကော်ဖီတွေစတင်သီးလာပြီး ရောင်းချမှုရှိပေမယ့် လမ်းပန်းဆက်သွယ်ရေး ကောင်းမွန်မှု မရှိတဲ့အတွက် သယ်ယူပိုဆောင်ဖို့ မလွယ်ကူသလို ရွာမှာရောင်းချရင်လည်း တစ်ကီလိုကို ၅၀၀ ကျပ်သာ ရရှိပါတယ်။

.

အရင်နှစ်တွေတုန်းက ဘိန်းစိမ်းတစ်ပိဿာကို တစ်သိန်းခွဲ နှစ်သိန်းသာ ရရှိတဲ့အတွက် ဘိန်းစိုက်ပျိုးမှု အနည်းငယ် လျော့ကျခဲ့ပေမယ့် အခုနှစ်မှာ ဘိန်းစိမ်းတစ်ပိဿာကို ၅သိန်းကနေ ၇သိန်းအထိ ပြန်ရလာတော့ ဘိန်းပြန်လည်စိုက်ပျိုးလာတဲ့ ရွာတွေလည်း ရှိပါတယ်။

.

အကြမ်းဖျဉ်းအားဖြင့် ဘိန်းစိုက်ပျိုးမှု တစ်ဧကကို ဘိန်းစိမ်း (၂) ပိဿာ၀န်းကျင်ထွက်ရှိပါတယ်။ အဲဒီတစ်ဧကအတွက်ရင်းရတဲ့ သွင်းအားစု ဓာတ်မြေသြဇာ၊ လူငှားရမ်းခတွေ ပြန်နှုတ်ရင် တစ်ပိဿာကို ငါးသိန်းနဲ့ ရောင်းရမှ ခြံရှင်အတွက် နှစ်သိန်း၀န်းကျင် ကျန်ရှိတာပါ။ ဘိန်းစိုက်ပျိုးရာမှာ တစ်ဧကကို အရင်းအနှီး ၇သိန်းပတ်ချာလည် ကုန်ပါတယ်။

.

"အခုတော့ ကော်ဖီစိုက်လာတာရှိတယ် ။ စျေးတော့ သိပ်မရဘူး ။ ကော်ဖီအခြောက်ခံပြီးသားကို တစ်ကီလို ၅၀၀ ကျပ်ပဲရတယ်။ လမ်းပန်းဆက်သွယ်ရေးကောင်းရင်တော့ တစ်ခြားစိုက်ပျိုးရေး ပြောင်းစိုက်မယ် "လို့ ဘိန်းပင်ကြားမှာ ပေါင်းပင်ရှင်းနေတဲ့ တောင်သူတစ်ဦးကပြောပါတယ်။

.

အခု ကျွန်တော်တို့ ဘိန်းခင်းကို ရှာဖွေတွေ့ရှိခဲ့တဲ့ နေရာ ဟာ ရှမ်းပြည်နယ်အတွင်း နိုင်ငံခြားခရီးသွားတွေ အများဆုံး၀င်ရောက် တဲ့အင်းလေးကန်နဲ့ မိုင်(၄၀) အကွာအဝေးသာရှိတာပါ။ ကမ္ဘာမှာ ဘိန်းစိုက်ပျိုးမှုအများဆုံးနိုင်ငံဖြစ်တဲ့ အာဖဂန်နစ္စတန် အောက်မှာ မြန်မာနိုင်ငံဟာ ဘိန်းစိုက်ပျိုးမှုအများဆုံး ဒုတိယနေရာမှာ ရှိနေပါတယ်။

.

"ဘိန်းက ငါတိုနိုင်ငံအတွက် မကောင်းဘူးဆိုတာ သိတယ် ။ ဒါပေမယ့် ရွေးချယ်စရာမရှိဘူး။ ထမင်းမငတ်ဖို့ စိုက်ရတာလေ" လို့ ခွန်အောင်တင်က ပြောပါတယ်။

.

သူ့စကားအရ တောင်သူတွေဟာ ဘိန်းကိုစိုက်ချင်လို့ စိုက်တာမဟုတ်ဘူးဆိုတာ ကောက်ချက်ချနိုင်ပါတယ်။ စစ်ကောင်စီက အာဏာသိမ်းပြီးတဲ့နောက် ၂၀၂၁ ခုနှစ်ကနေ လက်ရှိအချိန်ထိတော့ ယခင် အရပ်သားအစိုးလက်ထက်ကလို ဘိန်းခင်းတွေကို အများအပြား ရှာဖွေဖျက်ဆီးတာတွေ သိပ်မတွေ့ရဘူးလို့လည်း တောင်သူတွေက ဆိုပါတယ်။

.

အဲ့ဒီလို မဖျက်ဘူးဆိုတာက တိုင်းပြည်က မတည်ငြိမ်တာကြောင့်လည်းဖြစ်မယ်လို့ တောင်သူတွေက ခန့်မှန်းပြောဆိုကြပါတယ်။ ယခင်နှစ်တွေတုန်းက ဘိန်းစိုက်ခွန်ဆောင်ပြီး စိုက်ပျိုးတာတောင်မှ ရဲတွေ နဲ့ စစ်တပ်တွေက ဦးဆောင်ပြီး တစ်မြို့နယ်ကို ဘိန်းခင်း ဧက ထောင်နဲ့ချီဖျက်ဆီးခဲ့ပါသေးတယ်။ ဒီနှစ်မှာတော့ အဲ့လိုအများအပြားဖျက်ဆီးတာ မတွေ့ရသေးဘူးလို့ ဆိုပါတယ်။

.

ကုလသမဂ္ဂ မူးယစ်ဆေးဝါးနဲ့ ရာ၀တ်မှုခင်းများဆိုင်ရာရုံးရဲ့ ထုတ်ပြန်ချက်အရ ၂၀၂၁ ခုနှစ် ဘိန်းစိုက်ပျိုးရာသီမှာ မြန်မာနိုင်ငံရဲ့ စိုက်ပျိုးမှု ပမာဏဟာ ဟက်တာ ၃၀၂၀၀ (ဧကပေါင်း ၇၄၆၂၄) ထိရှိတယ်လို့ သိရပါတယ်။ ၂၀၂၀ ခုနှစ်မှာ မြန်မာနိုင်ငံရဲ့ ဘိန်းစိုက်ပျိုးမှုက ဟက်တာ သုံးသောင်းအောက်သာရှိခဲ့ပေမယ့် ၂၀၂၁ ခုနှစ်မှာ ဟက်တာ သုံးသောင်းကို ပြန်ကျော်လာခဲ့ပါတယ်။

.

လက်ရှိ နိုင်ငံရေးမတည်ငြိမ်မှု အပါအဝင် ကြုံတွေ့နေရတဲ့ နိုင်ငံ့အကျပ်အတည်းကြောင့် ယခု ၂၀၂၂ ခုနှစ်မှာတော့ ဘိန်းစိုက်ပျိုးမှု ဟက်တာပေါင်း လေးသောင်းထိရောက်ရှိနိုင်တယ်လို့ ခန့်မှန်းကြပါတယ်။

.

ယခုနှစ်မှာ အခြေခံစားသောက်ကုန် မြင့်တက်ခြင်း၊ စိုက်ပျိုးရေးသွင်းအားစု အဆမတန် စျေးမြင့်တက်ခြင်း ၊ နိုင်ငံရေးမတည်ငြိမ်ခြင်းတို့ကြောင့် ဒေသအများအပြားမှာ ဘိန်းပြန်စိုက်တဲ့ရွာတွေရှိသလို အိမ်နီးချင်းထိုင်းနိုင်ငံကို သွားရောက်အလုပ်လုပ်ကိုင်သူတွေလည်း အဆမတန်ပိုများလာပါတယ်။

.

အစိုးရအဆက်ဆက်က ဘိန်းစိုက်ပျိုးမှု ပပျောက်ရေးဆိုပြီးတော့ နာမည်အမျိုးမျိုး စီမံချက်အမျိုးမျိုးနဲ့ ကြွေးကြော်ခဲ့ကြပေမယ့် လက်ရှိအချိန်ထိ ဘယ်အစိုးရကမှ ကြွေးကြော်တဲ့အတိုင်း မလုပ်နိုင်ခဲ့ကြပါဘူး။

.

“သူတို့က ဘိန်းဖျက်မယ်၊ ဖျက်မယ်ပဲပြောကြပေမယ့် ဖျက်ပြီး ဘာလုပ်စား ညာလုပ်စားဆိုပြီး ဘာမှမလုပ်ပေးနိုင်တော့ ဒီစိုက်ပျိုးမှုက အဆုံးမသတ်နိုင်တော့ဘူး” လို့ ဆီဆိုင်မြို့နယ်အရှေ့ဘက်ခြမ်းထဲက ကျေးရွာတစ်ရွာရှိ ဘိန်းစိုက်သူတစ်ဦးဖြစ်တဲ့ ခွန်စိုးသိန်းကပြောပါတယ်။

.

အဲ့ဒီခွန်စိုးသိန်းနေထိုင်တဲ့ ကျေးရွာဟာ အိမ်ခြေ ၂၀၀ နီးပါးရှိပါတယ်။ ဒါပေမယ့် ကျေးရွာထဲမှာတော့ လူငယ်တွေ အထူးသဖြင့် အပျိုလူပျိုတွေဟာ ၁၀ဦး တောင်မပြည့်တော့ပါဘူး။ အဲ့ဒီ လူငယ်တွေအကုန်လုံးဟာ ထိုင်းနိုင်ငံကို တရားမဝင် ရွေ့ပြောင်းလုပ်သားတွေအဖြစ် ရောက်ကုန်ကြတာလို့ သူကဆိုပါတယ်။

.

“စားဝတ်နေရေး၊ လူမှုရေး၊ အစစအရာရာလုံခြုံဖို့အတွက် အစားထိုးသီးနှံတွေနဲ့ လုံလောက်တဲ့ အောင်မြင်မှုမရှိတော့ ထိုင်းကို ရောက်ကုန်ကြပြီ။ ကြုံနေရတဲ့ အကြပ်အတည်းပေါင်းစုံကနေ လွတ်ဖို့ အိမ်ရဲ့ လိုအပ်ချက်ကို ဖြည့်ဆည်းနိုင်ဖို့ ထိုင်းကိုသွားကြရတာပေါ့”လို့ သူကပြောပါတယ်။

.

ဘိန်းတွေဟာ ကောင်းမွန်တဲ့အရာမဟုတ်ပေမယ့် တောင်တန်းပေါ်က သူတို့အတွက် ရွေးချယ်စရာက နည်းပါးခက်ခဲလှတာမို့ ဘိန်းစျေးအနည်းငယ် ပြန်ရှိလာချိန်မှာ ဘိန်းပြန်စိုက်ကြသူတွေလည်း များလာတာဖြစ်ပါတယ်။ ဒီဘိန်းပင်တွေဟာ အရောင်အပွင့်တွေ လှပပေမယ့် အဆိပ်ပန်းမှန်းလည်း စိုက်ပျိုးသူတွေက သိကြပါတယ်။ ဒီလိုတွေ သိနေကြပေမယ့် တောင်သူတွေအနေနဲ့ ဒီသံသရာထဲကနေ ရုန်းထွန်နိုင်ဖို့ ခက်ခဲဦးမှာလည်း အမှန်ပဲဖြစ်ပါတယ်။

.

နိုင်ငံရေး အပြောင်းအလဲနဲ့အတူ အထွေထွေ အကြပ်အတည်းကို ကျော်ဖြတ်ဖို့ ဘိန်းစိုက်တာကလည်း မျှော်လင့်ချက် တစ်ခုဖြစ်နေတယ်လို့ ပြောတဲ့တောင်သူတွေလည်းရှိနေပါတယ်။

.

“ဘိန်းစိုက်တာကလည်း ထိုင်းမသွားရအောင် ရေနစ်ခါနီး နောက်ဆုံးဆွဲလိုက်တဲ့ ကောင်ရိုးတစ်မျှင်ပဲဗျာ” လို့ ခွန်စိုးသိန်းက ပြောပါတယ်။

.