နွေဦးတော်လှန်ရေးကာလအတွင်း ကျဆုံးခဲ့သူ ၂၀၉၉ ဦးအထိရှိဟု AAPP ထုတ်ပြန်

.

စစ်ကောင်စီ အာဏာသိမ်းပြီးနောက် အရပ်သားပြည်သူများကို သတ်ဖြတ်လျက်ရှိရာ ယမန်နေ့ ဇူလိုင်လ ၂၀ ရက်အထိ ကျဆုံးသူ ၂၀၉၉ ဦး ရှိလာပြီဖြစ်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ထုတ်ပြန် ထားသည်။

.

.

အဆိုပါ စာရင်းတွင် ရှမ်းပြည်နယ်၊ တန့်ယန်းမြို့နယ်၊ ရန်ကုန်တိုင်း လှိုင်သာယာမြို့နယ်၊ တနင်္သာရီတိုင်း၊ ပုလော မြို့နယ်၊ စစ်ကိုင်းတိုင်း၊ အရာတော်မြို့နယ်များ၌ ကျဆုံးခဲ့သော အပြစ်မဲ့ပြည်သူ ၇ ဦး၏ အချက်အလက်များကို ထပ်မံထည့်သွင်းထားခြင်းဖြစ်ပြီး အမှန်တကယ် ကျဆုံးသူအရေအတွက်မှာ ပိုမိုများပြားနိုင်ကြောင်း ဖော်ပြထားသည်။

.

AAPP ၏ မှတ်တမ်းများအရ ၂၀၂၁ ခုနှစ်၊ ဖေဖော်ဝါရီလ ၁ ရက်မှ ၂၀၂၂ ခုနှစ်၊ ဇူလိုင်လ ၂၀ ရက်အထိ ချုပ်နှောင် ဖမ်းဆီးခံရသူ စုစုပေါင်း ၁၁၇၄၃ ရှိကာ ယင်းတို့အနက် ၁၃၄၄ ဦးမှာ ထောင်ဒဏ်ချမှတ်ခြင်း ခံထားရကြောင်း သိရသည်။

.

ပြစ်ဒဏ်ချမှတ်ခံထားရသူများတွင် အသက် ၁၈ နှစ်အောက် ကလေးငယ် ၂ ဦး အပါအဝင် ၇၆ ဦးမှာ သေဒဏ်ချမှတ် ခြင်း ခံထားရပြီး မျက်ကွယ်သေဒဏ်ချမှတ်ခြင်းခံထားရသူ ၄၁ ဦး အပါအဝင် ၁၂၀ ဦးမှာ မျက်ကွယ်ပြစ်ဒဏ် ချမှတ် ခံထားရသဖြင့် စုစုပေါင်း သေဒဏ်ချမှတ်ခံထားရသူ ၁၁၇ ဦး ရှိကြောင်း သိရသည်။

.

ထို့အပြင် စစ်ကောင်စီမှ မတရားချိတ်ပိတ် သိမ်းဆည်းခြင်းခံရသော နေအိမ်၊ အဆောက်အဦ စုစုပေါင်း ၆၇၈ ခုထက် မနည်း ရှိခဲ့ကြောင်းလည်း သိရသည်။

.

ဖမ်းဆီးထိန်းသိမ်း၊ တရားစွဲဆိုခံရမှုများနှင့် ကျဆုံးသူများ၏ အချက်အလက်များကို သိရှိလိုက နိုင်ငံရေးအကျဉ်းသား များကူညီစောင့်ရှောက်ရေးအသင်းသို့ ဆက်သွယ်နိုင်ပြီး ကျဆုံးအချက်အလက်များ၊ ဖမ်းဆီးချုပ်နှောင်ခံရမှု အချက်အလက်များကိုလည်း ဆက်သွယ်ပေးပို့နိုင်ကြောင်း AAPP ၏ ထုတ်ပြန်ချက်တွင် ဖော်ပြထားသည်။

.