ဝောာင်ကြီးမြို့ပေါ်၌ ပညာသင်ကြားနေသော ဆရာ/ဆရာမများ အနေဖြင့် မိမိတို့၏ လုပ်ရပ်များအား ပြန်လည် သုံးသပ်၍ ဆရာ ပီသသော ဆရာ/ဆရာမများအဖြစ်သို့ ပြန်လည် ရောက်ရှိစေလိုကြောင်း တောင်ကြီးမြို့ ပြောက်ကျားတပ်ဖွဲ့ (TGF) က ယနေ့ ဇွန်လ ၁၅ ရက်တွင် သတိပေး ထုတ်ပြန်ခဲ့သည်။
.
စာသင်ကျောင်း အချို့ရှိ ကျောင်းအုပ်/ဒုကျောင်းအုပ်များသည် ကျောင်းသားများ၊ ကျောင်းသားမိဘများ၊ CDM ဆရာ/ဆရာမများအား ခြိမ်းခြောက်ခြင်းများ ရှိနေကြောင်းနှင့် အထူးသဖြင့် ကျောင်းသားများအား မိမိတို့၏ အဆောင်တွင် မတက်ရောက်ပါက အတန်း မတင်ပေးခြင်း၊ ငွေကြေး မတတ်နိုင်သည့် ကျောင်သားမိဘများအား ခြိမ်းခြောက် ငွေတောင်းခံခြင်းများကို ကြားသိရသဖြင့် TGF က ယင်းကဲ့သို့ အသိပေးရခြင်း ဖြစ်ကြောင်း သိရသည်။
.
ဆရာ/ဆရာမများ အနေဖြင့် မိမိတို့၏ တာဝန်ဖြစ်သော ကျောင်းသား/ကျောင်းသူများအား ကျောသား၊ ရင်သား မခွဲခြားဘဲ ရင်ဝယ်သားကဲ့သို့ ပညာသင်ပေးရမည်ကို သိရှိပြီး ကျောင်းသား/ကျောင်းသူများ အပေါ်အမြတ်ထုတ်၍ စစ်ကောင်စီ၏ လက်ကိုင်တုတ် ဖြစ်နေသော ကျောင်းအုပ်၊ ဒုကျောင်းအုပ်နှင့် ဆရာ/ဆရာမများအား ဆက်လက် မလုပ်ဆောင်ရန် ထုတ်ပြန်ချက်တွင် အသိပေး ဖော်ပြထားသည်။
.
TGF အဖွဲ့ဝင်များသည် တစ်ချိန်က ကျောင်းသား/ကျောင်းသူများ ဖြစ်ခဲ့ဖူး၍ ၎င်းတို့အား ပညာသင်ကြားပေးသော ဆရာ/ဆရာမများ ရှိရာ နေရာများသို့ ထိခိုက်စေလိုသည့် အလုပ်များကို မလုပ်ဆောင်လိုခြင်းကြောင့်ယခုကဲ့သို့ အသိပေး ထုတ်ပြန်ရခြင်း ဖြစ်ကြောင်းကိုလည်း ရှင်းပြထားသည်။
.
အဆိုပါ လုပ်ရပ်များအား ထပ်မံ ကျူးလွန်ပါက ကျောင်းသားမိဘများ ကိုယ်စား လုပ်ဆောင်သင့်သည့် အရာများကို လုပ်ဆောင်ရလိမ့်မည်ဟု TGF က သတိပေးထားသည်။
.
တောင်ကြီးမြို့ ပြောက်ကျားတပ်ဖွဲ့ (TGF) အဖွဲ့ဝင်များသည် လက်ရှိတွင် တိုက်ပွဲဖြစ်ပွားရာ နေရာများတွင်ပါဝင် အားဖြည့် ကူညီပေးနေရသောကြောင့် မြို့ပေါ် Mission များအား ခေတ္တခဏ ရပ်နားထားရသော်လည်း မြို့တွင်းရှိ စစ်ကောင်စီ၏ လက်ကိုင်တုတ်ဒလန်များ၊ ပြည်သူများအပေါ် ဖိနှိပ်၍ ဂုတ်သွေးစုပ် နေသူများ၏ သတင်းအချက်အလက်များကို စုံစမ်း၍ ပြုစုထားပြီး ဖြစ်သည်ဟုလည်း ထုတ်ပြန်ချက်တွင် ဖော်ပြထားသည်။
