.
.
မြို့တော်တောင်ကြီးမှ ကျိုင်းတုံမြို့သို့ ပြေးဆွဲနေသည့် ယာဉ်လိုင်းများအနေဖြင့်
လမ်းဂိတ်ကြေး ပေးရသည့် ကုန်ကျစရိတ် များပြားလာသည့်အတွက် ပြေးဆွဲရာတွင် အခက်အခဲဖြစ်ပေါ်နေကြောင်း
သိရသည်။
.
တောင်ကြီးမှ ကျိုင်းတုံအထိ လမ်းခရီးတစ်လျှောက်တွင် ခရီးသည်တင်ယာဉ်များအတွက်
ယခင်က လမ်းကြေး ကုန်ကျစရိတ် ကျပ် ၂ သိန်းခန့်ရှိခဲ့ရာမှ ယခုအခါ ဂိတ်ပေါင်းစုံ လမ်းကြေးကုန်ကျစရိတ်
စုစုပေါင်း ၅ သိန်းကျော် အထိ ကုန်ကျနေခြင်းဖြစ်ကြောင်း ယာဉ်မောင်းများထံက သိရသည်။
.
“အရင်တုန်းက လမ်းကြေးက တစ်ကြောင်းစာဆိုရင် ၂ သိန်းနဲ့ လောက်တယ်။
အခုကျတော့ ပုံစံမျိုးစုံနဲ့ ကောက်နေတဲ့ ဂိတ်တွေက များလာတော့ ကျိုင်းတုံကနေ တောင်ကြီးကို
ပြန်လာတာ ၅ သိန်းကျော် ကုန်တယ်။ ဆွဲရတာ ဘယ်လိုမှ အဆင်မပြေတော့ဘူး” ဟု ယာဉ်မောင်းတစ်ဦးက
ပြောသည်။
.
ယင်းကဲ့သို့ လမ်းဂိတ်ကြေး ကုန်ကျမှု ပိုမိုများပြားလာနေသည့်အပြင်
စက်သုံးဆီဈေးနှုန်းမှာလည်း နေ့စဉ် မြင့်တက်လာ နေသည့်အတွက် ယာဉ်လိုင်းအချို့ ပြေးဆွဲမှု
ရပ်နားထားရပြီး ခရီးသည်နှင့် ကုန်စည်ရရှိမှုအပေါ် မူတည်၍ ပြေးဆွဲနေရ သဖြင့် ယခင်လို
နေ့စဉ် ပြေးဆွဲနိုင်ခြင်းမရှိတော့ဘဲ တစ်လလျှင် ၃ ခေါက်ခန့်သာ ပြေးဆွဲပေးနေရကြောင်း
ယာဉ်လိုင်း ဂိတ်ပိုင်ရှင်တစ်ဦးကလည်း ပြောဆိုခဲ့သည်။
.
