တောင်ကြီးတွင် ရဲစခန်းအတွင်းရပ်နားထားသော ဆိုင်ကယ်ပင် ခိုးယူခံနေရသည့်အတွက် မြို့တော်လုံခြုံရေး စိုးရိမ်စရာ ဖြစ်နေ - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။ contact; kanbawzatai.editor@gmail.com

တောင်ကြီးတွင် ရဲစခန်းအတွင်းရပ်နားထားသော ဆိုင်ကယ်ပင် ခိုးယူခံနေရသည့်အတွက် မြို့တော်လုံခြုံရေး စိုးရိမ်စရာ ဖြစ်နေ

.

တောင်ကြီးမြို့ပေါ်ရှိ နယ်မြေရဲစခန်း (အမှတ်-၂ ရဲစခန်း) ဝင်းအတွင်း ရပ်နားထားသော ဆိုင်ကယ်ပင် ခိုးယူခံနေရသည့် အတွက် မြို့တော်လုံခြုံရေးမှာ စိုးရိမ်စရာဖြစ်နေသည်ဟု ဒေသခံများက ပြောဆိုလျက်ရှိသည်။

.

.

တောင်ကြီးမြို့၊ မင်္ဂလာဦးရပ်ကွက်၊ နယ်မြေရဲစခန်းဝင်းအတွင်း ရပ်နားထားသော ရဲလိုင်းခန်းနေ ဝန်ထမ်းတစ်ဦး၏ မော်တော်ဆိုင်ကယ်တစ်စီး ဇွန်လ ၂၈ ရက်၊ ညပိုင်းက ခိုးယူခံခဲ့ရခြင်းဖြစ်ကြောင်း သိရသည်။

.

“ရဲစခန်းထဲ ရပ်ထားတဲ့ ဆိုင်ကယ်တောင် အခိုးခံရတာဆိုတော့ ပြည်သူလူထုရဲ့ လုံခြုံရေးက အတော်လေး စိုးရိမ်စရာ ကောင်းနေပါပြီ။ အာဏာသိမ်းပြီးနောက်ပိုင်း မြို့ပေါ်မှာ ခိုးမှုတွေ၊ ဖောက်ထွင်းမှုတွေ မကြာခဏ ဖြစ်နေတယ်။ ဖမ်းမိ တာလည်း မရှိသလောက်ဖြစ်နေတော့ ပြည်သူလူထုက ကိုယ့်တာဝန်ကိုယ်ယူရမယ့်သဘောမျိုး ဖြစ်နေတယ်” ဟု တောင်ကြီးဒေသခံတစ်ဦးက ၎င်း၏အမြင်ကို ပြောသည်။

.

မြို့တော်တောင်ကြီးတွင် မော်တော်ဆိုင်ကယ် ခိုးယူမှုအပြင် လက်ကိုင်တယ်လီဖုန်း ခိုးယူမှုမှအစ မော်တော်ယာဉ် ခိုးယူခံရမှုများလည်း ရှိနေပြီး မြို့တော်လုံခြုံရေး ဆောင်ရွက်မှု အားနည်းနေကြောင်း ပြည်သူများက ဝေဖန်ပြောဆို နေကြခြင်းဖြစ်သည်။

.

စစ်ကောင်စီ အာဏာသိမ်းပြီးနောက် ရှမ်းပြည်နယ်အတွင်းရှိ မြို့ရွာ ဒေသအသီးသီးတွင် လောင်းကစားဝိုင်းများ၊ ဂိမ်းဆိုင်များ ပေါ်ပေါ်ထင်ထင် ဖွင့်လှစ်ကာ လောင်းကစားမှုများ ပြုလုပ်လာကြခြင်းကြောင့် ယင်းကဲ့သို့ ဒုစရိုက်မှုများ ထူပြောလာရခြင်းဖြစ်ကြောင်း ဒေသခံများက ပြောဆိုကြသည်။

.


Journal Download

Photo of three cats