"ဝ" လူငယ်ကို သေလုနီးပါး ရိုက်နှက်ပြီး သေဒဏ် ချမှတ်လိုက်သည့် အပေါ် လုံးဝ လက်မခံဘဲ ဆန့်ကျင်ကြောင်း "ဝ"လူငယ်ကွန်ရက် ထုတ်ပြန်

တာချီလိတ်မြို့၌ လက်ဗစ်ဗုံး ပစ်ထည့် ဖောက်ခွဲသည်ဟု စစ်ကောင်စီမှ စွပ်စွဲဖမ်းဆီးပြီး သေဒဏ်ချမှတ်ခံရသည့် "ဝ"လူငယ်အား သေလုနီးပါး ရိုက်နှက်ပြီး သေဒဏ် ချမှတ်လိုက်သည့် အပေါ် လုံးဝ (လုံးဝ) လက်မခံဘဲ ဆန့်ကျင်ကြောင်း "ဝ"လူငယ်ကွန်ရက် - Progressive Wa Youth Network က ထုတ်ပြန်သည်။

.

"ဝ"လူငယ် အိုက်ဆိုင်မိန်းကို ဖေဖော်ဝါရီလ ၂ ရက်တွင် စစ်ကောင်စီက မတရားစွပ်စွဲဖမ်းဆီး၍ ဝန်ခံလာစေရန် စရဖက လူသားမဆန်စွာ သေလုမျောပါး ရိုက်နှက် နှိပ်စက်ခဲ့ကြောင်းနှင့် တာချီလိတ်ခရိုင်တရားရုံးက ဇွန်လ ၂ ရက်တွင် သေဒဏ်ချမှတ်လိုက်သဖြင့် အလွန်အံ့ဩ တုန်လှုပ်မိကြောင်း အဆိုပါထုတ်ပြန်ချက်တွင် ဖော်ပြထားသည်။

.

အပြစ်မဲ့ "ဝ" လူငယ် တစ်ဦးအား ယခုကဲ့သို့ မတရားစွပ်စွဲ ဖမ်းဆီးရိုက်နှက်ခဲ့ကာ သေဒဏ်ကျခံရမည့်အရေးကို "ဝ" ဟူသော အမည်နာမ ခံယူထားသည့် အဖွဲ့အစည်းများ အနေဖြင့် မသက်ဆိုင်သကဲ့သို့ မနေဘဲ ပါဝင် ဖြေရှင်းပေးကြရန် "ဝ"လူငယ်ကွန်ရက်၏ ထုတ်ပြန်ချက်၌ တောင်းဆိုထားသည်။

.

တာချီလိတ်မြို့တွင် ဖေဖော်ဝါရီလ ၁ ရက်က ပြုလုပ်ခဲ့သည့် အာဏာသိမ်း စစ်ကောင်စီအား ထောက်ခံပွဲ၌ လက်ပစ်ဗုံး ပေါက်ကွဲမှု ဖြစ်ပွားခဲ့ရာ စစ်ကောင်စီထောက်ခံသူ ၄ ဦး သေဆုံးပြီး ၃၄ ထိခိုက် ဒဏ်ရာရခဲ့ကြောင်း သိရသည်။