ကရင်အမျိုးသားအစည်းအရုံး (KNU)၊ တပ်မဟာ(၁) နယ်မြေ၌ ပြီးခဲ့သည့် ၂၀၂၂ ခုနှစ်၊ မေလအတွင်း အာဏာသိမ်း စစ်ကောင်စီ ၊ BGF ပူးပေါင်းတပ်ဖွဲ့များနှင့် ကရင့်အမျိုးသား လွတ်မြောက်ရေးတပ်မတော် (KNLA/KNDO) တပ်ဖွဲတို့ အကြား ထိတွေ့ပစ်ခတ်မှုပေါင်း ၄၁ ကြိမ် ဖြစ်ပွားခဲ့သည်ဟု KNU က ယနေ့ ဇွန်လ ၂ ရက်တွင် ထုတ်ပြန်သည်။
.
အဆိုပါ တိုက်ပွဲများအတွင်း စစ်ကောင်စီဘက်မှ
၇၁ ဦး သေဆုံးကာ ၅၃ ဦး ထိခိုက် ဒဏ်ရာရ၍ စစ်ကား ၅ စီး ပျက်စီးခဲ့ကြောင်းနှင့် KNLA/KNDO
ပူးပေါင်းတပ်ဖွဲ့ဘက်မှ ၁၁ ဦး ထိခိုက် ဒဏ်ရာရကာ ၂ ဦး ကျဆုံးခဲ့ကြောင်း ယင်းထုတ်ပြန်ချက်အရ
သိရသည်။
.
ထို့အတူ စစ်ကောင်စီတပ်၏ လေယာဉ်ဖြင့်
၂ ကြိမ် လာရောက် ပစ်ခတ်ခဲ့မှုကြောင့် အရပ်သားပြည်သူများ၏ နေအိမ် ၁၁ လုံး မီးလောင် ပျက်စီးခဲ့ရသည့်အပြင်
စစ်ကောင်စီ၏ လက်နက်ကြီး ပစ်ခတ်မှုများကြောင့် အရပ်သား ပြည်သူ သေဆုံးသူ ၂ ဦး၊ ဒဏ်ရာ
ရရှိသူ ၃ ဦး ရှိကြောင်းလည်း KNU က ဆိုသည်။
.
စစ်ကောင်စီ တပ်များသည် ဒေသခံပြည်သူများထံမှ
ငွေကျပ် သိန်း ၂၀၀ ကျော်ကို အတင်းအဓမ္မ ယူဆောင်ခြင်း၊ အရပ်သား ၂၄ ဦးအား ပေါ်တာအဖြစ်
အဓမ္မ ဖမ်းဆီးခေါ်ဆောင်ခြင်းနှင့် ဒေသခံပြည်သူများ၏ ၁၃ ဧက ရှိ ရာဘာခြံ ၃ ခြံကို မီးရှို့
ဖျက်ဆီးခြင်း၊ အရပ်သားပြည်သူများ၏ ကျွဲ/နွား ၈ ကောင်အား ပစ်သတ်ခြင်းနှင့် စားသောက်ကုန်၊
အခြားပစ္စည်း အများအပြားကိုလည်း ယူဆောင်၊ ဖျက်ဆီးမှုများ ကျူးလွန်ခဲ့ကြောင်းကိုလည်း
KNU ၏ ထုတ်ပြန်ချက်တွင် ဖော်ပြထားသည်။
