ရိက္ခာ ပြန်ယူသော စစ်ဘေးရှောင် ပြည်သူများအား လုံခြုံရေး ယူပေးနေသည့် မိုးဗြဲပြည်သူ့ကာကွယ်ရေးတပ် (MB PDF) နှင့် စစ်ကောင်စီတပ်တို့ မိုးဗြဲမြို့အနီးရှိ ဝှါရီဆူးပလိုင်ရွာ၌ မေလ ၂၂ ရက်၊ ညနေပိုင်းတွင် တိုက်ပွဲ ဖြစ်ပွားခဲ့သည်ဟု သိရသည်။
.
ဝှါရီဆူးပလိုင်ရွာမှ ရွာခံ ပြည်သူများသည်
စစ်ဘေးရှောင် နေရသည့်ကာလ ကြာလာသည်နှင့် အမျှ အစားအသောက်များ ခက်ခဲလာသောကြောင့် ၎င်းတို့၏ နေအိမ်များသို့ စားနပ်ရိက္ခာများ ပြန်ယူလိုကြောင်း အကူအညီ တောင်းခံလာသည့်အတွက် လုံခြုံရေးအဖြစ် လိုက်ပါ ဆောင်ရွက်စဥ် ရွာအတွင်း တပ်စွဲထားသော စစ်ကောင်စီတပ်များနှင့် မိနစ် ၃၀ ခန့် ထိတွေ့ တိုက်ပွဲ ဖြစ်ပွားခဲ့သည်ဟု MB PDF က ထုတ်ပြန်ခဲ့ခြင်း ဖြစ်သည်။
.
ယင်းကဲ့သို့ တိုက်ပွဲ ဖြစ်ပွားခဲ့သော်လည်း စစ်ဘေးရှောင် ပြည်သူများသည် လိုအပ်သေ ရိက္ခာများကို အချိန်မီယူဆောင်နိုင်ခဲ့ကြောင်းလည်း သိရသည်။
.
အဆိုပါ တိုက်ပွဲအတွင်း စစ်ကောင်စီတပ်ဘက်မှ ထိခိုက်ကျဆုံးမှုများ ရှိနိုင်ပြီ အရေအတွက်ကို အတည်မပြုနိုင်သေးကြောင်းနှင့် MBPDF ဘက်မှ ရဲဘော်တစ်ဦး အသေးစား ဒဏ်ရာသာ ရရှိခဲ့ပြီး ပြန်လည်ဆုတ်ခွာလာနိုင်ခဲ့သည်ဟု ထုတ်ပြန်ချက်တွင် ဖော်ပြပါရှိသည်။
