စက်သုံးဆီ ပြတ်လပ်နိုင်သည် ဟူသော သတင်းကြောင့် လက်လီအရောင်းဆိုင်များတွင် ဝယ်ယူ စုဆောင်းမှုများ ရှိလာ

မြန်မာနိုင်ငံ အတွင်းသို့ စက်သုံးဆီ အဓိက တင်သွင်းဖြန့်ဖြူး ရောင်းချနေသည့် စက်သုံးဆီ အရောင်းဆိုင်ကြီးများတွင် Ron 92 နှင့် 95 ဓါတ်ဆီ ပြတ်လပ်နိုင်သည် ဟူသော သတင်းများ ထွက်ပေါ်လာပြီးနောက် တောင်ကြီးမြို့ပေါ်ရှိ စက်သုံးဆီ လက်လီရောင်းချသည့် ဆိုင်ငယ်များတွင် စက်သုံးဆီ ဝယ်ယူ စုဆောင်းမှုများ ပြုလုပ်လာနေကြောင်း သိရသည်။

“ ဆီတင်သွင်းတဲ့ ကုမ္ပဏီကြီးတွေမှာ 92, 95 တွေ ပြတ်မယ်လို့ ကြားနေရတယ်။ အဲဒါကြောင့် အလုပ်ပျက်မသွားအောင် ရသလောင် ဝယ် စုထားတာပါ။ အများကြီး ဝယ်လို့တော့ မရဘူး။ အခြေအနေ စောင့်ကြည့်ရမှာပါပဲ။ ဈေးကတော့ မတက်ဘူးပဲ။ ” ဟု တောင်ကြီးမြို့ပေါ်မှ စက်သုံးဆီ လက်လီရောင်းချသူ တစ်ဦးက ပြောသည်။

.

ပြည်တွင်းသို့ စက်သုံးဆီ အဓိက တင်သွင်းရောင်းချနေသည့် Denko ကုမ္ပဏီတွင် ဆက်လက် ရောင်းချရန် လက်ကျန် နည်းပါးနေသည့်အတွက် မြို့ကြီးအချို့ကိုသာ ရောင်းချနိုင်မည် ဖြစ်ပြီး ကျန်မြို့များရှိ ဆိုင်ခွဲ ၃၈ ခုတွင် လက်ကျန် ကုန်ပါက ရောင်းချမှု ရပ်နားထားရမည့် အခြေအနေတွင် ရှိနေကြောင်း သတင်းများ ထွက်ပေါ်ခဲ့ခြင်း ဖြစ်သည်။

.

ယင်းကဲ့သို့ သတင်းများ ထွက်ပေါ်ပြီးနောက် Denko ကုမ္ပဏီက "စက်သုံးဆီတင် သင်္ဘောများ ရောက်ရှိပြီး ဖြစ်ပါ၍ စက်သုံးဆီများကို အခက်အခဲ မရှိ အပြည့်အဝ ရောင်းချပေးလျက် ရှိပါကြောင်း" ဟု မေလ ၁၉ ရက် နေ့လယ်ပိုင်းတွင် ကြေညာခဲ့သည်။

.

" ဆီက ပြတ်မယ် ပြောလိုက်၊ မပြတ်ဘူး ပြောလိုက်နဲ့။ တကယ် ပြတ်ရင်လည်း ဘာမှ လုပ်လို့ မရတော့ ကြိုပြီး ဝယ် စုတာ မမှားနိုင်ဘူး။ ဒါပေမဲ့လည်း မီးဘေးအန္တရာယ်ကို သတိပြုဖို့တော့ လိုတာပေါ့။ " ဟု မြို့ခံ တစ်ဦးက ဆိုသည်။

.

ပြီးခဲ့သည့် ဧပြီလ အတွင်းကလည်း ယခုကဲ့သို့ပင် စက်သုံးဆီ ပြတ်လပ်နိုင်သည် ဆိုသည့် သတင်းကြောင့် စက်သုံးဆီ အရောင်းဆိုင်ကြီးများ အပါအဝင် လက်လီဆိုင်များတွင် တိုးဝှေ့ဝယ်ယူခဲ့ကြသဖြင့် 92 တစ်လီတာလျှင် ၃၀၀၀ ကျပ်အထိ ဈေး မြင့်တက်ခဲ့ဖူးသည်။