အာဏာသိမ်း စစ်ကောင်စီခန့် ရှမ်းပြည်နယ်ဝန်ကြီးချုပ် ရောက်ရှိနေသည့် တာချီလိတ်မြို့တွင် အောင်မြတ်ခန်းမ၌ ပန်းခင်းစီမံချက်အဖြစ် မှတ်ပုံတင်ပေးအပ်ပွဲ ပြုလုပ်အပြီး ၁၅ မိနစ်ခန့် အကြာ၌ ဗုံးပေါက်ကွဲမှု ဖြစ်ပွားခဲ့ကြောင်း သိရသည်။
.
"ဟုတ်တယ်၊ ခဏက ပေါက်ကွဲမှု ဖြစ်သွားတယ်။ ခန်းမရဲ့ အရှေ့ကတော့ မဟုတ်ဘူး။ အနောက်ပေါက်မှာ ကွဲတာ။ လက်ပစ်ဗုံးနဲ့ပစ်သွားတာ။ စနက်တံ တွေ့တယ်"ဟု အမည်မဖော်လိုသူ တစ်ဦးက ပြောသည်။
.
အောင်မြတ်ခန်းမ၏ အနောက်ဘက်ပေါက်၌ ယနေ့ ဇန်နဝါရီလ ၉ ရက်၊ နံနက် ၁၁ နာရီခွဲကျော်ခန့်က ပေါက်ကွဲခြင်း ဖြစ်ပြီး ပေါက်ကွဲမှုကြောင့် လူထိခိုက်မှု မရှိသော်လည်း ဆိုင်ကယ်တစ်စီး ပျက်စီးသွားကြောင်း သိရသည်။
.
"အစောက အောင်မြတ်ခန်းမနားမှာ လုံခြုံရေးတွေ ချထားတာတွေ့လိုက်သေးတယ်။ လမ်းမကြီးပေါ်တော့ ရှင်းနေတယ်။ အသံက အတော်ကျယ်တယ်။ အဝေးကြီးကနေတောင် ကြားလိုက်ရတယ်။ (၁၁)နာရီ (၄၇)မှာ အသံကြားရတာပဲ။"ဟု ဆန်ဆိုင်း(ခ)ရပ်ကွက်တွင် နေသူတစ်ဦးက ပြောသည်။
.
အဆိုပါ ပေါက်ကွဲမှု ဖြစ်ပွားပြီးနောက် စစ်ကောင်စီတပ်နှင့် ရဲတို့ ရောက်ရှိလာပြီး စစ်ဆေးမှုများ ပြုလုပ်ကာ CCTV ရှိနိုင်မည့် နေရာများကို ရှာကြံ စစ်ဆေးနေကြောင်း နှင့် တာချီလိတ်မြို့မရဲစခန်းမှ နယ်ထိန်းခေါင်းဆောင် ရဲအုပ် မင်းမင်းထွန်းနှင့် နယ်ထိန်းတပ်ဖွဲ့ဝင်များက လိုက်လံရှာဖွေနေပြီး မြို့တွင်း အဖွဲ့စုံဖြင့်ပါ စစ်ဆေးမှုများ လုပ်နေသည်ဟု သိရသည်။
.
ထို့အတူ ယမန်နေ့ ဇန်နဝါရီလ ၈ ရက်၊ ည ၁၀ နာရီခန့်တွင်လည်း တာချီလိတ်မြို့ ဝမ်ကောင်းရပ်ကွက်အပိုင်း ရီဂျီးနားဂေါက်ကွင်းသွားလမ်းဘေးရှိ အာဏာသိမ်းစစ်ကောင်စီ၏ ရှမ်းပြည်နယ် လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးလှဦး၊ သယံဇာတရေးရာဝန်ကြီး ဦးစိုင်းလိတ်၊ လူမှုရေးဝန်ကြီး ဦးအောင်မြင့် နှင့်အဖွဲ့ ညအိပ်သည့် ဇန်းမွန်ဟိုတယ် နှင့် ဆေးရုံအနီးတွင် ဗုံးပေါက်ကွဲမှု ဖြစ်ပွားခဲ့ကြောင်း သိရသည်။
.
လောင်းကစားနှင့် အပျော်အပါး ပေါများသည့် တာချီလိတ်မြို့သို့ အာဏာသိမ်းစစ်ကောင်စီ၏ လက်အောက်ခံ ပြည်ထောင်စုဝန်ကြီးမှ ပြည်နယ်ဝန်ကြီးများအထိ လာရောက်လေ့ရှိကြောင်း သိရသည်။
