ပြည်နယ်အဆင့် ရုံးစိုက်ရာ မြို့တော် တောင်ကြီး၏ မြို့ပေါ်ရပ်ကွက်များ အတွင်း၌ လောင်းကစားဝိုင်း (ငါးမန်းဂိမ်း) များကို စစ်ကောင်စီ၏ လက်အောက်ခံဌာနများက ဖွင့်လှစ်ခွင့် ပြုထားခြင်းကြောင့် ခိုးမှုများ ဆက်တိုက် ဖြစ်ပေါ်နေကြောင်း သိရသည်။
.
လောင်းကစားဝိုင်း (ငါးမန်းဂိမ်း) ပြုလုပ်၍ ငွေကြေး ဆုံးရှုံးခဲ့ရမှုကြောင့် ပြည်သူ အချို့မှာ ဘဝ ပျက်ရသည်အထိ ဖြစ်ခဲ့ရကာ တောင်ကြီးမြို့ပေါ်တွင်လည်း ဆိုင်ကယ် အပါအဝင် ပစ္စည်း ပျောက်ဆုံးမှုများ မြင့်တက်နေရခြင်း ဖြစ်ကြောင်း သိရသည်။
.
" ငါးမန်းဂိမ်းဆိုင်တွေ အများကြီးပဲ။ ခင်ဗျားတို့ မီဒီယာတွေမှာလည်း တာဝန်ရှိတယ်။ သတင်းဌာနတွေမှာ တင်ပြသင့်တယ်။ ပြည်သူတွေ တကယ်ဒုက္ခ ရောက်ကုန်ပြီ။ " ဟု ဒေသခံ တစ်ဦးက ပြောသည်။
.
စစ်အာဏာ သိမ်းမှု ဖြစ်ပေါ်ပြီးနောက် သတင်းသမားများ ဖမ်းဆီးခံထားရခြင်း၊ ထွက်ပြေးတိမ်းရှောင် နေရခြင်းဖြင့် သတင်းမီဒီယာလွတ်လပ်ခွင့် ဆုံးရှုံးခဲ့ရခြင်း အပေါ် အခွင့်ကောင်း ရယူ၍ စစ်ကောင်စီ လက်အောက်ခံ အဖွဲ့များသည် လောင်းကစားဝိုင်း (ငါးမန်းဂိမ်း)များကို လာဘ်ငွေ ရယူ၍ ဖွင့်လှစ်ခွင့် ပြုထားခြင်း ဖြစ်သည်။
.
လောင်းကစားဝိုင်း (ငါးမန်းဂိမ်း) ဖွင့်လှစ်ထားသည့် ရပ်ကွက်များမှာ ကန်အောက်၊ စျေးပိုင်း၊ ပြည်တော်သာ၊ မင်္ဂလာဦးနှင့် စဝ်စံထွန်းရပ်ကွက်များ ဖြစ်ပြီး ကျန်ရပ်ကွက်များတွင်လည်း ဖွင့်လှစ်ထားသည်ဟုလည်း မြို့ခံများထံမှ သိရသည်။
.
" တောင်ကြီးမှာ ငါးဂိမ်းတွေ ဖွင့်နေတာကြတော့ ဘာလို့ သတင်းမရေးတာလည်းဗျ။ မီဒီယာကြေးယူထားလို့လားဗျ။ " ဟု ဒေသခံ တစ်ဦးက မေးခွန်း ထုတ်သည်။
.
တောင်ကြီးမြို့ပေါ်၌ ယခင်က အဆိုပါ လောင်းကစားဝိုင်း (ငါးမန်းဂိမ်း)များ ဖွင့်လှစ်ခဲ့ဖူးသော်လည်း သတင်းမီဒီယာများ၏ သတင်းထုတ်လုပ်ရေးသား ဖော်ပြမှုကြောင့် ပိတ်သိမ်းထားရာမှ စစ်အာဏာရှင်ခေတ်တွင် ပြောင်ပြောင်တင်းတင်း ပြန်လည် ဖွင့်လှစ်လာကြခြင်း ဖြစ်သည်။
.
စစ်အာဏာသိမ်းမှု အလိုမရှိကြောင်း ပြည်သူများ ဆန္ဒပြခြင်းကို သတင်းရေး ဖော်ပြခဲ့မှုအား အကြောင်းပြု၍ ကမ္ဘောဇတိုင်း သတင်းသမားများ အပါအဝင် သတင်းမီဒီယာသမားအချို့ကို အာဏာသိမ်း စစ်ကောင်စီက ဖမ်းဆီး ထောင်ချကာ ပြည်နယ်အတွင်းရှိ သတင်းဌာန တည်ထောင်သူများ၊ အယ်ဒီတာများနှင့် သတင်းသမား အများစုကိုလည်း အမှုဖွင့်ထားဆဲ ဖြစ်သည်။
