ကရင်နီ (ကယား)ပြည်နယ် ဒီးမော့ဆိုမြို့နယ်၌ ယမန်နေ့ ဇန်နဝါရီလ ၂၃ ရက်က တိုက်ပွဲများ ဆက်လက် ဖြစ်ပွားခဲ့ပြီး ပြည်သူနေအိမ် ၉ လုံး စစ်ကောင်စီတပ်၏ မီးရှို့ဖျက်စီးမှုကို ခံရသည်ဟု ကရင်နီအမျိုးသားများကာကွယ်ရေးတပ် (KNDF) ၏ ထုတ်ပြန်ချက်အရ သိရသည်။
.
ဒီးမော့ဆိုမြို့နယ်၊ စံပြ (၆) မိုင်ကျေးရွာအုပ်စု၊ ဟိုဖိတ်ကျေးရွာနှင့် စိုက်ကွင် (၂) ကျေးရွာတို့တွင် စစ်ကောင်စီတပ်က စစ်ကြောင်းထိုးလာသဖြင့် ၁၀ နာရီကြာ တိုက်ပွဲဖြစ်ပွားခဲ့ခြင်း ဖြစ်ပြီး တိုက်ပွဲအတွင်း စစ်ကောင်စီဘက်မှ ထိခိုက်ကျဆုံးမှုများပြီး KNDF ဘက်က ရဲဘော်တစ်ဦး ထိခိုက်သည်ဟု KNDF က ထုတ်ပြန်ခဲ့ခြင်း ဖြစ်သည်။
.
ထို့အတူ စစ်ကောင်စီတပ်သည် ဟိုဖိတ်၊ သပြေတောနှင့် စိုက်ကွင်း (၂) ကျေးရွာအတွင်းရှိ နေအိမ် ၉ လုံးကို မီးရှို့ဖျက်စီးခဲ့ကြောင်းနှင့် ဇန်နဝါရီလ ၂၂ ရက်ကလည်း ယင်းကျေးရွာများ၌ ဖြစ်ပွားခဲ့သည့် တိုက်ပွဲအတွင်းတွင် ဒေသခံ အရပ်သားပြည်သူများကို ဖမ်းဆီး၍ ၂ ဦးကို စစ်ကောင်စီတပ်က သတ်ဖြတ်ခဲ့သည်ဟု ဖော်ပြထားသည်။
