ဘဏ်များက ကျပ်ငွေဖြင့် ထားရမည့် အနည်းဆုံး သီးသန့်ငွေ လိုအပ်ချက် တွက်ချက်မှုပုံစံကို ပြင်ဆင်သတ်မှတ်

ဘဏ်များက မြန်မာ ကျပ်ငွေဖြင့် ထားရှိရမည့် အနည်းဆုံးသီးသန့်ငွေ လိုအပ်ချက် အချိုးအား ဘဏ်များ၏ စာရင်းရှင်အပ်ငွေ (CAB) အပြင် ဘဏ်များရှိ လက်ဝယ်ရှိ ငွေသား (Cash at Bank) ကို ထည့်သွင်း တွက်ချက်ရန် စစ်ကောင်စီ၏ ဗဟိုဘဏ်က ပြင်ဆင်သတ်မှတ်ခဲ့‌ကြောင်း သိရသည်။

.

မြန်မာကျပ်ငွေဖြင့် ထားရှိရမည့် အနည်းဆုံး သီးသန့်ငွေ လိုအပ်ချက် အချိုး ၃ ရာခိုင်နှုန်း၏ ၇၅ ရာခိုင်နှုန်း (၂ ဒသမ ၂၅ ရာခိုင်နှုန်း) အား ဘဏ်များ၏ စာရင်းရှင်အပ်ငွေ (CAB) ဖြင့် ထားရှိရန်နှင့် အနည်းဆုံး သီးသန့်ငွေ လိုအပ်ချက် အချိုး ၃ ရာခိုင်နှုန်း၏ ၂၅ ရာခိုင်နှုန်း (၀ ဒသမ ၇၅ ရာခိုင်နှုန်း) အား ဘဏ်များ လက်ဝယ်ရှိ ငွေသား (Cash at Bank) ဖြင့် ထားရှိရန် ပြင်ဆင်သတ်မှတ်ခဲ့ခြင်း ဖြစ်သည်ဟု သိရသည်။

.

စစ်ကောင်စီ၏ ဗဟိုဘဏ်သည် ယင်းကဲ့သို့ ပြင်ဆင်သတ်မှတ်မှုအား နိုဝင်ဘာလ ၂၅ ရက်တွင် ညွှန်ကြားချက်အမှတ် (၁၉/၂၀၂၁)ဖြင့် ထုတ်ပြန်ခဲ့ခြင်း ဖြစ်သည်။

.

အဆိုပါ အနည်းဆုံး သီးသန့်ငွေလိုအပ်ချက် တွက်ချက်မှု ပုံစံသစ်အား ဒီဇင်ဘာ ၈ ရက်မှ ၂၀၂၂ ခုနှစ်၊ ဇန်နဝါရီ ၄ ရက်အထိ ထိန်းသိမ်းမှုကာလမှ စတင် ဆောင်ရွက်မည် ဖြစ်ပြီး ၆ လ ယာယီ အသုံးပြုသွားမည် ဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

.

ဘဏ်သည် ထိန်းသိမ်းမှုကာလ နောက်ဆုံးရက်တွင် ပျမ်းမျှစာရင်းရှင်အပ်ငွေ (Average CAB) အရလည်းကောင်း၊ ပျမ်းမျှ လက်ဝယ်ရှိငွေသား (Average Cash) အရ လည်းကောင်း၊ သတ်မှတ်ရာခိုင်နှုန်းကို ပြည့်မီမှု မရှိပါက အဆိုပါဘဏ်အား အနည်းဆုံးသီးသန့် ငွေလိုအပ်ချက်လိုက်နာမှု မရှိသော ဘဏ်အဖြစ် သတ်မှတ်၍ ဗဟိုဘဏ်၏ ဒဏ်ကြေးဆိုင်ရာ ညွှန်ကြားချက် (၁၂/၂၀၁၆) ပါအတိုင်း ဒဏ်ကြေးပေးဆောင်စေမည် ဖြစ်ကြောင်းလည်း ထုတ်ပြန်ချက်တွင် ဖော်ပြ ပါရှိသည်။

.

လက်ရှိ မြေပြင် အခြေအနေများတွင် ဘဏ်များ၌ အပ်နှံထားရှိသော ငွေစာရင်း ပိုင်ရှင်များသည် မိမိပိုင် ငွေကြေးကို လွယ်လင့်တကူ ထုတ်ယူနိုင်မှု မရှိကြဘဲ ငွေကြေးပိုင်းဆိုင်ရာ အခက်အခဲ မျိုးစုံကို ရင်ဆိုင်နေကြရသည်။