Stay at Home သတ်မှတ်ထားခြင်းမှ ပယ်ဖျက်ပြီးနောက် တောင်ကြီးမြို့နယ် အတွင်းရှိ ဈေးများ အားလုံးကို ယနေ့ နိုဝင်ဘာလ ၂၅ ရက်၊ ညနေပိုင်းမှ စတင်၍ ပြန်လည် ဖွင့်လှစ်ခွင့် ပြုပြီ ဖြစ်ကြောင်း သိရသည်။
.
" အစည်းအဝေးမှာတော့ ဆုံးဖြတ်လိုက်ပြီ။ ဒီနေ့ကနေ စ ပြီးတော့ အကုန် ဖွင့်ခွင့်ပြုလိုက်တယ်။ ဒီညမှာ ကျွန်တော်တို့ ကြော်ငြာစာ ထုတ်ပါမယ်။ ဈေးတွေ အားလုံး၊ ပန်းခြံ၊ ကလေးကစားကွင်းအားလုံး၊ ကုန်စုံဆိုင်တို့၊ စားသောက်ဆိုင်တို့၊ ကုန်တိုက်တို့ အကုန်လုံးကို ပြန် ဖွင့်ခွင့်ပြုပါတယ်။" ဟု တောင်ကြီးမြို့နယ် စည်ပင်သာယာရေးဌာန အမှုဆောင်အရာရှိ ဦးနေလင်း က ပြောသည်။
.
ဈေး ရောင်းချသူများ အနေဖြင့် COVID-19 ရောဂါ ကာကွယ်ရေးဆိုင်ရာ စည်းကမ်းချက်များအား တိကျစွာ လိုက်နာရမည့် အပြင် ဆိုင်ပိုင်ရှင်များ၊ အလုပ်သမားများ အားလုံးသည် COVID-19 ကာကွယ်ဆေး ထိုးနှံပြီးကြောင်း လက်မှတ် ရှိရမည် ဖြစ်ကာ ကာကွယ်ဆေးကိုလည်း ပုံမှန် ထိုးနှံပေးမည် ဖြစ်ကြောင်းနှင့် စားသောက်ဆိုင် ကုန်စုံဆိုင်များမှာ ည ၈ နာရီထိသာ ဆိုင်ထိုင် ရောင်းချခွင့် ရမည် ဖြစ်ကြောင်းလည်း ၎င်းထံက သိရသည်။
.
ထို့အတူ ညဈေးများနှင့် ပတ်သက်၍ ဦးနေလင်း က " ညဈေးတွေလည်း သူတို့ကို ပြင်ဆင်ချိန် ပေးပြီးရင် ဖွင့်ခွင့် ပေးသွားပါမယ်။ အချိန်ကတော့ ည ၈ နာရီ၊ ၉ နာရီလောက်ထိ ခွင့်ပြုဖို့ စီစဉ်ထားတယ်။ အချိန်ကိုတော့ တရားဝင်ညွှန်ကြားချက် ထုတ်ပြန်မှာပါ။ " ဟု ပြောသည်။
.
တောင်ကြီးမြို့နယ်အတွင်း၌ COVID-19 ကူးစက်ပျံ့နှံ့မှုကြောင့် ဈေးများ၊ ကုန်တိုက်များ၊ ပန်းခြံများ၊ ကလေးကစားကွင်းများ၊ တည်းခိုခန်းများ၊ ဈေးဆိုင်များကို ပိတ်သိမ်းထားခဲ့ရာမှ Stay at Home ပယ်ဖျက်ပြီးနောက် ယင်းကဲ့သို့ ပြန်လည် ဖွင့်လှစ်ခွင့် ပြုခဲ့ခြင်း ဖြစ်သည်။
