အာဆီယံ ထိပ်သီးအစည်းအဝေးသို့ မြန်မာ စစ်ကောင်စီ ဥက္ကဌ ကို ဖိတ်ကြားမည် မဟုတ်ကြောင်း အာဆီယံအလှည့်ကျ ဥက္ကဌက အတည်ပြုခဲ့သည်ဟု ယနေ့ အောက်တိုဘာလ ၁၆ ရက်၊ နေ့လယ်ပိုင်းတွင် ရိုက်တာသတင်း၌ ဖော်ပြထားသည်။
.
လာမည့် အောက်တိုဘာလ ၂၆ ရက်မှ ၂၈ ရက်ထိ ပြုလုပ်မည့် အာဆီယံ ထိပ်သီးအစည်းအဝေးကို ပြုလုပ်မည် ဖြစ်ရာ ယမန်နေ့က ပြုလုပ်သည့် အာဆီယံနိိုင်ငံခြားရေးဝန်ကြီးများ၏ အထူးအစည်းအဝေး၌ ယင်းကဲ့သို့ ဆုံးဖြတ်ခဲ့ခြင်းဖြစ်ကြောင်း သိရသည်။
.
အာဆီယံ ဘုံသဘောတူညီချက် ၅ ရပ်ကို စစ်ကောင်စီဘက်က ပူးပေါင်း ဆောင်ရွက်ခြင်း မရှိ၍ အစည်းအဝေးသို့ တက်ခွင့် မပေးဘဲ ချန်ထားရန် ဆုံးဖြတ်ချက်ကို အာဆီယံနိုင်ငံများက သဘော တူညီလိုက်ခြင်း ဖြစ်ကြောင်း ရိုက်တာ၏ ဖော်ပြချက်အရ သိရသည်။
.
ယင်းကဲ့သို့ စစ်ကောင်စီ ဥက္ကဌအား အစည်းအဝေးသို့ တက်ရောက်ခွင့် မပြုသော်လည်း "a non-political representative" နိုင်ငံရေးပိုင်းမှ မဟုတ်သူ တစ်ဦးကို မြန်မာနိုင်ငံ ကိုယ်စားပြု အဖြစ် တက်ရောက်ခွင့်ပေးရန် ဆုံးဖြတ်ထားကြောင်းလည်း သိရသည်။
