ကုန် တင်ရန်အတွက် တရုတ်နိုင်ငံ၊ ကျယ်ဂေါင်သို့ မူဆယ်မှ ကုန် မပါသော ယာဉ်များကို တိုကင်စနစ်ဖြင့် ဝင်ရောက်ခွင့် ပြုမည် - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

ကုန် တင်ရန်အတွက် တရုတ်နိုင်ငံ၊ ကျယ်ဂေါင်သို့ မူဆယ်မှ ကုန် မပါသော ယာဉ်များကို တိုကင်စနစ်ဖြင့် ဝင်ရောက်ခွင့် ပြုမည်

တရုတ်နိုင်ငံ၊ ကျယ်ဂေါင်မြို့တွင် ကျန်ရှိနေသော သွင်းကုန် ပစ္စည်းများနှင့် မြန်မာနိုင်ငံသား ပြည်တော်ပြန်များ၏ အသုံးအဆောင် ပစ္စည်းများ တင်ဆောင်ရန်အတွက် မူဆယ်မြို့မှ ကုန် မပါသည့် (ခါလီ) ယာဉ်များကို အောက်တိုဘာလ၊ ဒုတိယပတ်အတွင်း ဝင်ရောက်ခွင့် ပြုသွားမည် ဖြစ်ကြောင်း သိရသည်။

.
" မူဆယ်မြို့ နယ်စပ် ကျယ်ဂေါင်အတွင်းက ကျန်နေတဲ့ တရုတ်သွင်းကုန် ပစ္စည်းတွေနဲ့ ပြည်တော်ပြန်တွေရဲ့ အသုံးအဆောင် ပစ္စည်းတွေကို အခု ရက်ပိုင်းအတွင်း တရုတ်ဖက်က သယ်ဆောင်ခွင့် ပြုတော့မှာ ဖြစ်ပါတယ်။ သယ်ဆောင် ခွင့်ပြုကာလ ၁၀ လပိုင်း၊ လကုန်ထိဖြစ်ပါတယ်။" ဟု  မူဆယ်-နမ့်ခမ်း နယ်စပ်ကုန်သွယ်ရေးကုန်သည်များအသင်းမှ အလုပ်အမှုဆောင် အဖွဲ့ဝင် တစ်ဦးက ပြောသည်။
.
နိုဝင်ဘာလ မတိုင်မီ ကျယ်ဂေါင်မြို့ကို အပြောင်ရှင်း၍ အဆင့်မြင့်မြို့ပြစီမံကိန်း ပြုလုပ်ရန်  ရည်ရွယ်ထားဖွယ် ရှိပြီး ခန့်မှန်း ယာဉ် အစီးရေ ၇၀၀ ရှိ သွင်းကုန်ပစ္စည်းများကို မြန်မာဘက်သို့ သွင်းပေးမည် ဖြစ်ကာ မြန်မာဘက်မှ ယာဉ်များကို ယာဉ်မောင်း အစားထိုးစနစ်ဖြင့် ဂိုဒေါင်အတွင်း ဝင်ရောက်တင်ဆောင်ခွင့် ပြုမည်ဟု ၎င်းက ရှင်းပြသည်။
.
အလားတူ မြန်မာနိုင်ငံသို့ တင်ပို့ရန် ကျယ်ဂေါင်မြို့၌ ရှိနေသည့် ကုန်တင်ပြီး ယာဉ်များကိုလည်း သတ်မှတ် လုပ်ထုံးလုပ်နည်းများနှင့် အညီ တင်သွင်း(ထွက်ခွာ) ခွင့် ပြုသွားမည် ဖြစ်ကြောင်း သိရသည်။
.
သက်ဆိုင်ရာ ကုန်သည်လုပ်ငန်းရှင်များ၊ မော်တော်ယာဉ်များနှင့် ကုန်ဂိတ်များအ‌နေဖြင့်ကြိုတင် ချိတ်ဆက် ပြင်ဆင်ထားကြရန် မူဆယ်-နမ့်ခမ်း နယ်စပ်ကုန်သွယ်ရေးကုန်သည်များအသင်းက အောက်တိုဘာလ ၃ ရက်တွင် နိုးဆော်စာ ထုတ်ပြန်ထားသည်။
.
အဆိုပါ ကုန်တင်ယာဉ်များအတွက် တိုကင်ကို မူဆယ်မြို့နယ်အဝေးပြေးမော်တော်ယာဉ်များအသင်းမှ ထုတ်ပေးသွားမည် ဖြစ်ပြီး ထုတ်ပေးမည့်ရက်ကို ကြိုတင် အသိပေးသွားမည်ဖြစ်ကြောင်း သိရသည်။

Journal Download

Photo of three cats