ပအိုဝ်းအမျိုးသားအာဇာနည်နေ့ အခမ်းအနားကို တောင်ကြီး၊ ဆီဆိုင်နှင့် လွိုင်လင်မြို့နယ်တို့တွင် သီးခြားစီ ပြုလုပ် - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

ပအိုဝ်းအမျိုးသားအာဇာနည်နေ့ အခမ်းအနားကို တောင်ကြီး၊ ဆီဆိုင်နှင့် လွိုင်လင်မြို့နယ်တို့တွင် သီးခြားစီ ပြုလုပ်


(၄၆)ကြိမ်မြောက် ပအိုဝ်းအမျိုးသားအာဇာနည်နေ့ အခမ်းအနားကို တောင်ကြီးမြို့နယ် (ကျောက်တလုံးကြီးမြို့)၊ ဆီဆိုင်မြို့နယ်နှင့် လွိုင်လင်မြို့နယ်တို့၌ စက်တင်ဘာလ ၂၅ ရက်တွင် အဖွဲ့အစည်း အသီးသီးက သီးခြားစီ ပြုလုပ်ခဲ့ကြောင်း သိရသည်။

.

တောင်ကြီးမြို့နယ်၊ ကျောက်တလုံးကြီးမြို့၊ ပင်တွန်းကျေးရွာအနီးရှိ ပအိုဝ်းအမျိုးသားအာဇာနည်ကုန်း၌ PNO က လည်းကောင်း၊ ဆီဆိုင်မြို့တွင် ပအိုဝ်းလူငယ်အစည်းအရုံးက လည်းကောင်း၊ လွိုင်လင်မြို့နယ် ကောင်ခယ်းဒေသတွင် PNA အသွင်ပြောင်းပြည်သူ့စစ်ဌာနေအဖွဲ့က လည်းကောင်း ဦးဆောင်၍ ဒေသခံပြည်သူများနှင့်အတူ ပြုလုပ်ခဲ့ခြင်း ဖြစ်ကြောင်း သိရသည်။

.

ထို့အတူ PNLO/PNLA အဖွဲ့ကလည်း ပအိုဝ်းအမျိုးသားအာဇာနည်နေ့ အထိမ်းအမှတ်အဖြစ် ကြေညာချက် ထုတ်ပြန်ခဲ့သေးသည်။

.

အဆိုပါ အခမ်းအနားများတွင် ပအိုဝ်းအမျိုးသားအလံ တင်ခြင်း၊ ပအိုဝ်းအမျိုးသားအလံအားအလေးပြုခြင်း၊ ပအိုဝ်းအမျိုးသား အာဇာနည်ခေါင်းဆောင်များအား အလေးပြုခြင်း၊ ပအိုဝ်းအမျိုးသားအလံအား အလံတိုင် တဝက်ချ လွှင့်ထူကာ အောက်မေ့သတိရ ဝမ်းနည်းခြင်းအနေဖြင့် တစ်မိနစ်ခန့် ငြိမ်သက်စွာ နေခြင်း၊ လွမ်းသူပန်းခွေ ချခြင်းများ ပြုလုပ်ခဲ့ကြောင်း သိရသည်။

.

ပအိုဝ်းအမျိုးသား အာဇာနည်နေ့ကို ပအိုဝ်းအမျိုးသားခေါင်းဆောင် သထုံဖြားဗွာ ဦးလှဖေ ကွယ်လွန်ခဲ့သည့်နေ့ကို သတ်မှတ်ခြင်း ဖြစ်ပြီး နှစ်စဉ် တော်သလင်းလဆုတ် ၅ ရက် (သို့မဟုတ်) စက်တင်ဘာလ ၂၄ ရက်ကို သတ်မှတ်ကြကြောင်း သိရသည်။

Journal Download

Photo of three cats