ရှမ်းပြည်နယ် အတွင်း စစ်ရေးပဋိပက္ခများကြောင့် စစ်ဘေးရှောင် အဖြစ် နေရပ်စွန့်ခွာ ထွက်ပြေး တိမ်းရှောင်နေကြရသည့် ဒေသခံ ပြည်သူ ၈၀၀၀ ဦးခန့် ရှိလာကြောင်း သိရသည်။
.
ရှမ်းပြည်နယ်မြောက်ပိုင်းရှိ မူဆယ်မြို့နယ်၌ ၂၁၀၀ ဦးကျော်ခန့်၊ သီပေါမြို့နယ်တွင် ၁၀၀၀ ဦးခန့်၊ ကျောက်မဲမြို့နယ်တွင် ၁၅၀၀ ဦးကျော်ခန့်၊ ရှမ်းပြည်နယ်တောင်ပိုင်းရှိ မိုင်းကိုင်မြို့နယ်၌ ၃၀၀၀ ဦးခန့်တို့သည် နီးစပ်ရာ မြို့ပေါ်ရပ်ကွက်နှင့် ကျေးရွာများတွင် စစ်ဘေးရှောင် အဖြစ်တိမ်းရှောင်နေကြရခြင်း ဖြစ်သည်။
.
" ကိုဗစ်ကလည်း မငြိမ်သေးဘူး၊ နယ်မြို့တွေမှာ ကူးစက်မှု ပို များလာတယ်လို့တောင် ပြောလို့ရတယ်။ တစ်နိုင်ငံလုံးမှာလည်း အများဆုံး ပြည်နယ်က ရှမ်းပဲ။ ကိုဗစ်ဒဏ်ကို ခံနေရတုန်း၊ စစ်ဘေးဒဏ်ကို ခံနေရတာကလည်း ခုဆို ၃ လလောက် ရှိနေပြီ၊ ပျဉ်းမျှပေါ့။ အပြစ်မဲ့ ပြည်သူတွေပါ။" ဟု စစ်ရှောင်များအား ကူညီပေးနေသူ တစ်ဦးက ပြောသည်။
.
ပြီးခဲ့သည့် ဇွန်လမှ စတင်၍ တိုင်းရင်းသား လက်နက်ကိုင်အဖွဲ့ အချင်းချင်း သော်လည်းကောင်း၊ စစ်ကောင်စီတပ်နှင့် တိုင်းရင်းသား လက်နက်ကိုင်အဖွဲ့တို့ကြား သော်လည်းကောင်း ဖြစ်ပွားနေသည့် တိုက်ပွဲနှင့် စစ်ရေးတင်းမာမှု အခြေအနေများကြောင့် ဒေသခံပြည်သူများသည် COVID-19 ရိုက်ခတ်မှု ဒဏ်နှင့်အတူ စစ်ဘေးဒဏ်ကိုပါ ယနေ့တိုင် တစ်ပြိုင်တည်း ခံနေကြရသည်ဟု သိရသည်။
.
စစ်ဘေးရှောင် ပြည်သူများသည် ကာလရှည်ကြာ တိမ်းရှောင်နေကြရသဖြင့် စားနပ်ရိက္ခာ၊ ဆေးဝါးအပြင် အသုံးအဆောင်များပါ အရေးပေါ် လိုအပ်နေလျက် ရှိကြောင်း သိရသည်။
.
" အစားအသောက်ကတော့ လိုတယ်၊ အခုက မိုးတွင်းဆိုတော့ မိုးကာတွေလည်း လိုနေတယ်၊ လိုတာက အကုန်ပဲ။ "ဟု စစ်ရှောင် တစ်ဦးက ပြောသည်။
.
အဆိုပါ စစ်ဘေးရှောင်စခန်းများတွင် COVID-19 ကူးစက် ခံရမှုများလည်း ရှိနေရာ ကျောက်မဲမြို့နယ်နှင့် မူဆယ်မြို့နယ်တို့၌ ယမန်နေ့ စက်တင်ဘာလ ၂၃ ရက်ထိ COVID-19 ပိုး ရှိသူ စစ်ဘေးရှောင် ၃၀၀ ဦးခန့် တွေ့ရှိထားကြောင်း သိရသည်။
.
မိုင်းကိုင်မြို့နယ် သံဃာ့ဩဝါဒခံနာရေးကူညီမှုအသင်းက RCSS နှင့် SSPP တို့ကြား တိုက်ပွဲများ လျှော့ချပေးရန် စက်တင်ဘာလ ၂၂ ရက်တွင် မေတ္တာရပ်ခံစာ ထုတ်ထားသည့်အပြင် တိုင်းရင်းသားလက်နက်ကိုင်အဖွဲ့ အချင်းချင်း ဖြစ်ပွားနေသည့် တိုက်ပွဲများ ရပ်တန့်ရန်အတွက် နိုင်ငံရေးပါတီများ၊ လူမှုရေးအဖွဲ့အစည်းများနှင့် ဒေသခံပြည်သူများကပါ တောင်းဆိုနေလျက် ရှိသည်။
