ဟိုပုံးတွင် မြို့မဈေးပိတ်ရန် ညွှန်ကြားထားသော်လည်း ပြင်ပ ဈေးသည်များအား ရောင်းချခွင့်ပြုထားသဖြင့် ဝေဖန်ခံနေရ - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

ဟိုပုံးတွင် မြို့မဈေးပိတ်ရန် ညွှန်ကြားထားသော်လည်း ပြင်ပ ဈေးသည်များအား ရောင်းချခွင့်ပြုထားသဖြင့် ဝေဖန်ခံနေရ

.

ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့တွင် COVID-19 ရောဂါ ကူးစက်ပြန့်ပွားမှု မရှိစေရေးအတွက် မြို့မဈေးအား ယာယီပိတ်ထားသော်လည်း မြို့နယ်ပြင်ပမှ လာရောက်ရောင်းချသည့် ဈေးသည်များအား ဆက်လက်ရောင်းချခွင့် ပြုထားသဖြင့် ရောဂါကူးစက်ပြန့်ပွားမည်ကို စိုးရိမ်နေရကြောင်း ဒေသခံများက ပြောဆိုလျက်ရှိသည်။

.

.

“ဟိုပုံးစည်ပင်က သက်သက်မဲ့ ညစ်တာပါ။ ဈေးမြောက်ဘက်မှာ တောင်ကြီးက ကားနဲ့လာရောင်းတာကိုတော့ ရောင်း ခွင့်ပေးထားတယ်။ ဟိုပုံးသားတွေကိုတော့ ရောင်းခွင့်လုံးဝမရဘူးတဲ့။ ကြပ်ကြပ်မတ်မတ်နဲ့ ဈေးကို ၁၀ ရက် အကုန် ပိတ်ပြီး စည်းကမ်းတကျနဲ့ ပြန်ဖွင့်ပေးမယ်ဆိုရင် အဆင်ပြေမယ်ထင်တယ်။ ပြင်ပဈေးသည်တွေကို လုံးဝ ရောင်းချခွင့် မပြုနဲ့ပေါ့” ဟု ဟိုပုံးမြို့မဈေးအတွင်း ဈေးရောင်းချသူတစ်ဦးက ပြောသည်။

.

ယင်းကဲ့သို့ ဟိုပုံးဈေကို ယာယီပိတ်သိမ်းရန် ညွှန်ကြားထားသော်လည်း လူတိုးဝှေ့ထူထပ်လေ့ရှိသည့် ကျွဲနွားပွဲဈေးကိုမူ ပိတ်သိမ်းခြင်းမရှိဘဲ ဆက်လက်ဖွင့်ခွင့်ပြုထားကြောင်း သိရသည်။

.

“အပေါ်ဈေးပိတ်လို့ ဒုက္ခရောက်နေတဲ့သူတွေ အများကြီးပါ။ တချို့က ဆိုင်ခန်းခတွေအတွက် ဆုကြေး ငွေတိုးဘူပြီး လုပ်စားနေရတဲ့သူတွေ အရမ်း ဒုက္ခရောက်တယ်။ ငွေတိုးတို့ ဆိုင်ခန်းခတို့က ဈေးပိတ်လည်း လစဉ် ပုံမှန်ပေးနေရ တာပါ” ဟု အခြား ဟိုပုံးဒေသခံတစ်ဦးကလည်း ပြောဆိုခဲ့သည်။

.

အဆိုပါအခြေအနေနှင့် ပတ်သက်၍ ရှမ်းပြည်နယ်စည်ပင်သာယာရေးဌာနမှ တာဝန်ရှိသူတစ်ဦးအား ကမ္ဘောဇတိုင်းမှ ဆက်သွယ်မေးမြန်းရာတွင် “မြို့အလိုက် ဈေးရောင်းချတာ စီမံခန့်ခွဲကြီးကြပ်မှုလုပ်တာက အုပ်ချုပ်ရေး အဖွဲ့နဲ့ စည်ပင်က ညှိနှိုင်းလုပ်ကြတာကြောင့် တချို့ အသေးစိတ်အခြေအနေကိုတော့ ပြည်နယ်စည်ပင်အနေနဲ့ သိပ်မသိ ပါဘူး။ အဲဒီလိုဖြစ်တယ်ဆိုရင် သက်ဆိုင်ရာမြို့က ရှင်းပြစရာရှိတာ ရှင်း၊ ပြုပြင်စရာရှိတာ ပြုပြင်ရမှာပေါ့” ဟု ပြန်လည်ဖြေကြားခဲ့သည်။

.

ဟိုပုံးမြို့နယ်အတွင်း COVID-19 ‌ရောဂါ ကာကွယ်ထိန်းချုပ်ကာကွယ်ကုသခြင်းများ ဆောင်ရွက်နိုင်ရန်အတွက် မြို့နယ် COVID-19 စောင့်ကြည့်ထိန်းချုပ်ရေးကော်မတီ၏ ဩဂုတ်လ ၁၃ ရက် အစည်းအဝေး ဆုံးဖြတ်ချက်အရ ဟိုပုံးမြို့မဈေး အား ဩဂုတ်လ ၃၁ ရက်အထိ ယာယီဆက်လက်ပိတ်ထားရန် မြို့နယ်စည်ပင်သာယာရေးကော်မတီက အသိပေး ကြေညာထားသည်။

.

ဟိုပုံးမြို့နယ်တွင် COVID-19 တတိယလှိုင်းကာလ ဇွန်လမှ ယမန်နေ့ ဩဂုတ်လ ၂၂ ရက်အထိ COVID-19 အတည်ပြု လူနာ ၄၆၀ ဦး တွေ့ရှိခဲ့ပြီး ၎င်းတို့အနက် ၈ ဦး သေဆုံး၍ ၂၆၉ ဦးမှာ ဆေးရုံမှ ဆင်းခွင့်ရပြီဖြစ်ကာ လက်ရှိကုသဆဲ လူနာ ၁၈၃ ဦး ကျန်ရှိကြောင်း သိရသည်။

.

Journal Download

Photo of three cats