ရှမ်းပြည်နယ်အတွင်း ပုဒ်မ ၅၀၅ ဖြင့် ဖမ်းဆီးခံထားရသူများအနက် ၂ ဦးသာ လွတ်မြောက်

.

ပုဒ်မ ၅၀၅ အပါအဝင် ပုဒ်မအသီးသီးဖြင့် ဖမ်းဆီးထိန်းသိမ်းခံထားရသူများအနက် အချို့အား ယနေ့ ပြန်လွှတ်ပေးခဲ့ရာ ရှမ်းပြည်နယ်မှ ၂ ဦး ပြန်လည်လွတ်မြောက်ခဲ့သည်ဟု သိရသည်။

.

.

“ကျွန်တော် သိသလောက်ကတော့ ညောင်ရွှေထောင်က ထွေအုပ်စာရေးတစ်ဦးနဲ့ လားရှိုးအကျဉ်းထောင်က ဘဏ်စာရေးတစ်ဦး၊ စုစုပေါင်း ၂ ဦးပဲ ပြန်လွတ်ပါတယ်” ဟု ရှမ်းပြည်နယ် အကျဉ်းဦးစီးဌာနမှ တာဝန်ရှိသူက ပြောသည်။

.

ရှမ်းပြည်နယ် တစ်ခုလုံးတွင် ဖေဖော်ဝါရီလ ၁ ရက် စစ်အာဏာသိမ်းမှု နောက်ပိုင်း ဖမ်းဆီးခံခဲ့ရသည့် ကျောင်းသားများ၊ ပြည်သူများ၊ နိုင်ငံ့ဝန်ထမ်းများ၊ သတင်းမီဒီယာသမားများ၊ အရပ်ဘက် အဖွဲ့အစည်းဝင်များ၊ အစိုးရအဖွဲ့ဝင်များ၊ နိုင်ငံရေးသမားများ စုစုပေါင်း ၃၀၀ ဦး ဝန်းကျင်ခန့် ရှိပြီး ယင်း အရေအတွက်မှာ တိုင်းဒေသကြီးနှင့် ပြည်နယ်များ အနက် စတုတ္ထ အများဆုံး ဖြစ်သည်။

.

ပြီးခဲ့သည့် ဇွန်လ ၃၀ ရက်က ပြန်လည်စေလွှတ် ပေးခဲ့သူ ၂၂၉၆ ဦးအနက် ရှမ်းပြည်နယ်မှ ၄၉ ဦး ပါဝင်ခဲ့ပြီး ယခုတွင် ၂ ဦး ထပ်မံ စေလွှတ်ခဲ့ခြင်း‌ကြောင့် စုစုပေါင်း ၅၁ ဦးသာ ပြန်လည် လွတ်မြောက်ခဲ့သည်။

.