.
COVID-19 ရောဂါ
ပိုးတွေ့သံဃာ ၁၅၀ ကျော် တွေ့ရှိခဲ့သည့် တောင်ကြီးမြို့၊ သိမ်တောင်ပရိယတ္တိစာသင်တိုက်မှ
သံဃာတော် များအတွက် ၂၁ ရက်စာ နေ့ဆွမ်းကို တောင်ကြီးလင်းယုန် လူမှုကူညီရေးအသင်းမှ စေတနာရှင်
အလှူရှင်များ၏ စုပေါင်းထည့်ဝင်လှူဒါန်းမှုဖြင့် နေ့စဉ် လှူဒါန်းပေးလျက်ရှိကြောင်း သိရသည်။
.
“သံဃာတွေအတွက် ချက်ပြုတ်ဖို့
အခက်အခဲရှိသွားတော့ လှူဒါန်းနိုင်ဖို့ လိုင်းပေါ်တင်လိုက်တဲ့အခါ အားလုံးက ဝိုင်းပြီး
လှူကြတယ်။ မူလကတော့ ၁၄ ရက်ပဲ လှူဖို့ ရည်မှန်းထားတာပေါ့။ ဒါပေမဲ့ ရန်ကုန်က အလှူဒါယကာ
တစ်ယောက်က ၁၄ ရက် မလုပ်ပါနဲ့ ၂၁ ရက် ပြည့်အောင်လှူပါ။ ကျန်တဲ့ ၇ ရက်စာကို သူလှူမယ်ဆိုပြီး
ပြောလာပါတယ်။ ဒါကြောင့် ၂၁ ရက် ဖြစ်သွားတာပါ။ ၂၁ ရက်လုံးစာ အလှူ အကုန်ပြည့်သွားပါပြီ”
ဟု တောင်ကြီးလင်းယုန် လူမှုကူညီရေးအသင်းမှ ကိုဝင်းနိုင်စိုးက ကမ္ဘောဇတိုင်းသို့ ပြောသည်။
.
တောင်ကြီးလင်းယုန်
လူမှုကူညီရေးအသင်း အနေဖြင့် သံဃာတော်များအတွက် ဆွမ်းကွမ်းကိစ္စရပ်အပြင် ဆေးဝါး အတွက်
အလှူရှင်များမှ လှူဒါန်းထားသည့် ငွေကြေးများကို သံဃာတော်များထံ ဆက်လက်လှူဒါန်းပေးသွားမည်
ဖြစ်ကာ ရှမ်းတောင်ပရဟိတကွန်ရက်အနေဖြင့်လည်း သံဃာတော်များအတွက် လှူဒါန်းပေးလျက်ရှိကြောင်း
သိရသည်။
.
သိမ်တောင်ပရိယတ္တိစာသင်တိုက်ရှိ
သံဃာတော်များနှင့် ကပ္ပိယများအား ဩဂုတ်လ ၂ ရက်က RDT ဖြင့် စစ်ဆေးခဲ့ရာ သံဃာ ၃၁ ပါးနှင့် ကပ္ပိယတစ်ဦးတို့တွင် COVID-19
ရောဂါပိုး တွေ့ရှိခဲ့ပြီးနောက် ကျန်သံဃာများနှင့် ကပ္ပိယများအား ဩဂုတ်လ
၉ ရက်တွင် ဓါတ်ခွဲနမူနာ များအား ထပ်မံရယူ၍ PCR နည်းဖြင့် စစ်ဆေးခဲ့ရာ
သံဃာ ၁၂၃ ပါးတို့တွင် COVID-19 ရောဂါပိုး ထပ်မံတွေ့ရှိခဲ့သည့်အတွက်
ကျောင်းတိုက်အတွင်း ပိုးတွေ့သံဃာ/ကပ္ပိယ ၁၅၅ ပါး ရှိလာခြင်း ဖြစ်ကြောင်း သိရသည်။
.
လက်ရှိတွင် ပိုးတွေ့သံဃာများအား
မူလနေရာတွင်နေထိုင်စေပြီး ပိုးမတွေ့ရှိသည့် သံဃာတော်များကို ဓမ္မစကူးလ် ကျောင်းပေါ်၌
ခေတ္တ နေရာချထားပေးကာ ကျောင်းတိုက် တံခါးများအားလည်း သော့ခတ်၍ အဝင်/အထွက် ပိတ်ထား ကြောင်း
သိရသည်။
.
