ဓနုဒေသထွက် ဂေါ်ဖီထုတ်များ ဈေးကောင်းမရသည့်အတွက် တောင်သူများ အရှုံးနှင့် ရင်ဆိုင်နေရ

.

ဓနုကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ်နှင့် ရွာငံမြို့နယ်များမှ ထွက်ရှိသည့် ဂေါ်ဖီထုတ်များ ရောင်းချရာတွင် ဈေးကောင်းမရရှိသည့်အတွက် ဂေါ်ဖီစိုက်တောင်သူများ အရှုံးနှင့်ရင်ဆိုင်နေရကြောင်း သိရသည်။

.

.

“မုံလာထုပ် (ဂေါ်ဖီထုပ်) ကတော့ နှစ်တိုင်း စိုက်နေတာပဲ။ ၃ လမျိုးကတော့ ရောင်းတာစောလို့ ဒီလောက် မရှုံးဘူး။ ၆ လမျိုးက အခုမှ ထွက်တော့ မရောင်းရဘူး။ စိုက်ထားတဲ့အရင်းနဲ့ အလုပ်သမားခတွေနဲ့ ပြန်တွက်ရင် တော်တော် လေးကို ရှုံးပါတယ်” ဟု ပင်းတယမြို့နယ်၊ တမဲကျေးရွာမှ ဂေါ်ဖီထုပ်စိုက် ‌တောင်သူ ကိုတင့်ဝေက ပြောသည်။

.

ပင်းတယနှင့် ရွာငံမြို့နယ်များသည် ရှမ်းပြည်နယ်တောင်ပိုင်းဒေသအတွင်း ဂေါ်ဖီထုပ် အများဆုံးစိုက်ပျိုးရာ ဒေသဖြစ်ပြီး ယခုနှစ်တွင် ဂေါ်ဖီထုပ် ၁၀၀၀၀ ကျော် စိုက်ပျိုးထားကာ စိုက်ပျိုးမှုကုန်ကျစရိတ် တစ်ဧကလျှင် ငွေကျပ် ၁၂ သိန်းကျော် ကုန်ကျကြောင်း သိရသည်။

.

လက်ရှိတွင် COVID-19 ရောဂါ ကူးစက်ပြန့်ပွားမှုကြောင့် ကုန်စည်စီးဆင်းမှု နှောင့်နှေးနေသည့်အတွက် ဂေါ်ဖီထုပ် တစ်ထုပ်လျှင် ၅၀ ကျပ်မှ ၈၀ ကျပ်အထိသာ ပေါက်ဈေးရပြီး တောင်သူများ အရှုံးပေါ်နေရခြင်းဖြစ်ကြောင်း သိရသည်။

.

“စိုက်တာက နွားချေးတွေ၊ မြေဩဇာတွေ၊ မျိုးစေ့တွေ၊ အလုပ်သမားတွေနဲ့ တွက်လိုက်ရင် တစ်ထုပ်ကို ၁၀၀ ကျော် လောက်ကျတယ်။ အခုရတာက အထုပ်ကြီးတောင်မှ ၁၀၀ မရဘူးဆိုတော့ ရှုံးတာပေါ့။ တစ်ယောက်တည်းမဟုတ်ဘူး။ ဒီနှစ်က အားလုံးလိုလိုရှုံးကြတယ်” ဟု ရွာငံမြို့နယ်၊ ယကြီးကျေးရွာမှ ဂေါ်ဖီထုပ်စိုက်တောင်သူ ဦးထွန်းရွှေက လည်း ပြောဆိုခဲ့သည်။

.

ဓနုကိုယ်ပိုင်အုပ်ချုပ်ခွင့်ရဒေသသည် စိုက်ပျိုးရေးကို အဓိကထားလုပ်ကိုင်ကြသည့် ဒေသတစ်ခုဖြစ်ပြီး လက်ရှိ ဖြစ်ပွားနေသည့် COVID-19 ကူးစက်ရောဂါကြောင့် ကုန်စည်စီးဆင်းမှုများ အနည်းငယ်အကန့်အသတ် ရှိနေသည့် အတွက် ဂေါ်ဖီထုပ်စိုက်တောင်သူများ အရှုံးနှင့် ရင်ဆိုင်နေကြရသော်လည်း လက်ဖက်၊ ပြောင်းနှင့် ခရမ်းချဉ်သီးစိုက် တောင်သူများမှာ ဈေးကောင်းရရှိသည့်အတွက် အဆင်ပြေလျက်ရှိကြောင်း သိရသည်။

.

အဆိုပါဒေသမှထွက်ရှိသည့် ဂေါ်ဖီထုပ်များကို ‌ရန်ကုန်၊ မ‌န္တလေးစသည့် တိုင်းဒေသကြီးများနှင့် ပြည်နယ်များသို့ တင်ပို့ရောင်းချနေကြခြင်းဖြစ်ပြီး တစ်ရက်လျှင် ဂေါ်ဖီထုပ် ၃၀၀၀၀ ဝန်းကျင်ခန့်တင်ပို့ရောင်းချရကြောင်း သိရသည်။

.