စစ်ကောင်စီကို အိမ်စောင့်အစိုးရအဖွဲ့ဟု ပြင်ဆင်ဖွဲ့စည်း

.

စစ်ကောင်စီ (နိုင်ငံတော်စီမံအုပ်ချုပ်‌ရေးကောင်စီ)ကို  အိမ်စောင့်အစိုးရအဖွဲ့ဟု ပြင်ဆင်ဖွဲ့စည်းကြောင်း ယနေ့ ဩဂုတ်လ ၁ ရက်တွင် ကြေညာခဲ့သည်။

.

.

စစ်ကောင်စီက ချမှတ်ထားသည့် ရှေ့လုပ်ငန်းစဉ် ၅ ရပ်၊ ဦးတည်ချက် ၉ ရပ်တို့နှင့်အညီ နိုင်ငံတော်တာဝန်များကို ပိုမိုလွယ်ကူလျှင်မြန် ထိရောက်စွာ ဆောင်ရွက်နိုင်ရန်အတွက် နိုင်ငံတော်စီမံအုပ်ချုပ်ရေးကောင်စီ၊ စီမံခန့်ခွဲရေး ကော်မတီကို ပြည်ထောင်စုသမ္မတ မြန်မာနိုင်ငံတော်၊ အိမ်စောင့်အစိုးရအဖွဲ့အဖြစ် ပြင်ဆင်ဖွဲ့စည်းသည်ဟု အမိန့်စာတွင် ဖော်ပြထားသည်။

.

အဆိုပါ အိမ်စောင့်အစိုးရအဖွဲ့တွင် နိုင်ငံတော်ဝန်ကြီးချုပ်အဖြစ် စစ်ကောင်စီဥက္ကဋ္ဌကလည်းကောင်း၊ ဒုတိယ ဝန်ကြီးချုပ် အဖြစ် စစ်ကောင်စီ ဒုတိယဥက္ကဋ္ဌကလည်းကောင်း တာဝန်ယူမည်ဖြစ်ပြီး ပြည်ထောင်စုဝန်ကြီးများ၊ ပြည်ထောင်စုရှေ့နေချုပ်နှင့် အိမ်စောင့်အစိုးရအဖွဲ့ရုံး အမြဲတမ်းအတွင်းဝန်တို့ ပါဝင်မည်ဖြစ်ကြောင်း သိရသည်။

.

ထို့အတူ တိုင်းဒေသကြီးနှင့် ပြည်နယ်စီမံအုပ်ချုပ်ရေးကောင်စီများအား တိုင်းဒေသကြီးနှင့် ပြည်နယ်အစိုးရအဖွဲ့များ အဖြစ် ဖွဲ့စည်းကြောင်း စစ်ကောင်စီက ထုတ်ပြန်ခဲ့သည်။

.

.

ပြီးခဲ့သည့် ၂၀၂၀ ပြည့်နှစ်၊ နိုဝင်ဘာလ ၈ ရက်က ကျင်းပပြုလုပ်ခဲ့သည့် ပါတီစုံဒီမိုကရေစီ အထွေထွေရွေးကောက်ပွဲကို မဲစာရင်း မှားယွင်းသည်ဟု ဆိုကာ စစ်တပ်က ဖေဖော်ဝါရီလ ၁ ရက်တွင် နိုင်ငံတော် အာဏာအား ရယူခဲ့ခြင်းဖြစ်သည်။

.