.
တောင်ကြီးခရိုင်အတွင်းရှိ
COVID-19 ကာကွယ်ဆေး မထိုးနှံရသေးသည့်
စေတနာဝန်ထမ်း၊ ပရဟိတအဖွဲ့များကို စာရင်းကောက်ယူနေပြီး ကာကွယ်ဆေးထိုးနှံပေးသွားမည်ဖြစ်ကြောင်း
သိရသည်။
.
အဆိုပါ ကာကွယ်ဆေး ထိုးနှံရသေးသူများကို
ကျန်းမာရေးဦးစီးဌာနမှ ကာကွယ်ဆေးထိုးစင်တာများတွင် COVID-19 ကာကွယ်ဆေးထိုးနှံပေးသွားမည်ဖြစ်ကြောင်း
သိရသည်။
.
"တောင်ကြီးခရိုင်အတွင်းက
စေတနာဝန်ထမ်း၊ ပရဟိတအဖွဲ့တွေကို ထိုးပေးမှာပါ။ လောလောဆယ်တော့
စာရင်းကောက်ယူပြုစုနေတုန်းပဲရှိပါသေးတယ်။ စာရင်းကောက်ပြီးတာနဲ့ သူတို့ကို စင်တာတွေမှာ ကျန်းမာရေးဦးစီးဌာနက
ကာကွယ်ဆေးထိုးပေးမှာပါ"ဟု ရှမ်းပြည်နယ်လူမှုဝန်ထမ်းဦးစီးဌာနမှ
ညွှန်ကြားရေးမှူး ဦးထွန်းဦးက ကမ္ဘောဇတိုင်းသို့ ပြောသည်။
.
ကာကွယ်ဆေးထိုးနှံလိုသည့်
စေတနာဝန်ထမ်း၊ ပရဟိတအဖွဲ့များအနေဖြင့် ရှမ်းပြည်နယ်လူမူဝန်ထမ်းဦးစီးဌာန၊ အမှတ်
(၄၀)၊ အုတ်ဖိုလမ်း မြို့မရပ်ကွက် တောင်ကြီးမြို့သို့
ဆက်သွယ်စာရင်းပေးပို့နိုင်ကြောင်း သိရသည်။
.
အလားတူ တောင်ကြီးခရိုင်အတွင်းရှိ
ဘိုးဘွားရိပ်သာများမှ COVID-19 ကာကွယ်ဆေးမထိုးနှံရသေးသည့် ဘိုး/ဘွားများကိုလည်း
ရှမ်းပြည်နယ်လူမှုဝန်ထမ်းဦးစီးဌာနမှ စာရင်းကောက်ယူလျက်ရှိပြီး စေတနာဝန်ထမ်း၊
ပရဟိတအဖွဲ့များကို ထိုးနှံပေးပြီးပါက ဘိုးဘွားများကို
ဆက်လက်ထိုးနှံပေးသွားမည်ဖြစ်ကြောင်း ဦးထွန်းဦးက ဆက်လက်ပြောဆိုခဲ့သည်။
.
တောင်ကြီးခရိုင်အတွင်း
လက်ရှိအချိန်၌ ကိုဗစ်ကူးစက်မှုမြင့်မားလျက်ရှိပြီး တောင်ကြီးမြို့နယ်၊
ညောင်ရွှေမြို့နယ်နှင့် ရပ်စောက်မြို့နယ်များကိုမူ ဇူလိုင်လ ၂၆ရက်မှစတင်ပြီး Stay
at Home အစီအစဉ်တွင် အကျုံးဝင်ကြောင်း
ကျန်းမာရေးနှင့် အားကစား ဝန်ကြီးဌာနက ဇူလိုင်လ ၂၅ ရက်တွင် ထုတ်ပြန်ကြေညာထားသည်။
.
