အေးသာယာ အား/ကာသိပ္ပံ တွင် COVID-19 Positive Center ဖွင့်လှစ်ရန် စီစဉ်

.

တောင်ကြီးမြို့နယ်၊ အေးသာယာမြို့ရှိ အားကစားနှင့်ကာယပညာသိပ္ပံကျောင်းတွင် COVID-19 Positive Center ဖွင့်လှစ်နိုင်ရန် စီစဉ်ဆောင်ရွက်လျက်ရှိကြောင်း သိရသည်။

.

.

“ဘယ်တော့ စဖွင့်မှာလဲ ဆိုတာကတော့ တောင်ကြီးမှာ ဖွင့်ထားတဲ့ Positive Center တွေပြည့်မှ ဒီစင်တာ ဖွင့်မှာပါ။ လောလောဆယ်တော့ လူဦးရေ ၁၂၀ စာ တွက်ထားပါတယ်။ အေးသာယာ၊ ရွှေညောင်၊ အောင်သပြေက လူနာတွေ အတွက်ပါ” ဟု အေးသာယာမြို့ အုပ်ချုပ်ရေးမှူး ဦးအောင်သူရက ကမ္ဘောဇတိုင်းသို့ ပြောသည်။

.

တောင်ကြီးမြို့နယ်အတွင်းရှိ COVID-19 ပိုးတွေ့လူနာများကို တောင်ကြီးမြို့၊ စဝ်စံထွန်းဆေးရုံ ကုသရေးစင်တာ အပြင် အမျိုးသမီးနှင့် ကလေးဆေးရုံ (Positive Center)၊ ကွန်ပျူတာတက္ကသိုလ် (Positive Center)၊ ပညာရေး ဒီဂရီကောလိပ် (Positive Center) တို့၌ လက်ခံထားရှိ ကုသပေးလျက်ရှိပြီး ယခု အေးသာယာမြို့၌ Positive Center ထပ်မံဖွင့်လှစ်နိုင်ရန် ဆောင်ရွက်ခြင်းဖြစ်ကြောင်း သိရသည်။

.

တောင်ကြီးမြို့နယ်အထွေထွေအုပ်ချုပ်‌ရေးဦးစီးဌာန၏ ယမန်နေ့ ဇူလိုင်လ ၂၀ ရက်၊ ညပိုင်း ထုတ်ပြန်ချက်အရ တောင်ကြီးမြို့နယ်အတွင်း COVID-19 ပိုးတွေ့လူနာ ၉၂၄ ဦး ရှိသည့်အနက် ၆၉၈ ဦး ဆေးကုသမှု ခံယူနေဆဲဖြစ်ပြီး ၎င်းတို့ကို အဆိုပါ ကုသရေးစင်တာနှင့် Positive Center အသီးသီး၌ လက်ခံကုသပေးလျက်ရှိကြောင်း သိရသည်။

.Photo - ISPE Taunggyi

.