မြန်မာနိုင်ငံအတွက် ကြေကွဲဝမ်းနည်းစရာတစ်နေ့ဖြစ်ကြောင်း UN Myanmar ရုံး ထုတ်ပြန်

.

မြန်မာနိုင်ငံအတွင်း စစ်အာဏာရှင်ဆန့်ကျင်ရေး ဆန္ဒထုတ်ဖော်သူများအား ယနေ့ မတ်လ ၁၃ ရက်တွင် အာဏာသိမ်းစစ်ကောင်စီ၏ လက်နက်ကိုင်များက အကြမ်းဖက် ဖြိုခွင်း၊ သတ်ဖြတ်၊ ဖမ်းဆီးခဲ့မှုများနှင့် ပတ်သက်၍ မြန်မာနိုင်ငံအတွက် ကြေကွဲဝမ်းနည်းစရာ နောက်တစ်နေ့ဖြစ်ကြောင်း UN Myanmar ရုံးက ယနေ့ ညနေပိုင်းတွင် ထုတ်ပြန်ကြေညာခဲ့သည်ဟု သိရသည်။

.

.

မန္တလေးမြို့ အပါအဝင် အခြားနေရာများတွင် လုံခြုံရေးတပ်ဖွဲ့များက လူပေါင်းများစွာကို သတ်ဖြတ်ခဲ့သည်ဟု သတင်းများရရှိခဲ့ပါကြောင်း၊ ကုလသမဂ္ဂအနေဖြင့် ယင်းကဲ့သို့အကြမ်းဖက်မှုကို လက်မခံနိုင်ကြောင်းနှင့် သက်ဆိုင်ရာတာဝန်ရှိသူများကို အရေးယူသင့်ကြောင်း ရှင်းရှင်းလင်းလင်းပြောကြားထားပြီးဖြစ်ပါကြောင်း ထုတ်ပြန်ချက်တွင် ဖော်ပြထားသည်။

.

ယနေ့ မတ်လ ၁၃ ရက်တွင် မြန်မာနိုင်ငံတစ်ဝှမ်းရှိ မြို့နယ်အသီးသီးမှ စစ်အာဏာရှင်ဆန့်ကျင်ရေး ဆန္ဒပြမှုများအား လုံခြုံရေးတပ်ဖွဲ့ဝင်များက အကြမ်းဖက်ဖြိုခွင်းခဲ့ရာတွင် မန္တလေးမြို့မှ ၅ ဦး၊ ရန်ကုန်မြို့မှ ၁ ဦးနှင့် ပြည်မြို့မှ ၁ ဦးတို့ သေဆုံးခဲ့ရပြီး ဖေဖော်ဝါရီလ ၈ ရက်မှ ယနေ့ မတ်လ ၁၃ ရက်အထိ အကြမ်းဖက်ဖြိုခွင်းမှုများကြောင့် သေဆုံးသူ စုစုပေါင်း ၇၉ ဦးအထိ ရှိပြီဖြစ်ကြောင်း သိရသည်။

.