CDM တွင် ပါဝင်သည့် စဝ်စံထွန်းဆေးရုံမှ ဝန်ထမ်းများ နေအိမ်လိုင်းခန်းမှ ဖယ်ရှားခံရ

.

တောင်ကြီးမြို့၊ စဝ်စံထွန်းဆေးရုံ ဝန်ထမ်းအိမ်ရာဝင်းအတွင်း နေထိုင်သော ဝန်ထမ်းများအနက် CDM လှုပ်ရှားမှုတွင် ပါဝင်သည့် ဝန်ထမ်းများကို ယနေ့ မတ်လ ၁၅ ရက်အပြီး နေအိမ်လိုင်းခန်းများမှ ဖယ်ရှားရန် ဖိအားပေးလာသဖြင့် ပြောင်းရွှေ့လျက်ရှိကြောင်း သိရသည်။

.

.

ယင်းကဲ့သို့ ပြောင်းရွှေ့ရန်အတွက် ယမန်နေ့ မတ်လ ၁၄ ရက်တွင် ဝန်ထမ်းများအား အကြောင်းကြားခဲ့ခြင်းဖြစ်ပြီး ယနေ့ မတ်လ ၁၅ ရက် အပြီး ပြောင်းရွှေ့ရန် ညွှန်ကြားထားကြောင်း သိရသည်။

.

“၁၅ ရက်နေ့ အလုပ်ဆင်းပါ။ မဆင်းရင် အဆောင်ကနေ ဖယ်ရှားဆောင်ရွက်သွားမည် ဖြစ်ကြောင်း ဆိုပြီး မနေ့က စာလာကပ်တယ်။ နှင်တာနဲ့ အတူတူပါပဲ။ အဲဒါကြောင့် အကုန်လုံး ပြောင်းကြတာပါ။ မနေ့က ရဲကား/စစ်ကား ၅ စီးနဲ့ လိုင်းခန်းထဲမှာ လိုက်ပြီး ကြေညာတယ်။ အောက်ခြေဝန်ထမ်းအများစုကတော့ ပိုဒုက္ခရောက် တာပေါ့။ သူတို့က ဒီမှာ နေတာလည်း ကြာပြီ။ မိသားစုကလည်းများတယ်။ အိမ်ထောင်ပစ္စည်းကလည်း များတယ်ဆိုတော့ အပြောင်းအရွှေ့မှာ အခက်အခဲရှိကြမှာပေါ့။ တချို့က ဘာပဲဖြစ်ဖြစ် Strong CDM နဲ့ ပြောင်းသွား ကြတာပေါ့” ဟု လိုင်းခန်း ဖယ်ရှားခံရသူ ဝန်ထမ်းတစ်ဦးက ပြောသည်။

.

အလားတူ ယမန်နေ့ မတ်လ ၁၄ ရက်ကလည်း တောင်ကြီးမြို့၊ အမျိုးသမီးနှင့် ကလေးဆေးရုံ ဝန်ထမ်းအိမ်ရာဝင်းနှင့် အဆုတ်ဆေးရုံ ဝန်ထမ်းအိမ်ရာဝင်းအတွင်း နေထိုင်သည့် CDM ဝန်ထမ်းများအား အတင်းအကြပ် ဖိအားပေး ပြောင်းရွှေ့ခိုင်းခဲ့ကြောင်း သိရသည်။

.

ပြီးခဲ့သည့် ဖေဖော်ဝါရီလ ၁ ရက်က စစ်အာဏာ သိမ်းယူပြီးနောက် စစ်အာဏာရှင်၏ လက်အောက်တွင် တာဝန် ထမ်းဆောင်လိုခြင်းမရှိသဖြင့် နိုင်ငံဝန်ထမ်းများက အကြမ်းမဖက် အမိန့်အာဏာဖီဆန်ခြင်း CDM လှုပ်ရှားမှုတွင် ပါဝင်လာနေကြခြင်းဖြစ်ပြီး CDM ဝန်ထမ်းအချို့ကို အာဏာပိုင်များက တာဝန်မှ ယာယီရပ်ဆိုင်းခြင်း၊ ဝန်ထမ်းနေအိမ် လိုင်းခန်းများတွင် နေထိုင်သူများအား အတင်းအကြပ် ဖိအားပေးခြင်းများ ဆောင်ရွက်နေလျက်ရှိသည်။

.