တောင်ကြီးတွင် စစ်ကောင်စီ တပ်ဖွဲ့က ဒုတိယအကြိမ် အကြမ်းဖက်နေ

.

တောင်ကြီးမြို့၊ ရတနာသီရိရပ်ကွက်အတွင်း၌ အာဏာသိမ်း စစ်ကောင်စီ၏ လက်နက်ကိုင် တပ်ဖွဲ့က ယနေ့ မတ်လ ၂၁ ရက်၊ ညနေ ၃ နာရီခန့်မှစတင်၍ ဒုတိယအကြိမ် အကြမ်းဖက် ပစ်ခတ်မှုများ ပြုလုပ်နေလျက် ရှိကြောင်း သိရသည်။

.

.

ယနေ့ နေ့လယ်ပိုင်းက ရတနာသီရိရပ်ကွက်တွင် စစ်အာဏာသိမ်းမှုအား အလိုမရှိကြောင်း ငြိမ်းချမ်းစွာ ဆန္ဒထုတ်ဖော် ရန် စုဝေးနေသည့် ပြည်သူများကို စစ်ကောင်စီလက်နက်ကိုင်များမှ အကြမ်းဖက်ပစ်ခတ်ဖြိုခွင်းကာ လူတစ်ဦးအား ဖမ်းဆီးသွားခဲ့ပြီးနောက် ယခု ညနေပိုင်းတွင် ဒုတိယအကြိမ်အဖြစ် ထပ်မံလာရောက်၍ ရပ်ကွက်အတွင်း ပစ်ခတ်ဖြိုခွင်း နေခြင်းဖြစ်ကြောင်း သိရသည်။

.

“အခုချိန်အထိ ပတ်ပတ်လည် ဝိုင်းထားတုန်းပါပဲ။ ကျွန်မတို့လည်း ဘာမှ လှုပ်လို့မရသေးဘူး။ ဖမ်းဆီးခံရတဲ့သူကတော့ မသိသေးပါဘူး။ ထိခိုက်ဒဏ်ရာရ ကတော့ ၃ ယောက် ဆေးရုံပို့လိုက်ရတယ်။ ရော်ဘာကျည်က အသားထဲမှာ နစ်ဝင် သွားတာ နည်းနည်းကြာသွားလို့ပါ” ဟု ဒေသခံတစ်ဦးက ပြောသည်။

.

အာဏာသိမ်းစစ်ကောင်စီ၏ လက်နက်ကိုင်များက လူနေရပ်ကွက်များအတွင်း ရော်ဘာကျည်ဆံများ၊ မျက်ရည်ယိုဗုံး များဖြင့် ပစ်ခတ်ခြင်းအပြင် လမ်းဘေးတွင် ရပ်ထားသော ကားများ၊ ဆိုင်ကယ်များအား ဖျက်ဆီးခြင်းများကို အကြမ်းဖက် လုပ်ဆောင်လျက်ရှိကာ လက်ရှိတွင် ပြည်သူ ၃ ဦး ဖမ်းဆီးခံထားရကြောင်း သိရသည်။

.