နိုင်ငံတော်သမ္မတနှင့် အတိုင်ပင်ခံပုဂ္ဂိုလ်တို့၏ ရုံးချိန်းကို အင်တာနက်မရရှိ ဟုဆိုကာ ဧပြီ ၁ ရက်သို့ ပြောင်းရွှေ့ ချိန်းဆို - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, March 24, 2021

နိုင်ငံတော်သမ္မတနှင့် အတိုင်ပင်ခံပုဂ္ဂိုလ်တို့၏ ရုံးချိန်းကို အင်တာနက်မရရှိ ဟုဆိုကာ ဧပြီ ၁ ရက်သို့ ပြောင်းရွှေ့ ချိန်းဆို

.

နိုင်ငံတော်သမ္မတ ဦးဝင်းမြင့်နှင့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့အား စစ်ကောင်စီမှ တရားစွဲဆိုထားသော အမှုများနှင့် ပတ်သက်၍ ယနေ့ မတ်လ ၂၄ ရက် ရုံးချိန်းတွင် မိုဘိုင်းအင်တာနက် မရရှိဟု ဆိုကာ ဧပြီလ ၁ ရက်သို့ ထပ်မံပြောင်းရွှေ့ချိန်းဆိုခဲ့သည်ဟု သိရသည်။

.


.

ပြီးခဲ့သည့် မတ်လ ၁၅ ရက် ရုံးချိန်းတွင်လည်း အင်တာနက် မရသဖြင့် Video Conferencing စနစ်ဖြင့် ကြားနာ၍ မရနိုင် ဟုဆိုကာ ယနေ့ မတ်လ ၂၄ ရက်သို့ ရုံးချိန်း ပြောင်းရွှေ့ချိန်းဆိုခဲ့ပြီး ယခုအခါ ဒုတိယအကြိမ် ထပ်မံ၍ ပြောင်းရွှေ့ ချိန်းဆိုခြင်းဖြစ်ကြောင်း သိရသည်။

.

အာဏာသိမ်းစစ်ကောင်စီက နိုင်ငံတော်သမ္မတ ဦးဝင်းမြင့်ကို ပုဒ်မ ၂ ခုဖြင့်လည်းကောင်း၊ နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကို ပုဒ်မ ၄ ခုဖြင့်လည်းကောင်း နေပြည်တော် ဇမ္ဗူသီရိမြို့နယ်တရားရုံးတွင် တရားစွဲဆို ထားခြင်းဖြစ်သည်။

.

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို စွဲဆိုထားသော ပုဒ်မများမှာ ရာဇသတ် ကြီးပုဒ်မ  ၅၀၅ (ခ)၊ လိုင်စင်မရှိသည့် ပစ္စည်း လက်ဝယ်ပိုင်ဆိုင်မှု ဆက်သွယ်ရေး ဥပဒေ ပုဒ်မ ၆၇၊ အနီးကပ် လုံခြုံရေး တပ်ဖွဲ့မှ သုံးစွဲသည့် စကားပြော စက်များမှာ တရားမဝင် တင်သွင်းထားသည်ဟူသော စွပ်စွဲချက်ဖြင့် ပို့ကုန်သွင်းကုန် ဥပဒေ၊ COVID-19 စည်းကမ်းများနှင့် မညီဘဲ ရွေးကောက်ပွဲမဲဆွယ်မှုတွင် ပါဝင်မှုအတွက် သဘာဝဘေးအန္တရာယ် စီမံခန့်ခွဲမှုဆိုင်ရာ ဥပဒေတို့ဖြစ်ပြီး အဂတိလိုက်စားမှု တိုက်ဖျက်ရေး ဥပဒေနှင့်အညီ အရေးယူနိုင်ရေးအတွက်လည်း ဆောင်ရွက်လျက်ရှိကြောင်း စစ်ကောင်စီက သတင်းထုတ်ပြန်ထားသည်။

.

ယမန်နေ့ မတ်လ ၂၃ ရက်က ပြုလုပ်ခဲ့သည့် အာဏာသိမ်းစစ်ကောင်စီ၏ သတင်းစာရှင်းလင်းပွဲတွင် ရန်ကုန်တိုင်း ဒေသကြီးဝန်ကြီးချုပ် ဦးဖြိုးမင်းသိန်းက ဒေါ်အောင်ဆန်းစုကြည်အား လာဘ်ငွေများ ပေးခဲ့ကြောင်း ဝန်ခံထွက်ဆို ထားသည့် ရုပ်သံဖိုင်တစ်ခုကို မီဒီယာများအား ပြသခဲ့ပြီး ယင်း ရုပ်သံသည် နည်းပညာဖြင့် အတုအပ ပြုလုပ်ထားခြင်း ဖြစ်ကြောင်း ဝေဖန်မှုများလည်း ရှိနေသည်။

.

No comments:

Post a Comment

Journal Download

Photo of three cats