.
ကလောမြို့နယ်၊ အောင်ပန်းမြို့တွင် အာဏာသိမ်းစစ်ကောင်စီမှ ခန့်အပ်သည့်
ရပ်ကွက်အုပ်ချုပ်ရေးမှူးများကို အလိုမရှိဟု ဆိုကာ ရပ်ကွက်ကိုယ်ပိုင်အုပ်ချုပ်မည်ဟု
ကြေညာပိတ်သိမ်းထားသည့် ရပ်ကွက်အုပ်ချုပ်ရေးမှူးရုံးများကို ယနေ့ မတ်လ ၂၂ ရက်တွင် စစ်ကောင်စီ၏
လက်နက်ကိုင်များက ပြန်လည်ဖွင့်လှစ်လျက်ရှိကြောင်း သိရသည်။
.
ယင်းသို့ ရပ်ကွက်ရုံးများ ပြန်လည်ဖွင့်လှစ်ရာတွင်
သက်ဆိုင်ရာရပ်ကွက်မှ ယခင်ရပ်ကွက်အုပ်ချုပ်ရေးပိုင်းများနှင့် ရပ်မိရပ်ဖများကို ခေါ်ယူကာဖွင့်လှစ်ခိုင်းခြင်းဖြစ်ကြောင်း
သိရသည်။
.
“အရင်က ရာအိမ်မှူးတချို့ ပါတာတော့ တွေ့ရတယ်။ သူတို့ခန့်တဲ့သူတွေကိုတော့
မသိဘူး။ ဆန့်ကျင်တဲ့သူတွေ ကိုပဲ ဆောင်ရွက်ဖို့ရှိမယ်၊ မပါသူတွေကို ဘာမှမလုပ်ဘူးလို့
ပြောတယ်။ မနေ့ကတည်းက ရုံးတွေဖွင့်ဖို့ အင်အားနဲ့ လုပ်နေတာ။ အခု မြို့ဟောင်းရပ်ကွက်ရုံးကို
ဖွင့်ဖို့ လုပ်ဆောင်နေတယ်” ဟု ဒေသခံတစ်ဦးက ပြောသည်။
.
လက်ရှိတွင် အာဏာသိမ်းစစ်ကောင်စီ၏ လက်နက်ကိုင်အဖွဲ့များသည် အောင်ပန်းနယ်မြေရဲစခန်းတွင်
အင်အား အများအပြားဖြင့် တပ်စွဲထားကြောင်း သိရသည်။
.
အောင်ပန်းမြို့၌ စစ်အာာသိမ်းမှု ဆန့်ကျင်ရေး လှုပ်ရှားမှုများကို
မတ်လ ၁၉ ရက်တွင် စစ်ကောင်စီ၏ လက်နက်ကိုင်အဖွဲ့များက အကြမ်းဖက် ပစ်ခတ်ဖြိုခွင်းမှုများ
ပြုလုပ်ခဲ့ရာ ၈ ဦးကျဆုံးပြီး ၂၀ ကျော် ဒဏ်ရာရရှိကာ ဖမ်းဆီးထိန်းသိမ်းခံထားရသူ အရေအတွက်ကို
အတိအကျ မသိရှိရသေးချေ။
.
#KBZTai #Shan #AungBan
.
လွတ်လပ်၍ အမှီအခို ကင်းသော မီဒီယာအဖြစ် ဆက်လက်
ရပ်တည်နိုင်ရေး ထောက်ပံ့မှုများ ပြုလုပ်လိုပါက https://www.kanbawzatainews.com/p/blog-page_6.html
.
