ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းနေရာကို ဒုတိယအမြဲတမ်း ကိုယ်စားလှယ် ဦးတင်မောင်နိုင်နှင့် အစားထိုးလဲလှယ်ရန် အာဏာသိမ်း စစ်ကောင်စီ၏ ကြိုးပမ်းမှုမှာ မအောင်မြင်ခဲ့ကြောင်း သိရသည်။
.
ဦးတင်မောင်နိုင်သည် ရာထူးမှ နုတ်ထွက်ကြောင်း ယနေ့ မတ်လ ၃ ရက်တွက် ကြေညာလိုက်ခြင်းကြောင့် ယင်းသို့ စစ်ကောင်စီ၏ ကြိုးပမ်းမှု မအောင်မြင်ရခြင်း ဖြစ်သည်။
.
နယူးယောက်မြို့ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် ဖြစ်သူ သံအမတ်ကြီး ဦးကျော်မိုးထွန်းသည် ပြီးခဲ့သည့် ဖေဖော်ဝါရီလ ၂၆ ရက်က ပြုလုပ်သော ကုလသမဂ္ဂ အထွေထွေညီလာခံ၌ အာဏာသိမ်းတပ်မတော်ကို ကမ္ဘာ့နိုင်ငံများက အသိအမှတ်မပြုရေး အပါအဝင် ပြည်သူ့အတွက် သတင်းစကား ပြောဆိုမှုများ ပြုလုပ်ပြီးနောက် စစ်ကောင်စီက သံအမတ်ကြီးကို ရာထူးမှ နုတ်ပယ်သည်ဟု ကြေညာခဲ့သည်။
.
CRPH မှ ဖွဲ့စည်းခဲ့သည့် နိုင်ငံခြားရေးဝန်ကြီးဌာနက ဦးကျော်မိုးထွန်းအား နိုင်ငံခြားရေးရာနှင့် သံတမန်ရေးရာ ကိစ္စရပ်များကိုပါ စီမံခန့်ခွဲရန် တာဝန် ပေးအပ်ခဲ့သည့် အပြင် ၎င်းသည်သာ မြန်မာနိုင်ငံ ကိုယ်စားပြုသော သံအမတ်ကြီး ဖြစ်ကြောင်း CRPH က ထုတ်ပြန်ထားသည်။
