ကမ္ဘောဇတိုင်း
.
ရှမ်းပြည်နယ်မြို့တော် တောင်ကြီးမြို့တွင် လာမည့် ဖေဖော်ဝါရီလ
၁၉ ရက်၌ တပ်မတော်ထောက်ခံပွဲ ပြုလုပ်ရန် စီစဉ်နေလျက်ရှိကြောင်း သိရသည်။
.
“ကျွန်တော်တို့တော့ စီစဉ်ထားတာ မရှိပါဘူး။ အရင်တစ်ရက်ကတော့
အဲဒီလိုလုပ်ဖို့ အစည်းအဝေးဖိတ်တယ်။ အဲဒီ နေ့က အရေးပေါ်လူနာ သွားပို့နေလို့ အစည်းအဝေး
မတက်ဖြစ်လိုက်ပါဘူး။ ဘယ်သူတွေ ဦးဆောင်မယ် ဆိုတာ ကတော့ မသိသေးပါဘူး” ဟု အမျိုးသားဒီမိုကရေစီ အင်အားစုပါတီ (NDF) မှ လွှတ်တော်ကိုယ်စားလှယ်လောင်း အဖြစ်
ဝင်ရောက် ယှဉ်ပြိုင်ဖူးသူ တစ်ဦးက ကမ္ဘောဇတိုင်းသို့ ပြောသည်။
.
ယင်းကဲ့သို့ တပ်မတော် ထောက်ခံပွဲ ပြုလုပ်ရန်အတွက် တောင်ကြီးမြို့နယ်နှင့်
အနီးအနားဒေသရှိ ကျေးရွာများတွင် PNO မှ အတင်းအကြပ် လူစုဆောင်းခေါ်ယူမှုများ
ရှိနေသည်ဟု သတင်းများ ထွက်ပေါ်နေသော်လည်း ပအိုဝ်းအမျိုးသား အဖွဲ့ချုပ်ပါတီ (PNO)
ကမူ ဟုတ်မှန်ခြင်းမရှိကြောင်း ငြင်းဆိုထားသည်။
.
“ကျွန်တော်တို့ပါတီက ထုတ်ပြန်ထားတာလည်းမရှိဘူး။ ဘာမှလည်း
မလုပ်ပါဘူး။ တစ်အိမ်တစ်ယောက် တက်ခိုင်း တယ် ဆိုတာမျိုး လုံးဝမဟုတ်ပါဘူး။ တခြားအဖွဲ့တွေက
လာစည်းရုံးတာမျိုးတော့ ရှိတယ်။ ကျွန်တော်တို့ လူထုကို အသုံးချတာပေါ့။ ကျွန်တော်တို့ကတော့
ဘာမှမပြောပါဘူး။ လူထုရဲ့ သဘောဆန္ဒပါပဲ” ဟု ပအိုဝ်းအမျိုးသားအဖွဲ့ချုပ် ပါတီ (PNO)
မှ တာဝန်ရှိသူတစ်ဦးက ပြောသည်။
.
ပြီးခဲ့သည့် ဖေဖော်ဝါရီလ ၁ ရက်က တပ်မတော်မှ နိုင်ငံတော်အာဏာ
သုံးရပ်ကို သိမ်းယူခဲ့ပြီးနောက် မြန်မာနိုင်ငံ တစ်ဝှမ်း မြို့နယ်ဒေသ အသီးသီးတွင် စစ်အာဏာရှင်
ဆန့်ကျင်ဆန္ဒပြပွဲများ ဖြစ်ပွားလျက်ရှိပြီး မြို့နယ်အချို့တွင် တပ်မတော် ထောက်ခံသူများက
တန်ပြန် ဆန္ဒပြပွဲများ ပြုလုပ်နေကြခြင်းဖြစ်ကြောင်း သိရသည်။
.
အဆိုပါ တပ်မတော်ထောက်ခံပွဲ ပြုလုပ်မှုတွင်
ပအိုဝ်းတိုင်းရင်းသားများ ပါဝင်လာမည် ဆိုပါက ပအိုဝ်းတိုင်းရင်းသား အားလုံး၏
ဆန္ဒကြောင့် မဟုတ်ကြောင်းကို ပအိုဝ်းတိုင်းရင်းသား လူငယ်များက လူမှုကွန်ရက်တွင်
ကြိုတင် ရေးသား၍ မေတ္တာရပ်ခံထားသည်ကို တွေ့ရသည်။
.
ဓါတ်ပုံ - ပြီးခဲ့သည့် ဇန်နဝါရီလ ၂၂ ရက်က တောင်ကြီးမြို့နယ်၊
အေးသာယာမြို့တွင် တပ်မတော်ထောက်ခံပွဲ ပြုလုပ်စဉ်
.
