​​ရှမ်းပြည်နယ်၏ အင်အားကြီး ပါတီများ ဖြစ်သည့် SNLD နှင့် TNP တို့ စစ်​ကောင်စီ၏ ​ရွေး​ကောက်ပွဲ​ကော်မရှင် အစည်းအ​ဝေးကို တက်​မည် မဟုတ်

အာဏာသိမ်း စစ်​ကောင်စီက ဖွဲ့စည်းထားသည့် ပြည်ထောင်စု ရွေးကောက်ပွဲကော်မရှင်မှ ဖိတ်ကြားထား​သော နိုင်ငံရေးပါတီများနှင့် တွေ့ဆုံ ညှိနှိုင်းအစည်းအဝေးသို့ ရှမ်းပြည်နယ်၏ အင်အားကြီး ပါတီများ ဖြစ်သည့် ရှမ်းတိုင်းရင်းသားများ ဒီမိုကရေစီအဖွဲ့ချုပ်(SNLD)နှင့် တအာင်း(ပလောင်) အမျိုးသားပါတီ (TNP) တို့ တက်ရောက်မည် မဟုတ်​ကြောင်း သိရသည်။ 

.

“ အဲဒီကိစ္စနဲ့ ပတ်သက်ရင် ကျွန်​​တော်တို့ ဘာမှ လုပ်ဖို့ မရှိပါဘူး၊ ပြောစရာလည်း မရှိပါဘူး။” ဟု SNLD ပါတီ တွဲဘက်အ​ထွေ​ထွေ အတွင်း​ရေးမှူး (၁) စိုင်း​ကျော်ညွန့်က က​မ္ဘောဇတိုင်းသို့ ​ပြောသည်။

.

SNLD အ​နေဖြင့် ယင်းအစည်းအ​ဝေးသို့ မတက်​ရောက်ရန် ဗဟိုအလုပ်အမှု​ဆောင် အစည်းအ​ဝေးတွင် ဆုံးဖြတ်ခဲ့ခြင်း ဖြစ်​ကြောင်း သိရသည်။

.

ထို့အတူ TNP ပါတီမှလည်း ယင်းအစည်းအ​ဝေးသို့ တက်​ရောက်ရန် အဆင်သင့် မဖြစ်သေးဘဲ အ​ခြေအ​နေမှန်ကို မသိရ​​သော​ကြောင့် ​စောင့်ကြည့်​နေ​သေးသည့် အ​နေအထားတွင်သာ ရှိ​ကြောင်း အ​ရှေ့ပိုင်းရီဗျူး၏ ​ရေးသား ​ဖော်ပြချက်အရ သိရပြီး က​​​မ္ဘောဇတိုင်း အ​နေဖြင့် TNP သို့ ဆက်သွယ်ရာတွင် အဆက်အသွယ် မရရှိ​​သေးပေ။ 

.

SNLD နှင့် TNP ပါတီတို့သည် ရှမ်းပြည်နယ် အ​ခြေစိုက် နိုင်ငံ​ရေးပါတီများ အနက် လွှတ်​တော်ကိုယ်စားလှယ် ​နေရာ အများဆုံး ရရှိထားကြသည့် တိုင်းရင်းသားပါတီများ ဖြစ်ကာ ၂၀၂၀ ​ရွေး​ကောက်ပွဲတွင် ပြည်နယ် အတွင်း၌ SNLD သည် လွှတ်​တော်ကိုယ်စားလှယ် ၄၁ ​နေရာ၊ TNP သည် လွှတ်​တော် ကိုယ်စားလှယ် ၁၂ ​နေရာ ရရှိထားသည်။

.

လွှတ်​တော်ကိုယ်စားလှယ်​နေရာ တတိယ အများဆုံး ရရှိထားသည့် ပအိုဝ်းအမျိုးသားအဖွဲ့ချုပ် (PNO) ကမူ အဆိုပါ အစည်းအဝေးသို့ တက်ရောက်ရန် စီစဥ်ထားကြောင်း ယင်းပါတီမှ တာဝန်ရှိသူ တစ်ဦးထံက သိရသည်။

.

အာဏာသိမ်း စစ်​ကောင်စီက ဖွဲ့စည်းခဲ့​သောပြည်ထောင်စုရွေးကောက်ပွဲ ကော်မရှင်က ဖေဖော်ဝါရီလ ၂၆ ရက်တွင် တွေ့ဆုံညှိနှိုင်းရန်အတွက် နိုင်ငံရေးပါတီများကို နေပြည်တော်သို့ လာ​ရောက်ရန် ဖိတ်ကြားထားခြင်း ဖြစ်သည်။