တောင်ကြီးမှ နိုင်ကျဉ်းဟောင်းတစ်ဦး အပါအဝင် ၃ ဦး ဖမ်းဆီးထိန်းသိမ်းခံရ

ကမ္ဘောဇတိုင်း

.

ရှမ်းပြည်နယ်မြို့တော် တောင်ကြီးမြို့တွင် ယနေ့ ဖေဖော်ဝါရီလ ၉ ရက်၊ နံနက်အစောပိုင်းက နိုင်ငံရေးအကျဉ်းသား ဟောင်း တစ်ဦး အပါအဝင် ၃ ဦး ဖမ်းဆီးထိန်းသိမ်းခံခဲ့ရကြောင်း သိရသည်။

.

ဖမ်းဆီးထိန်းသိမ်းခံရသူများမှာ နိုင်ငံရေးအကျဉ်းသားဟောင်း ဦးမြင့်ဌေး (ခ) ကိုဘယ်ကျော်၊ ပညာရောင်ခြည် ကိုယ်ပိုင်ကျောင်းမှ ဦးကြည်ရှိန်နှင့် ရှေ့နေ ဦးကျော်ဝင်းနိုင်တို့ဖြစ်ပြီး ၎င်းတို့ကို နေအိမ်အသီးသီးမှ ယနေ့ ဖေဖော်ဝါရီလ ၉ ရက်၊ နံနက် ၂ နာရီ ဝန်းကျင်ခန့်က လာရောက်ဖမ်းဆီးခေါ်ဆောင်သွားခဲ့ခြင်းဖြစ်ကြောင်း သိရသည်။

.

“တောင်လေးလုံး အပြင်ဇရပ်မှာ ထားတယ်လို့ သိရတယ်။ သူ့မိသားစုက လိုက်သွားမယ်လို့ ပြောပါတယ်” ဟု တောင်ကြီးမြို့ခံတစ်ဦးက ပြောသည်။

.

တောင်ကြီးမြို့တွင် ယမန်နေ့ ဖေဖော်ဝါရီလ ၈ ရက်၊ ညပိုင်းမှစတင်၍ ပုဒ်မ ၁၄၄ ထုတ်ပြန်ခဲ့ပြီးနောက် ယခုကဲ့သို့  

ဖမ်းဆီးခဲ့ခြင်းဖြစ်ပြီး လက်ရှိတွင် ​ဒေသခံ ပြည်သူများက စစ်အာဏာသိမ်း ဆန့်ကျင်​ရေး လှုပ်ရှားမှုကို ဆက်လက် ပြုလုပ်​နေကြောင်း သိရသည်။

.

အလားတူ ရှမ်းပြည်နယ်အရှေ့ပိုင်း၊ တာချီလိတ်မြို့၊ မဇ္ဈိမလူမှုကူညီရေးအသင်း ဥက္ကဋ္ဌ ဦးတင့်ဆွေ၊ NLD ပါတီဝင် ဦးကျော်မြင့်နှင့် ကျိုင်းတုံမြို့မှ မချောတို့ ၃ ဦးလည်း ဖမ်းဆီးထိန်းသိမ်းခံထားရကြောင်း သိရသည်။

.