အာဏာသိမ်းအစိုးရ ဟု မသုံးနှုန်းရန် စစ်ကောင်စီက ဖိအားပေးမှု အပေါ် ပကတိ အခြေအနေအတိုင်း လွတ်လပ်စွာ တင်ဆက်ကြမည်ဟု ရှမ်းပြည်နယ် အခြေစိုက် သတင်းမီဒီယာဌာနများက ယနေ့ ဖေဖော်ဝါရီလ ၂၅ ရက်တွင် ထုတ်ပြန်ခဲ့သည်။
ပြီးခဲ့သည့် ဖေဖော်ဝါရီလ ၁ ရက်တွင် တပ်မတော်က အာဏာ သိမ်းယူပြီးနောက် သတင်းဌာနများ အနေဖြင့် အာဏာသိမ်း အစိုးရ၊ စစ်အစိုးရ၊ စစ်ကောင်စီ ဟု သုံးနှုန်းခြင်း မပြုရန် ပြန်ကြားရေးဝန်ကြီးဌာနမှ တဆင့် အကြောင်းကြားစာများ ပေးပို့ခဲ့ပြီး ထိုသို့ ဆက်လက်ရေးသားပါက ထုတ်ဝေခွင့် ပိတ်သိမ်းမည် ဖြစ်ကြောင်းလည်း စစ်ကောင်စီက ပြောဆိုမှုအပေါ် ယခုကဲ့သို့ ကြေညာချက် ထုတ်ပြန်၍ တုံ့ပြန်ကြခြင်း ဖြစ်သည်။
.
ရှမ်းပြည်နယ်အတွင်းရှိ လွတ်လပ်သော သတင်းမီဒီယာများ အနေဖြင့် ရေးသားထုတ်လွှင့် ဖော်ပြသည့် အကြောင်းအရာ၊ စကားလုံး အသုံးအနှုန်းများနှင့် ပတ်သက်ပြီး သတင်းကျင့်ဝတ် စံနှုန်းနှင့် အညီ ကိုယ်ပိုင် သတင်းတိုက်အသုံး - House Style နှင့် သတင်းမူဝါဒ - House Policy တို့အပေါ် အခြေခံကာ ဖြစ်ပေါ်နေသည့် ပကတိ အခြေအနေအတိုင်း ဆက်လက်ပြီး လွတ်လပ်စွာ ရေးသားထုတ်လွှင့် ဖော်ပြသွားမည် ဖြစ်ကြောင်း သဘောထား ထုတ်ပြန်ခဲ့ခြင်း ဖြစ်ကြောင်း သိရသည်။
.
ကြေညာချက် ပူးတွဲ ထုတ်ပြန်သည့် ရှမ်းပြည်နယ် အခြေစိုက် သတင်းမီဒီယာများမှာ ကမ္ဘောဇတိုင်း၊ တာချီလိတ်သတင်းအေဂျင်စီ၊ မဲခေါင်သတင်းဌာန၊ ရွှေဖီမြေ၊ သံလွင်သွေးချင်း၊ မားနဂါး၊ အရှေ့ပိုင်းရီဗျူး၊ သျှမ်းသံတော်ဆင့်၊ ခမ်းသားငေါဝ်းနှင့် eastern future တို့ ဖြစ်သည်။
.
ထို့အတူ မြန်မာတစ်နိုင်ငံလုံးရှိ လွတ်လပ်သည့် သတင်းမီဒီယာ ၄၀ ကျော်တို့ကလည်း ယနေ့တွင်ပင် ပကတိ အခြေအနေအတိုင်း လွတ်လပ်စွာ တင်ဆက်ကြမည် ဖြစ်ကြောင်း သဘောထား ထုတ်ပြန်ခဲ့သည်။
.
လက်ရှိတွင် မြန်မာနိုင်ငံသတင်းမီဒီယာကောင်စီ အဖွဲ့ဝင် ၂၆ ဦးအနက် ၂၄ ဦးအထိ နုတ်ထွက်ထားခြင်းကြောင့် သတင်းမီဒီယာဌာနများက စုပေါင်း၍ ဆောင်ရွက်နေကြခြင်း ဖြစ်သည်။
