ဆီဆိုင်မြို့နယ်၊ နောင်အယ်ရေလွှဲဆည်နှင့် ရေဝပ်ဧရိယာတူးဖော်ခြင်းလုပ်ငန်း ၆၀ ရာခိုင်နှုန်း ပြီးစီး

ခွန်ရဲထွေး (ဆီဆိုင်)

.

ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြိုန့ယ်၊ နောင်အယ်ရေလွှဲဆည် (ကျောင်းချယ်) တည်ဆောက်ခြင်းနှင့် ရေဝပ်ဧရိယာ တူးဖော်ခြင်းလုပ်ငန်းများ ၆၀ ရာခိုင်နှုန်းခန့် ပြီးစီးနေပြီ ဖြစ်ကြောင်း သိရသည်။

.

.

ဆည်မြောင်းနှင့်ရေအသုံးချမှုစီမံခန့်ခွဲရေး ဦးစီးဌာနမှ ၂၀၂၀-၂၀၂၁ ဘဏ္ဍာရေးနှစ်၊ ပြည်နယ် ခွင့်ပြုရန်ပုံငွေ ကျပ် ၁၅၀ သန်းဖြင့် အလျားပေ ၁၀၀၊ အနံ ၄၅ ပေ၊ အမြင့် ၁၀ ပေရှိ နောင်အယ် ရေလွှဲဆည်(ကျောင်းချယ်)တည်ဆောက်ခြင်းလုပ်ငန်းနှင့် အရှည်ပေ ၃၀၀၊ အကျယ် ၇၅ ပေ၊ အမြင့် ၈ ပေရှိ ရေဝပ်ဧရိယာတူးဖော်ခြင်းလုပ်ငန်းများကို ဆောင်ရွက်နေခြင်းဖြစ်ကြောင်း သိရသည်။

.

ယင်းကဲ့သို့ ဆည်တည်ဆောက်မှုနှင့် ပတ်သက်၍ ဆောင်ရွက်ပြီးစီးမှု အခြေအနေများကို ယမန်နေ့ ဖေဖော်ဝါရီလ ၄ ရက်က မြို့နယ်အဆင့်တည်ဆောက်ရေးလုပ်ငန်းကြီးကြပ်မှုကော်မတီဥက္ကဋ္ဌ၊ မြို့နယ်အုပ်ချုပ်ရေးမှူး ဦးသိန်းဇော်နှင့် အဖွဲ့ဝင်များ၊ မြို့နယ်အဆင့်အရည်အသွေးစစ်ဆေးရေး ကော်မတီဥက္ကဋ္ဌနှင့် အဖွဲ့ဝင်များမှ ကွင်းဆင်းကြည့်ရှုစစ်ဆေးရာ ဆည်မြောင်းနှင့် ရေအသုံးချမှု ဦးစီးဌာန ဦးစီးအရာရှိ ဦးအောင်ရဲထွန်းက ဆောင်ရွက်မည့် အခြေအနေများကို ရှင်းလင်းတင်ပြ ခဲ့ကြောင်း သိရသည်။

.

အဆိုပါ နောင်အယ်ရေလွှဲဆည် ‌(ကျောင်းချယ်) တည်ဆောက်ပြီးစီးပါက ဆီဆိုင်မြို့နယ်အတွင်းရှိ ကျောင်းချယ်ကျေးရွာ၊ ဘန်းယဉ်ကျေးရွာ၊ နောင်အယ်ကျေးရွာ၊ တိကလိုင်ကျေးရွာနှင့် ဟိုတင့် ကျေးရွာများမှ အိမ်ခြေ ၅၃၀၊ လူဦးရေ ၂၅၀၀ ဦးခန့်နှင့် လယ်မြေ ၁၅၀၀ ဧကတို့ကို အကျိုးပြု စေမည်ဖြစ်ကြောင်း သိရသည်။

.