ခွေးဆွဲချိန်ဆို ​သတိထား

□ က​မ္ဘောဇတိုင်း
.
မ​နေ့ ​(ဖေ​ဖော်ဝါရီလ ၁၁ ရက်) ညပိုင်းက ဖုန်း အဝင်​ခေါ်ဆိုမှု​ပေါင်း များစွာနဲ့အတူ လူမှုကွန်ရက်​ပေါ်တွင် Post ​ပေါင်း များစွာ​ကို ​တွေ့မြင် ကြားသိခဲ့ရသည်။
.
အ​ကြောင်းအရာမှာ တူညီ​သော အ​ကြောင်းအရာ တစ်ခုတည်းသာ ဖြစ်ပြီး ယင်းမှာ ​တောင်ကြီးမြို့ အပါအဝင် ရှမ်းပြည်နယ်နှင့် မြန်မာနိုင်ငံ တစ်ဝှမ်းတွင် ည အချိန်မ​တော် ​ခွေးဆွဲခံရသည့် အ​ကြောင်းအရာများနှင့် ​ခွေးများကို ကူညီ​မောင်းထုတ်​ပေးကြရန်ပင် ဖြစ်သည်။
.
​ခွေး​လေ​ခွေးလွင့်များသည် နေ့ဘက်တွင် ပြည်သူအ​ပေါင်း စု​ပေါင်း သွားလာလှုပ်ရှား ​နေမှု​ကြောင့် ​ပုန်း​အောင်း၊ ငြိမ်ကုပ်​နေ​သော်လည်း အများသူငါ အိပ်စက် အနားယူချိန်တွင်မူ အုပ်စုဖွဲ့ ရမ်းကားကြ​ပေ​တော့သည်။ ယင်း ​ခွေး​လေ​ခွေးလွင့်များမှာ ညအ​မှောင်ကို အခွင့်​ကောင်း ယူ၍ အများပြည်သူကို စိတ်ဒုက္ခ ​ပေးသကဲ့သို့ အချို့ ​နေအိမ်များကို ခိုးဝင်ကာ စိတ်ထင်ရာ ​ဆောင်ရွက်​နေ​ကြခြင်း ဖြစ်ပေသည်။
.

 

.
ခွေး​လေ​ခွေးလွင့်များသည် မြင်သမျှ ကိုက်တတ်သည်၊ ​ကျွေးသည့် လက်ကိုလည် အရှက်သိက္ခာ မရှိ ကိုက်တတ်သည်။ "ကိုက်သူလည်း​ ခွေး၊ ရိုက်သူလည်း ခွေး"ဟု ​ရှေးလူကြီးများ၏ အဆိုအရ ယင်းတို့ကို ​ရှောင်ကွင်း သွားလာကြရသည်။
.
​Wikipedia တွင် ​ခွေး​လေ​ခွေးလွင့်များနှင့် ပတ်သက်၍ " မည်သူကမှ မပိုင်၊ တန်ဖိုးလည်း မထားသော ခွေးဝင်စား ခေါ်  အလေ့ပေါက် ခွေးများ ရှိသည်။ အိမ်ကြိုအိမ်ကြားများတွင် နေထိုင်ကာ တွေ့ရာကို ရှာဖွေစားသောက်ကြ၏။ ဤ ခွေးလေများကြောင့် ကူးစက်တတ်သောရောဂါများ ပြန့်ပွားလေ့ ရှိသည့်အတိုင်း နိုင်ငံကြီးများ၌ ခွေးပိုင်ရှင်တို့သည် ခွေးများကို အစိုးရထံ အခွန်ဆောင်ရသော လိုင်စင်ဖြင့်သာ မွေးမြူနိုင်ပေသည်။ ခွေးမှ ကူးစက်တတ်သော ရောဂါများအနက် အထူးသဖြင့် ​ခွေးရူးပြန်​​ရောဂါမှာ ကြောက်မက်ဖွယ် အကောင်းဆုံးပင် ဖြစ်သည်။"ဟု အဓိပ္ပါယ် ဖွင့်ဆိုထားသည်။
.
မှန်​ပေသည်၊ ​ခွေး​လေ​ခွေးလွင့်များ အဆွဲခံ၊ အကိုက်ခံ ရပါက ဒဏ်ရာ ရရှိနိုင်သလို ​ခွေးရူးပြန် ​ရောဂါပင် ရနိုင်သည်။
.
စဥ်းစားရန် အချက်မှာ အ​ဆိုပါ ခွေး​လေ​ခွေးလွင့်များမှာ ​နေ့ဘက်တွင် ညဘက်ကဲ့သို့ ဆိုးသွမ်းခြင်း မရှိသည့်အတွက် ပိုင်ရှင် ရှိဟန်လည်း ဖြစ်​နေသည်။ ခွေးသည် သခင်ကို သစ္စာဖောက်၍ စွန့်ပစ်လေ့ မရှိချေ၊ သခင်အတွက် အသက်ကိုပင် စွန့်တတ်သည်ဟု ​လေ့လာသိရှိရခြင်း​ကြောင့် ၎င်းတို့ သခင်အလိုကျ လုပ်​နေသည့် ​သစ္စာခံ ​ခွေးများလည်း ဖြစ်နိုင်​ပေသည်။
.
ခေတ်ကာလ မ​ကောင်းသည့် အ​ခြေအ​နေအရ ရာဇဝတ်ကျင့်ထုံးဥပ​ဒေ ပုဒ်မ ၁၄၄ အမိန့် ထုတ်ပြန်ထား​​သော်လည်း ​ယင်းဥပ​ဒေသည်ကား ​ခွေး​လေ​ခွေးလွင့်များ အတွက် သက်​ရောက်ခြင်း မရှိ​ပေ။ အ​ကြောင်းမှာ ​လူများ လိုက်နာရသည့် ဥပ​ဒေကို ​ခွေးများ လိုက်နာရန် မလိုအပ်ခြင်း​ကြောင့် ဖြစ်သည်။
.
​ပြည်သူများ ​အ​နေဖြင့် ​ခွေး​လေ​ခွေးလွင့်များကို ​ကြောက်ရွံ့ရန်​တော့ မလို​ပေ၊ မိမိတို့ ပြည်သူများအ​နေဖြင့် ၎င်းတို့ ​ကြောက်သည့် ​နေ့ဘက်ကို အခွင့်​ကောင်းယူကာ ​မောင်းထုတ်ရ​ပေမည်။ တစ်ရက် သို့မဟုတ် တစ်လ၊ တစ်နှစ် ကြာ​ကောင်း ကြာနိုင်​သော်လည်း အဆုံးတွင် လူသားတို့ကသာ အနိုင်ရကြမည်မှာ မလွဲ​ပေ။
.
သို့​သော်လည်းပဲ ​အထက်ပါ ​ခွေး​လေ​ခွေးလွင့်များ ကိုက်ဆွဲပါက ဖြစ်​ပေါ်လာနိုင်​​​သော အ​​ခြေအ​နေကို ​ထောက်ရှု၍ ​ရှောင်​နေရ​ပေမည်။ ၎င်းတို့ ​ပျော်မြူးရာ အချိန်ဖြစ်သည့် ညအချိန်များတွင် ​ခွေးဆွဲ မခံရ​စေ​ရေး ​အထူး သတိထား ရှောင်ရှားကြရ​ပေမည်။
.
ထို့အတူ ပြည်သူများ စိတ်ချမ်း​မြေ့​ပျော်ရွှင်စွာ အိပ်စက် အနားယူနိုင်​စေရန်အတွက် ​​နေ့ဘက်တွင် ပြည်သူများ စုဖွဲ့၍ ခွေး​မောင်းခြင်းကို လည်း​ကောင်း၊ ညဘက်တွင် ​​ခွေးများ ​ကြောက်လန့်​စေရန် သံပုံးတီး ​ခြောက်လှန့်၍ လည်း​​​ကောင်း စသည်ဖြင့် ​ခွေး​လေ​ခွေးလွင့်များ ​မောင်းထုတ်ခြင်း အစီအစဥ်ကို အရှိန်အဟုန်မြှင့်၍ အမြန် ​အ​ကောင်အထည်​ဖော် ဆောင်ရွက်ကြရန် တိုက်တွန်းလိုက်ရ​ပေသည်။
.