ပြည်သူတွေကို သတ်ဖို့ မဟုတ်ဘူး

ပြီးခဲ့သည့် ရှမ်းအမျိုးသားနေ့ (ရှမ်းပြည်နယ်နေ့) ဖြစ်သည့် ဖေဖော်ဝါရီလ ၇ ရက်မှ စတင်၍ တောင်ကြီးမြို့ အပါအဝင် ရှမ်းပြည်နယ်ရှိ မြို့/ဒေသအသီးသီးတွင် စစ်အာဏာသိမ်းမှုအား ကန့်ကွက်ရှုတ်ချသည့် ဆန္ဒထုတ်ဖော်မှုများ အဆက်မပြတ် ပြုလုပ်နေကြသည်မှာ ယနေ့ဆိုလျှင် ၇ ရက်တိတိ ရှိပြီ ဖြစ်သည်။

အထက်ပါ ဆန္ဒထုတ်ဖော်ပွဲများ၌ စစ်အာဏာရှင် ဆန့်ကျင်ရေးနှင့် သက်ဆိုင်သော ကြွေးကြော်သံများကို GenZ များ ဖြစ်သည့် ခေတ်လူငယ်များ ဦးဆောင်သော ဝန်ထမ်းများ၊ ပြည်သူများ ပါဝင်သည့် ဆန္ဒထုတ်ဖော်သူများက သံပြိုင် ဟစ်ကြွေးကြရာ ယင်းအနက် "ဗိုလ်ချုပ်ပေးတဲ့ စစ်ပညာ၊ ပြည်သူတွေကို သတ်ဖို့ မဟုတ်ဘူး။"ဟူသည့် ကြွေးကြော်သံမှာ ထူးခြားလှပေသည်။ တောင်းဆိုမှုလည်း မဟုတ်၊ ကန့်ကွက်မှုလည်း မဟုတ်၊ ထောက်ခံခြင်းလည်း မဟုတ်တန်သော သတိပေးခြင်းသာ ဖြစ်သည်။

ဗိုလ်ချုပ် အောင်ဆန်းသည် အမျိုးသား ခေါင်းဆောင် တစ်ဦး ဖြစ်သကဲ့သို့ မြန်မာ့တပ်မတော်၏ ဖခင် ဖြစ်သည်ကို အားလုံး အသိပင် ဖြစ်သည် (ဗိုလ်ချုပ်အကြောင်းကား ရေး၍ ကုန်သည် မရှိ)။ ယင်းသို့ ဗိုလ်ချုပ်နှင့် ပတ်သက်သည့် အသိအမှတ်ပြုမှုကို တပ်မတော်ကလည်း လက်ခံသည်ဟု ယုံကြည်မိသည်။ လက်ရှိ အာဏာသိမ်း နစအ ကောင်စီ ဥက္ကဌ ဖြစ်သည့် ဗိုလ်ချုပ်မှူးကြီး မင်းအောင်လှိုင် ကာကွယ်ရေးဦးစီးချုပ် တာဝန်ကို စတင် ယူပြီးနောက် မကြာမီ တပ်မတော် တပ်ရင်း/တပ်ဖွဲ့ အသီးသီး၌ ဗိုလ်ချုပ်ပုံကို ယနေ့တိုင် ချိတ်ဆွဲလာခြင်းက သက်သေပင် ဖြစ်သည်။

ယနေ့ (ဖေဖော်ဝါရီလ ၁၃ ရက်)သည် အမျိုးသားခေါင်းဆောင်ကြီး ဗိုလ်ချုပ်အောင်ဆန်း၏ မွေးနေ့ ဖြစ်သည်။ ၁၉၁၅ ခုနှစ်တွင် မွေးဖွားခဲ့သော ဗိုလ်ချုပ်သည် ၁၉၄၇ ခုနှစ် အသက် ၃၃ နှစ်အရွယ်တွင် လုပ်ကြံမှုကြောင့် ကျဆုံးခဲ့ရသည်။ ဗိုလ်ချုပ်မှာ လူသေခဲ့ရသော်လည်း နာမည် ကမူ မသေခဲ့။ ကမ္ဘာတည်သရွေ့ သေဖွယ်ရာလည်း မရှိတော့ပေ။ တပ်မတော်ကို တည်ထောင်ခဲ့သူ၊ လွတ်လပ်ရေးကို ရယူပေးခဲ့သူအဖြစ် ပြည်သူ အပေါ် တာဝန်ကျေပွန်ခဲ့သူ သူလိုလူ မရှိတော့ဟု ဆိုချင်ပေသည်။

ပြည်သူအပေါ် တာဝန်ကျေလွန်းလှသည့် ဗိုလ်ချုပ် တည်ထောင်ခဲ့သော တပ်မတော်၌ တာဝန်ထမ်းဆောင်ကြသည့် စစ်သည်(တပ်မတော်သား)များတွင် ကျင့်ဝတ်ဟူ၍ ရှိ၏။ စစ်သည်တော်ကျင့်ဝတ် ၆၀ တွင် ပြည်သူအပေါ် ပြုကျင့်ရမည့် ကျင့်ဝတ် ၁၀ ပါးတွင် ပြည်သူလူထုအပေါ် သစ္စာစောင့်သိ ရိုသေပါ၊ ပြည်သူလူထု၏ အသက်အိုးအိမ် စည်းစိမ် ဥစ္စာကို ကာကွယ် စောင့်ရှောက်ပါ။ ပြည်သူလူထုနှင့် ယဉ်ကျေးစွာဆက်ဆံပါ၊ ရေလို/လလို ကျင့်ပါ။ ပြည်သူလူထု၏ အကျိုးစီးပွားကို အစဉ် ဦးထိပ်ထားပါ။ ပြည်သူလူထုအား လှောင်ပြောင်ခြင်း မထီမဲ့မြင် ပြုခြင်း စော်ကားမော်ကားပြုခြင်း ဆဲရေးတိုင်းထွာခြင်း ကိုယ်ထိလက်ရောက်ကျူးလွန်ခြင်းနှင့် ခြိမ်းခြောက်ခြင်းတို့ကို ရှောင်ကျဉ်ပါ။ ပြည်သူလူထုအပေါ် လက်နက်အားကိုးဖြင့် အနိုင်ကျင့်ခြင်းမှ ရှောင်ကျဉ်ပါ။ မိမိနှင့်မသက်ဆိုင်သော အမှုကိစ္စများတွင် ၀င်မစွက်မိဖို့ သတိပြုပါ၊ ပြည်သူလူထုကိုဦးစားပေးပါ မိမိမှ အခွင့်အရေး ပို မယူပါနှင့်၊ ပြည်သူလူထုအတွက် ဘာပဲလုပ်လုပ် ဘာပဲခိုင်းခိုင်း ပြည်သူလူထုက ကြည်ဖြူကျေနပ်ပါစေ၊ ပြည်သူလူထု၏ ဘာသာအယူဝါဒ ယဉ်ကျေးမှုဓလေ့ထုံးစံများကို လေးစားပါ ဟူ၍ ဖြစ်သည်။

ကျင့်ဝတ်များမှာ တစ်ချက်စီ ခွဲထားသော်လည်း အားလုံးမှာ ပြည်သူကို ဗဟိုပြု၍ ရေလို၊ လလိုကျင့်ရန် လမ်းညွှန်မှုပင် ဖြစ်သည်။ မိမိနှင့် မသက်ဆိုင်တဲ့ အမှုကိစ္စတွေ ဝင်ရောက် စွက်ဖက်ခြင်း မပြုဘဲ ပြည်သူလူထုအတွက် ဘာပဲ လုပ်လုပ် ဘာပဲခိုင်းခိုင်း ပြည်သူလူထုက ကြည်ဖြူကျေနပ်ပါစေဟူသော အချက်မှာ ပြည်သူများအတွက်ကျေနပ်ဖွယ်ရာ အတိပင် ဖြစ်သည်။

ထို့အတူ မြန်မာနိုင်ငံ ရဲတပ်ဖွဲ့ဝင်များတွင်လည်း ရဲကျင့်ဝတ် ၇၀ ရှိပြီး ယင်းအနက် ပြည်သူအပေါ် ပြုကျင့်ရမည့် ကျင့်ဝတ်များ အဖြစ် ပြည်သူလူထုက အပ်နှင်းထားသော လက်နက်နှင့် လုပ်ပိုင်ခွင့်ကို အသုံးပြုပြီး ပြည်သူလူထုကို ကာကွယ်ကာ တရားဥပဒေနှင့်အညီ ဆောင်ရွက်မည်ဟူသော အချက် အပါအဝင် ကျင့်ဝတ် ၁၀ ပါး ရှိသည်။

လက်နက်နှင့် လုပ်ပိုင်ခွင့်ဆိုသော ဘယ်သူက စ ပေးမှန်း မသိ၊ ဘာကြောင့်မှန်း မသိသည့် အမိန့်ကို နာခံပြီး ပြည်သူကို ဖိနှိပ်ခြင်း မပြုရန်နှင့် တရားဥပဒေနှင့်အညီ ဆောင်ရွက်မည်ဟု ပါရှိခြင်းက ပြည်သူ့ရဲတို့အတွက် လုံလောက်သည့် အကြောင်းပြချက်ဟု ဆိုနိုင်သည်။ ဤနေရာတွင် ဥပဒေဟု မဖော်ပြဘဲ တရားဥပဒေဟု ဖော်ပြထားခြင်းက ဥပဒေ လက်တစ်လုံးခြား မလုပ်ရန် လမ်းညွှန်ထားသည်ဟု ယူဆပါသည်။

တပ်မတော်နှင့် ရဲတပ်ဖွဲ့၏ ပြည်သူလူထုအပေါ် ပြုကျင့်ရမည့် ကျင့်ဝတ်များသည် ပြီးပြည့်စုံလှသည်။ ကျင့်ဝတ်များအပေါ် လေးစားလိုက်နာမည် ဆိုပါက ပြည်သူ့အချစ်တော်များ ဖြစ်လာနိုင်ပေသည်။ ပြည်သူ အများစုသည် တပ်မတော်နှင့် ရဲတပ်ဖွဲ့အပေါ် အမြင် ကြည်လင်မှု မရှိသည်မှာ အမှန်တရားဆိုသည်ထက် အရှိတရားပင် ဖြစ်သည်။ အမြင်ကြည်သည့်သူ အချို့ ရှိသော်လည်း ၎င်းတို့၏ မိသားစုဝင်များနှင့် နီးစပ်ဝင်ဆံ့မှုရှိသူများသာ ဖြစ်ပြီး သာမန် ပြည်သူများ မဟုတ်ကြပေ။

"ဝန်ကြီးရာထူး ဆိုတာလည်း တိုင်းပြည်ရဲ့ အကြောင်းကြောင်းတွေ ထောက်ပြီး မျက်စိမှိတ် ယူလိုက်ရတာပဲ။ လူထုကြီးက ကျုပ်ကို ပေးထားတဲ့ လူထုခေါင်းဆောင်ဆိုတဲ့ ဂုဏ်ကို ဝန်ကြီးဆိုတဲ့ ဂုဏ်ထက် ကျုပ် ပိုမက်တယ်ဆိုတာ ခင်ဗျားတို့ မှတ်ထားလိုက်ပါ။ ကျုပ် စိတ်ထဲမှာ ဒီဝန်ကြီးဆိုတဲ့ ဂုဏ်ဟာ လူထုခေါင်းဆောင်ဆိုတဲ့ ဂုဏ်ရဲ့ ခြေဖျားမှာ ကပ်နေတဲ့ ခြေမှုံ့လောက်ပဲလို့ ကျုပ် မှတ်ထားတယ်။"ဟု ဗိုလ်ချုပ်က ကွန်မြူနစ်များ ထုတ်ပစ်သည့် အနောက်မုခ်ရှင်းပွဲတွင် ပြောဆိုခဲ့သည်ဟု မှတ်သားရသည်။ ဆိုလိုရင်းမှာ ပြည်သူက ပေးသည့် လူထုခေါင်းဆောင်၏ ဂုဏ်ဟာ မြင့်မြတ်လွန်းလှသည်ကို ရာထူး မမက်သည့် ဗိုလ်ချုပ်က ဩဝါဒပေးခြင်း ဖြစ်သည်။

ထို့အတူ တပ်မတော်နှင့် ပတ်သက်၍ ဗိုလ်ချုပ်က "စစ်တပ်ဟာ နိုင်ငံသူ၊ နိုင်ငံသားများကို ညှင်းဖို့ မဟုတ်။ လက်နက်အားကိုး တန်ခိုးပြဖို့ မဟုတ်၊ စစ်တပ်ဟာ နိုင်ငံရဲ့ အစေခံ ဖြစ်ရမယ်။ နိုင်ငံဟာ စစ်တပ်ရဲ့ အစေခံ မဖြစ်ရဘူး။"ဟု မိန့်ကြားမှုသည် မျိုးချစ်တပ်မတော်အတွက် အတိုဆုံးနဲ့ အပြည့်စုံဆုံး မိန့်ခွန်းပင် ဖြစ်သည်။

၁၉၄၇ ခုနှစ်၊ ဇူလိုင်လ ၁၃ ရက်တွင် ဗိုလ်ချုပ် ပြောဆိုခဲ့သော တိုင်းပြုပြည်ပြုလွှတ်တော် မိန့်ခွန်းတွင် " တိုင်းပြည်က မကြည်ညိုဘူးဆိုတာ ကျုပ်တို့ သိတဲ့ တစ်နေ့မှာ ကျုပ်တို့လည်း တွယ်မနေပါဘူး၊ ထွက်မှာပါပဲ။ ရာဇဝင် စာ အတင်ခံရမယ့် လူစားမျိုးတွေလား။ ရာဇဝင်မှာ အဆဲခံရမယ့် လူစားမျိုးတွေလားဆိုတာ ခင်ဗျားတို့ ကိုယ်တိုင် သိလာပါလိမ့်မယ်။" ဟု ထည့်သွင်း ပြောဆိုခဲ့ခြင်းမှာ ပြည့်သူ့ဆန္ဒကို အလေးထားသည့် ဗိုလ်ချုပ်၏ ဆုံးဖြတ်ချက်ပင် ဖြစ်သည်။ တိုင်းပြည်အတွက် အသက်ပေးရသည်ကိုပင် မကြောက်သော ဗိုလ်ချုပ်သည် ပြည်သူ အဆဲ ခံရမည်ကိုတော့ စိုးရိမ်သည်ဟု မြင်မိသည်။

ယနေ့ တပ်မတော်အပေါ် ပြည်သူများ မည်သို့ သဘောထားသည်ကို တွေးကြည့်သည်က ပြေးကြည့်တာထက် ပိုသိသည်ဟု ဆိုချင်ပေသည်။

လက်ရှိ မြန်မာပြည် အနှံ့ ပြုလုပ်နေကြသည့် ပြည်သူတို့၏ ဆန္ဒနှင့်အညီ ဆောင်ရွက်နေမှုကို ဗိုလ်ချုပ် တည်ထောင်ခဲ့သော တပ်မတော်သား စစ်သည်များနှင့် မြန်မာနိုင်ငံရဲတပ်ဖွဲ့ဝင်များ အနေဖြင့် ကာကွယ် စောင့်ရှောက်ပေးကြပါဟု ဆန္ဒပြုရင်း အမျိူးသား ခေါင်းဆောင်ကြီး ဖြစ်သော တပ်မတော် ဖခင် ဗိုလ်ချုပ်၏ ဆန္ဒကို သတိချပ်ပြီး အသိကပ်စေရန် တင်ပြလိုက်ရပါသည်။

Breaking

ပြည်သူတွေကို သတ်ဖို့ မဟုတ်ဘူး

Journal Download

Kanbawza Tai News

Kanbawza Tai Broadcasting

Recent

Popular

Comments

Archive

Pages

Contact Form

Breaking

ပြည်သူ​တွေကို သတ်ဖို့ မဟုတ်ဘူး

Journal Download

Socialize

Kanbawza Tai News

Kanbawza Tai Broadcasting

Recent

Popular

Comments

Archive

Pages

Contact Form

ပြည်သူတွေကို သတ်ဖို့ မဟုတ်ဘူး