စုလှိုင်
.
တောင်ကြီးခရိုင်၊ ရပ်စောက်မြို့နယ်၊ ကျိုင်းခမ်းကျေးရွာအနီးတွင်
ယနေ့ ဇန်နဝါရီလ ၁၉ ရက်က သေဆုံးနေသော အမျိုးသားအလောင်းတစ်လောင်း တွေ့ရှိခဲ့ကြောင်း သိရသည်။
.
“အလောင်းတွေ့တာ မှန်ပါတယ်။ သူပျောက်နေတယ်ဆိုပြီး
ရပ်စောက်ရဲစခန်းမှာ လူပျောက်မှု ဖွင့်ထားတယ်။ ဆွေမျိုး သားချင်းတွေ လိုက်ရှာကြရင်း
တွေ့တာပါ” ဟု ရပ်စောက်မြို့နယ်၊ အင်တောနယ်မြေရဲစခန်းမှူး ရဲအုပ် မင်းအောင်ထွန်း က ကမ္ဘောဇတိုင်းသို့
ပြောသည်။
.
သေဆုံးသူသည် ရပ်စောက်မြို့နယ်၊ ပင်ဖြစ်ကျေးရွာနေ
ဦးလှတိုး (၄၀ နှစ်) ဆိုသူဖြစ်ပြီး ၎င်းသည် သစ်တင်ကားဖြင့် ကျိုင်းခမ်း ဒေသသို့ လိုက်သွားရာမှ
ဇန်နဝါရီလ ၁၀ ရက်တွင် ငှက်ပစ်သွားစဉ် အဖွဲ့များနှင့်ကွဲကာ ကျိုင်းခမ်းတော အတွင်း တစ်ဦးတည်း
ကျန်ရစ်ခဲ့ခြင်းဖြစ်ပြီး ယနေ့ ဇန်နဝါရီလ ၁၉ ရက်တွင် ကျိုင်းခမ်းကျေးရွာမှ ၆ မိုင်ခန့်အကွာ
တောအတွင်း သေဆုံးလျက် ပြန်လည်တွေ့ရှိခဲ့ရခြင်းဖြစ်ကြောင်း သိရသည်။
.
ယင်း သေဆုံးသူ ဦးလှတိုးသည် အရက်သေစာ အနည်းငယ် သောက်စားတတ်သူ
ဖြစ်သဖြင့် တောအတွင်း မျက်စေ့လည် လမ်းမှာကာ အအေးမိ သေဆုံးခြင်းဖြစ်နိုင်ကြောင်းနှင့်
ပြင်ပဒဏ်ရာ တစ်စုံတစ်ရာ မတွေ့ရှိရကြောင်း ၎င်းထံက သိရသည်။
.
“သစ်တင်ဖို့ ဆိုပြီး ကားဒရိုင်ဘာက ခေါ်သွားပြီးတော့
ပြန်လာတော့ မပါလာဘူး။ ၈ ရက်နေ့ နောက်ပိုင်းကတည်းက သတင်းမေးရင်းနဲ့ ပြန်မလာလို့ လိုက်ရှာတာ
ဒီနေ့မှ သေဆုံးလျက် တွေ့တာပါ” ဟု သေဆုံးသူနှင့် ဆွေမျိုးတော်စပ်သူ တစ်ဦးကလည်း ပြောဆိုခဲ့သည်။
.
အဆိုပါ ဦးလှတိုး သေဆုံးမှုနှင့် ပတ်သက်၍ ဓမ္မတာအတိုင်းသေဆုံးခြင်းဟုတ်/မဟုတ်
သိရှိနိုင်ရန် အင်တောနယ်မြေ ရဲစခန်းတွင် သေမှုသေခင်း ဖွင့်လှစ်စစ်ဆေးသွားမည်ဖြစ်ပြီး
လက်ရှိတွင် ရုပ်အလောင်းအား တောတွင်းမှ သယ်ယူ နေဆဲဖြစ်ကြောင်း သိရသည်။
.
