ရွှေဘုန်းပွင့် စေတီတော်မြတ်ကြီး၏ မြို့လုံးကျွတ် ဆွမ်းဆန်စိမ်း လောင်းလှူပွဲ ပြုလုပ်မည်မဟုတ်ဘဲ လှူဖွယ်ပစ္စည်း များအား ကျောင်းအရောက် ပို့ဆောင်လှူဒါန်းမည်

ကိုစိုး (ကမ္ဘောဇတိုင်း) 

.

ရှမ်းပြည်နယ်မြို့တော် တောင်ကြီးမြို့တွင် နှစ်စဉ်ကျင်းပမြဲဖြစ်သော ရွှေဘုန်းပွင့်စေတီတော်မြတ်ကြီး၏ ၅၂ ကြိမ် မြောက် မြို့လုံးကျွတ် ဆွမ်းဆန်စိမ်းလောင်းလှူပွဲကို ယခုနှစ်တွင် COVID-19 ကပ်ရောဂါကူးစက်မှု အခြေအနေများ အရ ကျင်းပမည်မဟုတ်ဘဲ အလှူခံ၍ လှူဖွယ်ပစ္စည်းများကို ကျောင်းအရောက် ပို့ဆောင်လှူဒါန်းသွားမည်ဖြစ်ကြောင်း ရွှေဘုန်းပွင့်စေတီတော် ဂေါပကအဖွဲ့ထံက သိရသည်။

.

.

ရွှေဘုန်းပွင့်စေတီတော်မြတ်ကြီအား ဦးထိပ်ထား၍ ဆွမ်းဆန်စိမ်းလောင်းလှူပွဲကို တောင်ကြီးမြို့တွင် နှစ်စဉ် ပြာသို လပြည့် (အမေများနေ့) ၌ ကျင်းပလာခဲ့ခြင်းဖြစ်ပြီး ယခုနှစ်တွင် COVID-19 ရောဂါ ကူးစက်ပြန့်ပွားမှု မရှိစေရေး အတွက် ဗိုလ်ချုပ်လမ်းမတစ်လျှောက် သံဃာတော်များမှ တန်းဆွမ်း ကြွရောက် အလှူခံမည်မဟုတ်ဘဲ တပို့တွဲ လပြည့်နေ့တွင် မြို့ပေါ်ရှိ ဘုန်းတော်ကြီးကျောင်းများနှင့် သီလရှင်ကျောင်းများသို့ သံဃာတော်နှင့် သီလရှင် အနည်းအများအလိုက် ခွဲတမ်း ဆန်နှင့် လှူဖွယ်ပစ္စည်းများ ကို ကျောင်းအရောက် ပို့ဆောင်လှူဒါန်းခြင်းဖြစ်ကြောင်း သိရသည်။

.

“ခါတိုင်းနှစ်တွေကတော့ ပြာသိုလပြည့်မှာ လုပ်တယ်။ ဒီနှစ်ကတော့ ရက်နည်းနည်းကြပ်နေလို့ တပို့တွဲလပြည့်မှ လုပ်ဖြစ်မှာပါ။ ပွဲလမ်းသဘင်ရယ်လို့ လုပ်တာမဟုတ်ပါဘူး။ သံဃာတော်တွေအတွက် ဆွမ်းဆန် အခက်အခဲကို ကျွန်တော်တို့ တတ်နိုင်သလောက် ဖြေရှင်းပေးတဲ့သဘောနဲ့ လုပ်တာပါ” ဟု တောင်ကြီးမြို့၊ ရွှေဘုန်းပွင့် စေတီတော် ဂေါပကအဖွဲ့ဝင် ဦးတင်ထွန်းအောင်က ကမ္ဘောဇတိုင်းသို့ ပြောသည်။

.

ယင်းကဲ့သို့ ဆွမ်းဆန်စိမ်း ဆက်ကပ်လှူဒါန်းနိုင်ရေးအတွက် ရှမ်းပြည်နယ်အစိုးရမှ ငွေကျပ် သိန်း ၁၀၀ နှင့် ဆန်အိတ် ၃၀၀ လှူဒါန်းပေးထားပြီး ဌာနဆိုင်ရာများ၊ တောင်ကြီးမြို့ပေါ်ရပ်ကွက်များမှလည်း နှစ်စဉ် လှူဒါန်းမှုများ ရှိနေကြောင်း သိရသည်။

.

ထို့အပြင် ရှမ်းတောင်ပရဟိတညီနောင်များကွန်ရက်မှ တောင်ကြီးမြို့၊ ကမ္ဘောဇသာသနာ့ရိပ်သာရှေ့၊ မြို့မဈေးရှေ့နှင့် မူလမင်းကွန်းကျောင်းဝင်းအတွင်း ယနေ့ ဇန်နဝါရီလ ၂၃ ရက်မှ ဖေဖော်ဝါရီလ ၂ ရက်အထိ အလှူခံမဏ္ဍပ်များ ဖွင့်လှစ်ပြီး ဆန်အိတ် တစ်အိတ်လျှင် ငွေကျပ် ၂၅၀၀၀ နှုန်းဖြင့် အလှူခံဌာန ဖွင့်လှစ်၍ အလှူခံပေးလျက်ရှိကြောင်း သိရသည်။

.

တောင်ကြီးမြို့ပေါ်တွင် ဘုန်းတော်ကြီးကျောင်း ၁၀၀ ကျောင်း၊ သီလရှင်စာသင်တိုက် ၄၇ ကျောင်းရှိပြီး အဆိုပါ ကျောင်းများသို့ ရှမ်းပြည်နယ် ပြည်သူလူထုစားနပ်ရိက္ခာ ထောက်ပံ့ရေးကော်မတီမှလည်း အလျဉ်းသင့်သလို ဆွမ်းဆန်စိမ်းနှင့် လှူဖွယ်ဝတ္ထုပစ္စည်းများ ဆက်ကပ်လှူဒါန်းလျက်ရှိကြောင်း သိရသည်။

.

ဓါတ်ပုံ - ပြီးခဲ့သည့် ၂၀၂၀ ပြည့်နှစ်က ရွှေဘုန်းပွင့်စေတီတော်မြတ်ကြီး၏ ၅၁ ကြိမ်မြောက် ဆွမ်ဆန်စိမ်း လောင်းလှူပွဲ ပြုလုပ်စဉ်

.