တောင်ကြီးမြို့ရှိ မဟာပါသဏ မုံတဝလိုဏ်ဂူတော်သို့ လာရောက်အပန်းဖြေလည်ပတ်သူများ ရှိနေ

အောင်ဆန်းဝင်း

.

တောင်ကြီးမြို့ အနောက်တောင်ဘက် တောင်စောင်းတွင် တည်ရှိသည့် မဟာပါသဏ မုံတဝလိုဏ်ဂူတော်သို့ COVID-19 ကာကွယ်၊ ထိန်းချုပ်​ရေးဆိုင်ရာ စည်းကမ်းချက်များနှင့် အညီ နေ့စဉ် အပန်းဖြေ လာရောက်လည်ပတ်သူ အနည်းငယ်ရှိနေကြောင်း သိရသည်။

.

.

မဟာပါသဏမုံတဝလိုဏ်ဂူတော်သည် တောင်ကြီးမြို့၊ ကျောင်းကြီးစုရပ်ကွက်နှင့် အေးသာယာမြို့ကြား မုံတဝရွာ အနီးတွင်တည်ရှိပြီး တောင်ကြီးမြို့ပေါ်မှ တောလမ်းအတိုင်းလမ်းလျှောက်၍ဖြစ်စေ၊ ကားဆိုင်ကယ်များဖြင့်ဖြစ်စေ သွား ရောက်နိုင်ကြောင်း သိရသည်။

.

“အိမ်ထဲမှာနေရတာကြာလာတော့ စိတ်အပန်းပြေအောင်လို့ နီးနီးနားနားဖြစ်တဲ့ ဒီမုံတဝလိုဏ်ဂူဘက် မိသားစုနဲ့ လာလည်ကြတာပါ။ မုံတဝဂူဘက်လည်းမရောက်တာကြာပြီ။ ကလေးတွေလည်းရောက်ဖူးအောင်လို့ပါ” ဟု မုံတဝ လိုဏ်ဂူသို့ လာရောက်လည်ပတ်သည့် တောင်ကြီးမြို့၊ ချမ်းသာရပ်ကွက်နေ ကိုထွန်းထွန်းက ပြောသည်။

.

မုံတဝလိုဏ်ဂူတော်သို့လာရောက်လည်ပတ်သူ အများစုသည် မိသားစုလိုက်ဂူအတွင်းသို့ ဝင်ရောက်လည်ပတ်ရန် အခက်အခဲရှိသဖြင့် ဂူအပြင်ဘက်တွင်သာ လည်ပတ်စားသောက်၍ အလှဓာတ်ပုံများရိုက်ကူးကြလေ့ရှိကြောင်း သိရ သည်။

.

မဟာပါသဏမုံတဝလိုဏ်ဂူတော်အတွင်း ဘုရားစေတီများဖူးမြော်၍ ဂူအတွင်းဝင်ရောက်လည်ပတ်မည်ဆိုပါက အားကောင်းသည့်လက်နှိပ်ဓာတ်မီးများ ယူဆောင်သွားရန်လိုအပ်ပြီး အသက်အရွယ်ကြီးရင့်သူများ၊ ကျန်းမာရေး မကောင်းသူများ ဝင်ရောက်လည်ပတ်ရန် မသင့်လျော်ကြောင်း သိရသည်။

.