တာချီလိတ်မြို့နယ်တွင် ငွေကျပ် ၁ ဘီလီယံကျော်တန်ဖိုးရှိ ဘိန်းဖြူဘလောက်တုံးများ ဖမ်းမိ

ကမ္ဘောဇတိုင်း

.

တာချီလိတ်မြို့နယ်၊ ဟိုနား (အာခါ) ကျေးရွာအနီးတွင် ယမန်နေ့ ဇန်နဝါရီလ ၁၁ ရက်၊ နံနက်ပိုင်းက ငွေကျပ် ၁ ဘီလီယံကျော် တန်ဖိုးရှိ ဘိန်းဖြူဘလောက်တုံးများအား သယ်ဆောင်လာသူနှင့် အတူ ဖမ်းဆီးရမိခဲ့ကြောင်း သိရသည်။

.

.

တာချီလိတ်မြို့နယ်၊ ဝမ်ပုံနယ်မြေရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဇန်နဝါရီလ ၁၁ ရက်နေ့ နံနက် ၇ နာရီခန့်က  တာချီလိတ်မြို့နယ်၊ ဟိုနား(အာခါ)ကျေးရွာအနီး တာချီလိတ် - ဝမ်ပုံသွား ကားလမ်းတွင် စောင့်ဆိုင်း နေစဉ် တာချီလိတ်ဘက်မှ မောင်းနှင်လာသည့် OUTLANEDR အမျိုးအစားမော်တော်ယာဉ်အား စစ်ဆေးရန်တားဆီးရာ မောင်းနှင်ထွက်ပြေးသွားသဖြင့် လိုက်လံဖမ်းဆီးရာ ဝမ်ပုံနယ်မြေရဲစခန်းရှေ့တွင် ဖမ်းဆီးရမိခဲ့ပြီး မော်တော်ယာဉ်အား စစ်ဆေးရှာဖွေရာ ယာဉ်မောင်း ဂျူလိုင် နှင့်အတူ ယာဉ်ပေါ်ရှိဆာလာအိတ်များ အတွင်းမှ ဘိန်းဖြူ ၇ဝ ကီလိုကို ဖမ်းဆီး ရမိခဲ့ကြောင်း သိရသည်။

.

ထို့နောက် စစ်ဆေးချက်အရ ယင်းနေ့ နံနက် ၇ နာရီခွဲအချိန် မိုင်းဖုန်း(ခ)ကျေးရွာအုပ်စု၊ ဝမ်ဆောက်ခုံ (ရှမ်းရွာဟောင်း) နေ အိုက်ရီ (ခ) ခမ်းကျောက် နေအိမ်အား ဝင်ရောက်ရှာဖွေရာ ၎င်းအားမတွေ့ရှိဘဲ နေအိမ်အတွင်းမှ တူမီးသေနတ် ၁ လက်၊ ကျည် ၁၈ တောင့်တို့အား သိမ်းဆည်းရမိခဲ့ကြောင်း သိရသည်။

.

အဆိုပါ မူးယစ်ဆေးဝါးများ ဖမ်းဆီးရမိမှုနှင့် ပတ်သက်၍ ဂျူလိုင်နှင့် အိုက်ရီ (ခ) ခမ်းကျောက် (ဖမ်းမမိ) တို့ ၂ ဦးအား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေဖြင့် အရေးယူပြီး ထွက်ပြေးတိမ်းရှောင်နေသူ နှင့် ကွင်းဆက်များ ဖမ်းဆီးရမိရေး ဆောင်ရွက်လျက်ရှိကြောင်း သိရသည်။

.